Lukas 17

₁Yeesus saat fer sayn tisiple:

— Imer wërt tings paseere woo ti layt in sinte fale mache, awer ay fon weyer xult too traan hot! ₂Weyer peser fer tee persoon wën eyer ins meer kexmis keept mit en kroose miil xteen am hals kepun als mache tas eene fon tëne kleene sinte macht. ₃Past uf! Wën tayne pruuter sinte macht, tuu en xteere; wën eyer sich roye tuut, fertsay en. ₄Wën eyer siwe mool te taach sinte keeche tich macht un yeetes mool tee sich unxultiche tuut, tan fertsay en.

₅Ti aphostle hon fer te Hër ferlangt:

— Mach unser klaawe kreeser.

₆Un te Hër antwort:

— Wën ayre klaawe soo kroos weyer wii en mustart soomche, khënt teyer saan fer tee wilte fayche paam: “Rop tayn wortsle aus te eyert un plans tich ins meer!” Un tee teet heere.

₇Yeesus saat:

— Xtelt aych mool foer wën teyer en knecht het woo in te plantaaj xaft ore tuut ti xeef uf pase. Wën tee tsurik khomt fom khamp, meechst tuu tëm saan: “Khom xnel un sets tich an te tix”? ₈Kewis net. Kraat es keeche teel, wils tuu iim saan: “Prepareyer mayn nachts ese, pin tayn xërts um un petiin mich am tix. Tëm noo khanst tuu ese keen.” ₉Meechte meyer tëm knecht filaycht tanke mise wayl tee ketuun hot was tëm kexikt kep waar? ₁₀Soo mus tas aach mit aych sin. Wën teyer ales kemach hot was kexikt waar, saat: “Meyer sin tiiner, sonst niks, hon ploos unser flicht ketuun.”

₁₁Uf em weech noo Yeruusalëm, is Yeesus iwich ti krëns tswixich Samariia un Kalilëya kang. ₁₂Wii eyer uf en kleen plats aan khom is, hon tseen lëpra kranke sich kemelt. Sin pisye wayter wech keplip ₁₃un hon in hat xtim kexraayt:

— Yeesus, Mayster, petauer uns!

₁₄Wii Yeesus se kesiin hot, saat eyer:

— Keet un ferlangt fer ti priister sole aych unersuuche.

Soo lang wii se am keen waare, sin se sauwer fon sayn weye kep. ₁₅Eene fon tëne, wii eyer kesiin hot tas eyer kesunt waar, is tsurik khom, Hërkot am loope in hat xtim. ₁₆Hot sich foer Yeesus kekniit un hot em ketankt. Tee waar en samaritaaner. ₁₇Yeesus hot kefroot:

— Sin net ti tseen al keheelt kep? Woo sin ti anere noyn? ₁₈Fint mer khëne woo tsurik khom is sonst tee auslëner?

₁₉Tan saat Yeesus tëm:

— Xtay uf un kee; tayne klaawe hot tich keret.

₂₀Phaar fariseyer hon fer Yeesus kefroot wan em Hërkot sayne Raych khome teet. Eyer antwort:

— Wën Hërkots Raych khome tuut, is es khee tings woo mer siin khan. ₂₁Nimant wil saan: “Kuuk mool! Hier is es” ore “Too is es”. Wayl te Khotes Raych is in aych trin.

₂₂Tan saat Yeesus fer sayn tisiple:

— Khomt ti tsayt woo teyer ëne fon te taache siin wolt woo te Soon fom Man xon aan khom is, awer kriit em net se siin. ₂₃Phaar wole fer aych saan: “Kukt mool heyer” ore “Kukt mool tort”; awer keet net aus fer em se suuche. ₂₄Wayl, soo wii te plits fon eene phunkt fom himel tsum anere xaynt, soo wil es sin am taach woo te Soon fom Man khome tuut. ₂₅Awer, eyerxt mus Eyer layte un ap kextoost kewe fom folek fon hayt tsu taach. ₂₆Wii es im Noah sayn tsayte waar, soo aach wil es sin in tee taache foer te Soon fom Man khomnis. ₂₇Al hon kes un ketrunk, un ti mëner un ti fraae hon kehayrat, pis an te taach woo Noah in te xif kang is. Tëm noo is te sintfluut khom un hot se al umkeprung. ₂₈Tas selwiche is paseyert im Lot sayn tsayt. Al hon kes un ketrunk, khaaft un ferkhaaft, keplanst un kepaut. ₂₉Am taach woo Lot aus Sotoma kang is, hot es fayer un xweefel fom himel kereent un hot se al umkeprung. ₃₀Soo wils sin am taach woo te Soon fom Man tsum foerxayn khomt. ₃₁Tan, weyer uf em haus is, uf em teras, sol runer khome, un sol klaych ausrayse, un sol khee tsayt ferleere fer rin se keen sayn tings hoole. Un weyer in te plantaax is, sol net hëm keen. ₃₂Erinert aych an Lot sayn fraa. ₃₃Te persoon woo sayn aychne interese suucht, wil nii es echte leewe hon, awer, weyer sich selwer ferkest, kriit es echte leewe. ₃₄In tee nacht wole tswaay persoone im selwiche pet xloofe. Ich pehaupte aych tas eens kehool kept un es anere kept kelos. ₃₅Tswaay fraae tuun mitsamer weets maale: een kept kehool, un ti aner, kelos. ₃₆[In tëm taach, tswaay mëner wole in te plantaax am xafe sin: eene kept kehool, un te anere, kelos.]

₃₇Tan hon ti tisiple kefroot:

— Hër, woo wërt tas paseere?

Yeesus antwort:

— Woo te khërwer fon en toote is, too tuun sich ti oots feel samle.