Yohan 7

₁Too tenoo, is Yeesus noo Kalilëya kang; tee wolt net in te Yutëya rom keen wayl ti yute fiirer fon tort wolte em umpringe. ₂Awer te yute sayn fest, woo Laap Hiite Fest heest, waar ticht. ₃Too hon em Yeesus sayn priiter fer tee kesaat:

— Kee too fort noo Yutëya tas tayn aanhënger siin was tuu am mache pist. ₄Wayl weyer pekhant kewe wil sol net ferxtekle was eyer am mache is. Wëns tuu tas tings machst, tan sole se tich al khëne.

₅Pis em Yeesus sayn priiter hon net an tee keklaapt.

₆Yeesus hot keantwort:

— Mayn tsayt is noch net khom, awer fer aych past yeete tsayt. ₇Ti welt khan aych net hase, awer mich hast se, wayl ich saan tas was ti welt macht xlecht is. ₈Keet teyer uf tas fest, awer ich keen net, wayl mayn tsayt is noch net khom.

₉Yeesus hot tas kesaat un is in Kalilëya keplip.

₁₀Wii sayn priiter uf es fest kang sin, is Yeesus aach kang, awer tee hot tas heelich kemach, oone sich fer nimant tsayche. ₁₁Ti yute fiirer hon em uf em fest kesuucht un hon kefroot:

— Woo is tee man?

₁₂Pay em folek waare fiil layt woo iwer tee ti reet kehal hon. Phaar hon kesaat:

— Tee is kuut.

Anere hon kesaat:

— Eyer is net kut! Tee tuut ti layt hinerkeen.

₁₃Awer nimant hot ufrichtich fon tëm kexproch, wayl ti hate al pang fon te yute fiirer.

₁₄Wii tas fest xon in te heleft waar, is Yeesus in te Thëmpel kang un hot aan kefang untericht hale. ₁₅Ti yute fiirer hon sich ferwunert un hon kesaat:

— Wii wees tee soo fiil, wën er net kelërnt hot?

₁₆Yeesus saat:

— Was ich aych lërne khomt net fon meyer, awer khomt fom Hërkot, woo mich kexikt hot. ₁₇Weyer em Hërkot sayne wile mache wil wees op was ich unterichte fom Hërkot khomt ore op ich aus mich xpreche. ₁₈Weyer in sayne aychne naame xprecht wil keloopt kewe. Awer weyer loop kriin wil fer tee woo em kexikt hot, tee is eyerlich, un is niks falxes an tëm. ₁₉Es waar Mooses weyer aych es Kesets kep hot, ore net? Awer nimant fon aych keet tëm Kesets noo. Warom wolt teyer mich umpringe?

₂₀Tas folek hot keantwort:

— Tuu pist tomineyert fon en temoon! Weyer wil tich umpringe?

₂₁Too saat Yeesus:

— Ich hon en wuner kemach, un teyer sayt al ferwunert too temit. ₂₂Teyer pexnayt en puupche pis am samstach wayl Mooses tas aych mache kexikt hot. Awer, in te woerheet, waar es net Mooses woo aan kefang hot mit te pexnaytung, awer ti patriarke. ₂₃Fer net keeche em Mooses sayn Kesets keen, pexnayt teyer en puupche, pis am samstach. Warom tan, wërt teyer soo pees mit meyer wën ich en mënx kans kesunt mache am samstach? ₂₄Lost noo se xulkeere torich was ti layt aus siin un xulkeyert mit justis.

₂₅Phaar layt woo in Yeruusalëm kewoont hon, hon kefroot:

— Is tee net te man woo se umpringe wole? ₂₆Kukt mool! Tee is am xpreche fer weyer es heere wil, un nimant saat etwas keeche tee! Meechte ti autoriteete es wërklich wise tas tee te Kristus is? ₂₇Awer, wën te Kristus khomt, wërt nimant wise woo er heyer is; un meyer wise woo er heyer is.

