Lukas 20

₁En kuute taach, waar Yeesus uf em hoof fom thëmpel fer tas folek am unterichte un te ewankeelium am aan saan. Tan sin phaar xëfe fon te priister aan khom un phaar Kesets mayster, mit phaar fiirer fom folek, ₂un hon kefroot:

— Saa fer uns: mit was fer autoriteet machst tuu tas tings? Weyer hot tich tii autoriteet kep?

₃Yeesus hot keantwort:

— Ich tuun aach etwas fer aych froe. ₄Weyer hot fer Yohan autoriteet kep fer se taafe? Waar tas Hërkot ore waare tas ti mënxe?

₅Too hon se aankefang se saan ëne fer te anere:

— Was sole meyer saan? Wën meyer saan tas es Hërkot waar, tuut eyer froe: “Tan warom hët teyer net an Yohan keklaapt?” ₆Awer, wën mer saan tas es ti mënxe waare, tuut tas kanse folek uns mit xteen ferwërfe, wayl tii mëne tas Yohan en profët waar.

₇Tesweche hon se keantwort:

— Meyer wise net weyer autoriteet fer Yohan kep hot fer se taafe.

₈Yeesus saat:

— Also, tan saan ich aach net mit was fer autoriteet ich tas tings mache.

₉Tëm noo, hot Yeesus aankefang tii paraapel aus xpreche:

— En man hot en trauwe plantaaj aankefang, hot se fermiit fer phaar paure un is aus sayn lant kereest un is iwer en lang tsayt aus keplip. ₁₀Wii ti ërnt tsayt khom is, hot te hër fon te trauwe plantaaj en knecht kexikt fer sayn teel ap hoole keen. Awer, ti paure hon em ferxlaa un hon em ap kexikt oone niks ap kewe. ₁₁Te hër hot en anere knecht kexikt, awer ti hon tee aach ferhau, too hon se em ferximpt un hon em tsurik kexikt oone niks ap kewe. ₁₂Tan hot te hër noch en trite kexikt; tee aach, hon se wee kemach un aus te plantaaj kextoost. ₁₃Tan, saat te hër fon te trauwe plantaaj: “Was mache ich? Ich xike mayne liipe soon; filaycht tuun se tee rexpekteere.”

₁₄— Wii se te soon kesiin hon, saate ti paure unich sich: “Tas is tee woo tas ales ërpe sol. Meyer tuun tee umpringe, tan khomt ti ërepxaft fer uns.”

₁₅— Un, hon em aus te trauwe plantaaj kexmis un hon em umkeprung.

Tan hot Yeesus kefroot:

— Was tuut tëne, tan, te hër fon te plantaaj? ₁₆Tee wërt khome, tuut tii paure fernichte un fermiit ti plantaaj fer anere.

Wii se tas keheyert hon, saate se:

— Wën tas ploos net paseyert!

₁₇Awer, Yeesus hot se kuut aan kekukt un saat:

— Ti Hayliche Xrifte saan: “Te xteen woo ti maurer net kuut kefun hon, kraat tee is te haupste xteen kep fon tëne al.” ₁₈Weyer uf tee xteen fale tuut, ferprecht in xtiker. Un, wën tee xteen iwich yemant fale tuut, tee kept in xtaap kemach.

₁₉Ti kesets mayster un ti xëfe fon te priister wuste tas Yeesus tii paraapel auskexproch hot weche tëne, un wolte em klaych in xpërte, awer ti hate pang fom folek. ₂₀Tan hon se aankefang Yeesus se opserweere. Hon phaar mëner aan kextelt fer iim aus frooe. Tii mëner hon kemach wii wën se kerecht weere, fer siin op se em fange khënte in en ferkheyert wort tas se em ap kewe khënte fer ti reemixe kowerneyer. ₂₁Tii mëner hon kefroot:

— Mayster, meyer wise tas was tuu saast un lërnst richtich is. Wise aach tas teyer net julkeyert ploos torich was mer siit un lërnst ti woerheet iwich tas leewe woo Hërkot hon wil tas ti mënxe leewe sole. ₂₂Saa uns: is es ore is es net richtich xtayer petsaale fer te reemixe kayser?

₂₃Awer Yeesus hot pekhept tas tii em hinerkeen wolte un saat:

₂₄— Pringt en nikel heyer. Weem is te naame un tas kesicht woo too truf kraweyert sin?

Tii hon keantwort:

— Sin em kayser.

₂₅Tan saat Yeesus tëne:

— Kept fer te kayser was em kayser is un kept fer Hërkot was em Hërkot is.

₂₆Tii khonte khee pewaysung keeche Yeesus mache foer em folek. Tesweche hon se sich ruych kehal, ferwunert mit tëm sayn antwort.

₂₇Phaar satuseyer, woo saan tas nimant witer peleept, sin ticht pay Yeesus khom ₂₈un hon kesaat:

— Mayster, Mooses hot tii kesets fer uns kexrip: “Wën en man xtërept un sayn fraa oone khiner lost, mus tëm sayne pruuter mit te witfraa hayrate, tas se khiner kriin, woo khiner fon tëm pruuter woo kextorep is kerechent kewe”. ₂₉Waare mool siwe priiter. Te elste hot kehayrat awer is kextorep oone khiner lose. ₃₀Tan, hot te tswete mit te witfraa kehayrat, ₃₁un, tëm noo, te trite. Un soo, tas selwiche mit ale siwe, al sin kextorep oone khiner lose. ₃₂Tsu letst, is ti fraa aach kextorep. ₃₃Was paseyert mit tee fraa wën ti toote uf xtaye? Fer was fer man sol se keheere, wën se mit te siwe kehayrat hot?

₃₄Yeesus hot keantwort:

— Hayrate is en sach fon tee welt. ₃₅Awer, ti layt woo Hërkot peleepe macht un es eewiche leewe siin wëre, tuun sich tort net hayrate, ₃₆wayl kewe wii ëngle un tuun nime xtërwe. Wëre Hërkot sayn khiner, wayl se peleept kep sin. ₃₇Un Mooses tsaycht, kans klaar, tas ti toote peleept kewe. Wën eyer fom tëner phutx woo in fayer waar xprecht, xraypt eyer tas te Hër te “Hërkrot fon Aapraham, Hërkot fon Iisak un te Hërkot fon Yaakop” is. ₃₈Tas tsaycht tas Hërkot te Hërkot fon te leewente mënxe is un net fon te toote, wayl fer Hërkot sin se al leepentich.

₃₉Too, hon phaar Kesets mayster kesaat:

— Kuut antwort, Mayster!

₄₀Un nimant hot koraaj kehat fer noch was aneres se frooe.

₄₁Klaych tëm noo hot Yeesus tëne kefroot:

— Wii khan mer saan tas te Kristus nookhomer fon Dawii is? ₄₂Wayl te aychne Dawii saat im Puuch fon te Salme:

₄₄Wën Dawii te Kristus Hër nënt, wii khan te Kristus nookhomer fon Dawii sin?

₄₅Tas kanse folek waar am heere, un Yeesus saat fer ti tisiple:

₄₆— Past uf mit te Kesets mayster, woo kërn lank tsaych aan tuun un mit rexpekt pekriist kewe uf em weech. Tii suuche ti eyerxte plets aus in te sinakook un ti peste plets am tix uf te feste. ₄₇Eksploreere ti witfraae un xteele tëne iire aychtum; un, fer tas ferxtele, mache se lange kepeete. Also, tëne iire xtroof wërt noch xroer sin.