Yohan 6

₁Too tenoo, is Yeesus ti Kalilëya lakoo iwer kang, woo aach Tiperiiates kenënt is. ₂En kroos folek is tëm noo kang, wayl ti layt ti wunere kesiin hate woo tee kemach hat, mit ti kranke woo eyer keheelt hat. ₃Yeesus is te përich ruf kang un hot sich tort hiin kesetst mit sayn tisiple. ₄Ti Oostre, te yute sayn haupst fest, waar xon ticht. ₅Yeesus hot um sich rom kekukt un siit tas en kroos folek ticht pay iim am khome waar. Tan saat eyer fer Filip:

— Woo khaafe meyer ese fer ti kanse layt?

₆Yeesus wust kans richtich was eyer mache teet, awer saat tas fer siin was Filip antworte teet.

₇Filip hot soo keantwort:

— Tas yeete mënx en pisye proot kriin khënt, miste meyer mee wii tswaay hunert silwerne nikle aus kewe.

₈Too hot eene fon te tisiple, Antrëas, Simon Pheeter sayne pruuter, kesaat:

₉— Too is en puupche woo finef këxte proot un tswaay fixyer hot. Awer, was is tas fer soo fiil layt?

₁₀Yeesus saat:

— Saat fer ti kanse layt tas se sich uf te potem setse sole.

Too, hon se sich al kesetst. (Waar fiil kraas uf tëm plats.) Too waare neekst finef tausent mëner. ₁₁Klaych tëm noo, hot Yeesus tas proot kehool, hot Hërkot ketankt un hot se keteelt mit al; un hot tas selwiche kemach mit te fix. Un al hon kenuuch kes. ₁₂Wii se xon sat waare, saat Yeesus fer ti tisiple:

— Reft ti xtiker woo iwerich keplip sin samer, tas niks ferloer keet.

₁₃Tii hon ti xtiker samer kerof un hon tswelef khërep fol kemach mit was iwerich keplip waar fon te finef proote.

₁₄Tii woo tee wuner fon Yeesus kesiin hon, saate:

— Tas is, wërklich, te Profët woo het sole uf ti welt khome!

₁₅Yeesus hot se wise kriit tas se em wolte, mit kewalt, mit nëme fer iim kheenich mache; tan is eyer aleen tsurik uf te përich kang.

₁₆Foer nacht, sin Yeesus sayn tisiple runer kang pis an ti lakoo. ₁₇Sin uf en poot kextii un hon aan kefang ti lakoo iwer faare, in te richtung noo te xtat Kafarnaum. Wii es xon tunkel waar, waar Yeesus sich noch net pekeechne khom mit tëne. ₁₈Uf mol, hot en xtarke wint aan kefang se ploose un ti wele in ti hee xtaye kemach. ₁₉Ti tisiple hate xon finef ore seks khilomeeter mit em poot kefaar kehat, wii se Yeesus kesiin hon iwer es waser am keen un ticht an te poot am khome. Un hon fiil pang kriit.

₂₀Awer Yeesus saat:

— Praycht khee pang hon, sin Ich!

₂₁Tan hon tii en froo ufkenom im poot un sin klaych uf tas plats khom woo se hiin wolte.

₂₂Am neekste taach, hot tas kroos folek woo uf te aner sayt fon te lakoo keplip waar kemërekt tas too niks waar, ploos en kleene poot un tas Yeesus net too inkextii waar mit sayn tisiple, wayl ti tisiple aleen ap kefaar sin. ₂₃In tee tsayt, anere kleene poote sin fon Tiperiiates aan khom, hon xtil kehal ticht am plats woo tas kroose folek proot kees hat noo em Hër Yeesus sayne tankt kewe fer Kot. ₂₄Wën, tan, tas folek kesiin hot tas net Yeesus un net mool ti tisiple too waare, sin se inkextii in ti poote un sin pis Kafarnaum kereest, fer Yeesus se suuche.

₂₅Tas folek hot Yeesus kefun uf te aner sayt fon te lakoo un hon em kefroot:

— Mayster, wan pis tuu too aan khom?

₂₆Yeesus hot keantwort:

— Ich fersichere es aych tas tas woer is: Teyer suucht mich net wayl teyer tsayche kesiin hot, awer wayl teyer proot kes hot un sayt sat kep. ₂₇Xaft, net weche em ese woo fertërept ore faule tuut, awer weche em ese woo fer ti eewichkheet erleept, tas woo te Soon fom Man aych kewe wil, wayl te Hërkot, te Fater, tas mit sayne marke konfirmeyert hot.

₂₈Hon noch fer Yeesus kefroot:

— Was sole mer mache fer em Hërkot sayn aarwat tuun?

₂₉Yeesus hot tëne keantwort:

— Tee wil hon tas teyer klaapt an tee woo eyer kexikt hot!

₃₀Too hon tii kesaat:

— Was fer sinaal machst tuu tas mer siin khëne un an tich klaawe khëne? Was khanst tuu mache? ₃₁Unsere foerkhomer hon te manaa im tesërt kes, wii es kexrip is in te Hayliche Xrifte: “Fom himel hot eyer tëne proot kep fer se ese”.

₃₂Yeesus saat:

— Ich fersichere aych tas tas woer is: tas waar net Mooses weyer aych tas proot fom himel kep hot; wayl weyer tas echte proot fom himel kept is mayne Fater. ₃₃Wayl tas proot woo Hërkot kept is tee woo fom himel runer khomt un leewe fer ti welt kept.

₃₄Tii hon ferlangt:

— Hër, kep uns imer fon tëm proot!

