Lukas 18

₁Yeesus hot tii paraapel fertseelt, woo eyer fer te tisiple tsaycht tas se imer peete solte un nii ti muut ferleere:

₂— In en xtat waar en richter woo net an Hërkot keplaapt hot un hot nimant rexpekteyert. ₃In tee selwich xtat hot en witfraa kewoont woo en imer uf kesuucht hot fer justis se ferlange, am saan: “Helef mich un richt iwich mayn sache keeche mayne keechner.”

₄— Iwich en lang tsayt wolt te richter ti kexicht fon te witfraa net julkeere, awer, am ën, hot eyer soo ketënkt: “Is woer tas ich net an Hërkot klaawe un tuun ach nimant rexpekteere. ₅Awer, tii witfraa is mich am ayre. Tesweche, tuun ich soriche tas tii sayn recht kriit. Wën ich tas net mache, heyert tii net uf mich se xteere.”

₆Un te Hër saat wayter:

— Kep acht an was te uneerliche richter saat. ₇Meecht tas sin, tan, tas Hërkot khee justis mache teet fer sayn aychne folek, woo noo hilef xraayt taache un nacht? Meecht eyer lang taure fer se helfe? ₈Ich saan aych sicher tas eyer richte tuut fer sayn folek un macht tas klaych. Awer, wën te Soon fom Man khome tuut, meecht eyer klaawe uf te eyert fine?

₉Yeesus hot aach tii paraapel fertseelt fer tii woo kemënt hon weere tsu kuut un hon weenich acht te anere kep:

₁₀— Tswaay mëner sin in te thëmpel kang fer se peete. Ëne waar en fariseyer, un te anere, xtayer kaseerer. ₁₁Te fariseyer is xteen keplip un hot soo aleen kepeet: “Oh, Hërkot, ich tanke tich wayl ich net kelt keerich sin, net uneerlich, net imoraal wii ti anere layt. Tanke tich aach wayl ich net sin wii tee xtayer kaseerer. ₁₂Ich faste tswaay mool ti woch un kewe tich tseen protsënt fon ales was ich kriin.”

₁₃— Awer te xtayer kaseerer is fon waytem keplip un hot net mool ti aue pis an te himel kehoop. Hot imer uf ti prust keplopt un saat: “Oh, Hërkot, petauer mich, wayl ich sin en sinter!”

₁₄Un Yeesus macht xlus, am saan:

— Ich saan sicher fer aych tas es te xtayer kaseerer waar, un net te fariseyer, woo tsurik hëm kang is in friite mit Hërkot. Wayl weyer sich selwer mee wii ti anere rechent, kept erniitricht, awer weyer sich erniitricht, kept keeert.

₁₅Tëm noo, hon phaar layt sayn khiner hiin kenom fer Yeesus tas eyer se seechne teet, awer ti tisiple hon tas kesiin un hon tii layt kexteyert. ₁₆Tan hot Yeesus ti khiner ticht pay sich keruuf un saat:

— Lost ti khiner tsu mich khome un ferpiit net tas tii tas mache, wayl te Hërkots Raych keheyert tëne woo sin wii tii khiner. ₁₇Ich fersichere aych tas tas woer is: weyer net te Hërkots Raych aan nëmt wii en khint khomt nii tort rin.

₁₈En yute fiirer hot fer Yeesus kefroot:

— Kuute Mayster, was sol ich mache fer tas eewiche leewe kriin?

₁₉Yeesus hot keantwort:

— Warom ruufst tuu mich kuut? Ploos Hërkot is kuut un sonst nimant. ₂₀Tuu khënst ti kepoote: “Tuu khee eepruch aan richte, tuu net umpringe, net xteele, kep khee falxe tsayer keeche nimant, rexpekteyer tayne papa un tayn mama.”

₂₁Te man hot keantwort:

— Tsayt khint uf sin ich al tii kepoote noo kang.

₂₂Wan Yeesus tas keheyert hot, saat eyer:

— Feelt noch een tings fer tich se mache. Ferkhaaf ales was tuu host un kep tas kelt fer ti aarme un, soo, wërst tuu raychtum im himel hon. Tëm noo, khom un kee mich noo.

₂₃Wan te man tas keheyert hot, is er aarich traurich kep, wayl er aarich raych waar. ₂₄Wii Yeesus tëm sayn traurichkheet kesiin hot, saat er:

— Wii xwiirich is es fer ti rayche in te Himels Raych rin khome! ₂₅Is xwiiricher en rayche in te Hërkots Raych rin khome als en khameel torich en nootels loch khome.

₂₆Tii woo tas keheyert hon, hon kefroot:

— Tan, weyer khan sich rete?

₂₇Yeesus hot keantwort:

— Was unmeechlich is fer ti mënxe is meechlich fer Hërkot.

₂₈Tan saat Pheeter:

— Kuk mool: Meyer hon unser familye tsurik kelos un sin te Hër noo kang.

₂₉Yeesus antwort:

— Ich fersichere aych tas tas woer is: tee woo weche em Hërkots Raych sayn haus, fraa, kexwister, ferwante ore khiner tsurik lost ₃₀wërt noch in tëm leewe fiil mee kriin un, im futur, kriit er tas eewiche leewe.

₃₁Yeesus hot ti tswelef tisiple uf sayt keruuf un saat:

— Heyert, meyer sin noo Yeruusalëm am keen, woo ales paseere sol was ti profëte kexrip hon iwich te Soon fom Man. ₃₂Tee wërt ap kep fer tii woo khee yute sin, un tii tuun em ferxpote, pelaytiche, ferxpuke ₃₃un ferpaytxe; un tëm noo tuun se em umpringe. Awer am trite taach wërt eyer peleepe.

₃₄Ti tisiple hon niks fextan fon was Yeesus kesaat hat. Was ti wërter petayte wolte waar tëne ferxtekelt kep, un tii wuste net fon was Yeesus am xpreche waar.

₃₅Yeesus waar xon ticht an ti xtat Jerikoo am khome. En plinte man hot am weech rant kesitst, am petle. ₃₆Wii eyer tas folek keheyert hot langst keen, hot eyer kefroot was tas weyer.

₃₇Phaar layt hon keantwort:

— Is Yeesus fon Nasarëë woo torich am keen is!

₃₈Too hot te plinte aankefang se xraaye:

— Yeesus, Soon fon Dawii, petauer mich!

₃₉Ti layt woo foer traan am keen waare hon em ferxënt un hon kexikt solt ruych playwe. Awer tee hot noch hërter kexraayt:

— Soon fon Dawii, petauer mich!

₄₀Yeesus hot xtil kehal un hot kexikt tas se te plinte pringe solte. Wii tee ticht khom is, hot Yeesus kefroot:

₄₁— Was wilst tuu hon tas ich mache sol?

Te plinte antwort:

— Hër, ich wil noch mool siin!

₄₂Tan saat Yeesus:

— Kuk! Tuu pist heel wayl tuu keklaapt host.

₄₃Im selwiche momënt hot te man aankefang se siin un, Hërkot am loope, is eyer Yeesus noo kang. Un al tii woo tas kesiin hon, hon aankefang Hërkot se loope.