₂₈Wii eyer am unterichte waar uf em hoof fom Thëmpel, hot Yeesus in hat xtim kesaat:

— Meecht teyer mich wërklich khëne un wist fon woo ich khome? Ich sin net khom aus mayn aychne wile. Tee woo mich kexikt hot is te waare, awer teyer khënt em net. ₂₉Awer, ich khëne iim, wayl ich khome fon tëm un sin fon tëm kexikt kep.

₃₀Too wolte se Yeesus fange, awer nimant hot tas kemach wayl tëm sayn xtun noch net khom waar. ₃₁Awer, fiil layt woo unich em folek waare hon an tëm keklaapt un hon kefroot:

— Wën te Kristus khome tuut, meecht tee kreesere wunere mache wii tee man am mache is?

₃₂Ti fariseyer hon tas folek keheyert tas tings am xpreche iwich Yeesus, un tesweche hon tii un ti xëfe fon te priister ti soltaate kexikt fer em se fange.

₃₃Yeesus saat:

— Ich playwe ploos mee en pisye hii pay aych un tan keen ich tsurik pay tee woo mich kexikt hot. ₃₄Teyer wërt mich suuche un wërt mich net fine, wayl khënt net hiin uf tas plats woo ich hiin keen.

₃₅Too, hon ti yute fiirer aan kefang unich sich se saan:

— Woo meecht tee hiin tas meyer en net fine khëne? Meecht eyer woone keen pay ti yute in auslant? Meecht eyer unterichte keen fer ti woo khee yute sin? ₃₆Was meecht te saan wole wii eyer fersichert hot: “Teyer wërt mich suuche un wërt mich net fine, wayl khënt net hiin uf tas plats woo ich hiin keen”?

₃₇Te letste taach fom fest waar te importanteste. An tëm taach hot Yeesus sich uf kextelt un saat in hat xtim:

— Wën yemant torxt hot, khom tsu mich un trink. ₃₈Wii ti Hayliche Xrifte saan: “Fluse fon leewent waser wëre xtroome aus em hërts fon wëm an mich klaapt.”

₃₉Yeesus waar iwich te Hayliche Kayst am xpreche, tee woo kep wëre sol fer tii woo an tëm klaawe. Tii layt hate noch net te Hayliche Kayst kriit kehat, wayl Yeesus noch net tsurik waar pis an Hërkot sayn kloor.

₄₀Fiile layt woo tii wërter keheyert hon, saate:

— Tee man is wërklich te Profët!

₄₁Anere saate:

— Te is te Kristus!

Un noch anere layt hon kefroot:

— Awer, meecht te Kristus fon Kalilëya khome? ₄₂Ti Hayliche Xrifte saan tas te Kristus en nookhomer fon Dawii sin sol un in Petleheem uf ti welt khome sol, woo Dawii kewoont hot.

₄₃Too hot tas folek sich keteelt weche tëm. ₄₄Phaar wolte Yeesus fange, awer nimant hot tas kemach.

₄₅Ti soltaate sin tsurik uf tas plats woo ti xëfe fon te priister un ti fariseyer waare, un ti hon kefroot:

— Warom het teyer net tee man keprung?

₄₆Tii hon keantwort:

— Nii hot yemant kexproch wii tee!

₄₇Tan hon ti fariseyer fer ti soltaate kesaat:

— Meecht teyer aach hinerkang kep sin? ₄₈Hot, filaycht, en autoriteet ore en fariseyer an tëm keklaapt? ₄₉Ti layt woo net ti Kesets khëne sin fon Hërkot ferfluucht.

₅₀Awer, Nikoteemus, woo eene fon tëne waar un woo selich mool mit Yeesus kexproch hat, saat:

₅₁— Unser Kesets noo, khëne meyer net en man konteneere oone tëm eyerxt aan heere un auskluuche was tee kemach hot.

₅₂Tii hon kefroot:

— Pist tuu aach, filaycht, fon Kalilëya? Xtuteyer ti Hayliche Xrifte un tan siist tuu tas fon Kalilëya nii en profët tsum foerxaym khom is.