₃₅Yeesus hot tëne keantwort:

— Ich sin tas Proot fom Leewe. Weyer tsu mich khomt, wërt nii mee hunger layte, un tee woo an mich klaapt, wërt nii mee torxt layte. ₃₆Awer, ich saat aych xon tas teyer net an mich klaapt, wën teyer mich toch am siin sayt. ₃₇Al tii woo te Fater mich kept, wëre tsu mich khome; un tee woo tsu mich khomt, uf khee aart xmayse ich en wech. ₃₈Wayl ich fom himel runer khom sin, fer te wile se tuun fon tëm woo mich kexikt hot un net fer mayne aychne wile se tuun. ₃₉Un te wile fon tëm woo mich kexikt hot is tee: tas khee ëne woo te Fater mich kep hat sich ferleere sol, awer tas ich se al peleepe am letste taach. ₄₀Wayl mayne Fater sayne wile is tas yeete mënx woo te Soon siit un an tëm klaapt sol es eewiche leewe hon; un am letste taach wërt ich em peleewe.

₄₁Tii hon aankefang Yeesus se kritiseere, wayl eyer kesaat hat: “Ich sin tas proot woo fom himel runer khom is”. ₄₂Un saate:

— Is tas net Yeesus, Yoosef sayne soon? Im tsuufal, khëne mer net tëm sayne papa un sayn mama? Wii saat eyer yets tas eyer fom himel runer khom is?

₄₃Yeesus antwort:

— Heyert uf se knutre keeche mich. ₄₄Khëne noore tsu mich khome tii woo te Fater pringe tuut, woo mich kexikt hot, un ich wërt se peleepe am letste taach. ₄₅In te Profëte xteet kexrip: “Un kewe al fon Hërkot inkelërnt.” Un al tii woo te Fater aan heere un mit tëm lërne, tii khome tsu mich. ₄₆Tas petayt net tas yemant te Fater kesiin hot, sonst tee woo fom Hërkot khomt; tee hot em xon kesiin.

₄₇— Ich fersichere aych tas tas woer is: weyer klaapt hot tas eewiche leewe. ₄₈Ich sin tas proot fom leewe. ₄₉Ayre foerkhomer hon te manaa im tesërt kes, awer sin kextorep. ₅₀Hier is tas proot woo fom himel runer khomt; un weyer fon tëm proot ese tuut, wërt nii xtërwe. ₅₁Ich sin tas leewente proot woo fom himel runer khom is. Wën yemant fon tëm ese tuut, tuut fer imer leewe. Un tas proot woo ich kewe fer tas ti welt leewe hot is mayn flayx.

₅₂Too hon se unich sich aankefang se tisputeere. Un hon kefroot:

— Wii khan tee uns sayn aychne flayx kewe fer se ese?

₅₃Yeesus antwort tëne:

— In woerheet saan ich aych: wën teyer net em Soon fom Man sayn flayx est un net sayn pluut trinkt, het teyer khee leewe in aych selepst. ₅₄Weyer mayn flayx est un mayn pluut trinkt, hot tas eewiche leewe, un ich wil en peleewe mache am letste taach. ₅₅Weyl mayn flayx is tas echte ese un mayn pluut is tas echte ketrënk. ₅₆Weyer mayn flayx est un mayn pluut trinkt playpt in mich un ich in tëm. ₅₇Te Fater, woo es leewe hot, waar weyer mich kexikt hot, un weche tëm hon ich es leewe. Soo, aach, tee woo fon mich sich neere tuut, wërt es leewe hon weche mich. ₅₈Tas is tas proot woo fom himel runer khom is. Is net wii tas proot woo ayre foerkhomer kes hon un toch soo kextorep sin. Weyer fon tëm proot est wërt fer imer leewe.

₅₉Tas ales saat Yeesus, wii eyer in te sinakook fon Kafarnaum keuntericht hot.

₆₀Fiile fon tëm sayn tisiple, wii se tii wërter keheyert hon, saate:

— Xroo is tii reet; weyer khan tas aan heere?

₆₁Awer Yeesus wust aus sich selwer tas tii unich sich keknutert hon iwich sayn wërter, hot se aan kexproch:

— Tuut tas aych skantaliseere? ₆₂Was kept tas, tan, wën teyer siit te Soon fom Man ruf uf tas plats keen woo Eyer te eyerst waar? ₆₃Te Hërkots Kayst is weyer es leewe kept, awer, te mënx khan tas net mache. Ti wërter woo ich aych xon kesaat hon sin kayst un sin leewe. ₆₄Awer, toch soo, sin etliche unich aych woo net klaawe.

Also, Yeesus wust, tsayt am aanfank, was fer net keklaapt hon un weyer em hinerkeen teet. ₆₅Un saat wayter:

— Tesweche, saat ich aych imer: nimant khan tsuu mich khome, wën es net fom Fater iim kep waar.

₆₆Tesweche, hon fiile fon sayn tisiple em in xtich kelos un sin net mee mit em kang. ₆₇Tan, froot Yeesus fer ti tswelef:

— Wolt teyer, filaycht, aach fort keen?

₆₈Simon Pheeter hot keantwort:

— Hër, an weem wole mer hiin keen? Tuu host ti wërter fom eewiche leewe, ₆₉un meyer hon keklaapt un kekhënt tas tuu em Hërkot sayne Hayliche pist.

₇₀Yeesus saat:

— Tas waar ich woo aych al aus kesuucht hon, ti tswelef. Awer, ëne fon aych is en taywel!

₇₁Tee waar fon Yuutas am xpreche, soon fon Simon Iskariotes. Wayl Yuutas, wën eyer ach eene fon te tswelef tisiple waar, teet Yeesus hinerkeen.