Yohan 13

₁Hot ploos ëne taach kefeelt fer tas Oostre Fest. Yeesus wust tas ti xtun xon khom waar fer tii welt hiner lose un pis pay te Fater keen. Tee hot imer sayn tisiple keliipt woo uf tii welt waare un hot se pis ans ën keliipt.

₂Yeesus un sayn tisiple waare es nachts ese am ese. Te Taywel hot xon in Yuutas, soon fon Simon Iskariotes, sayne khop ketuun kehat ti itee fer Yeesus hinerkeen. ₃Yeesus wust tas te Fater ti kans macht fer Yeesus kep hat. Un wust aach tas eyer fon Hërkot khom waar un noo Hërkot këngt. ₄Tan is eyer uf kextii, hot sayne mantel aus ketuun, hot en paat tuuch kehool un hot tas um sayne layp kepun. ₅Klaych tëm noo, hot eyer waser in en xisel kexut un hot aankefang te aphostle sayn fiis se wexe un mit tëm hant tuuch aptrokne. ₆Wii eyer ticht an Simon Pheeter khom is, hot tee tëm kefroot:

— Tuust tuu mayn fiis wexe, Hër?

₇Yeesus hot keantwort:

— Yets tuust tuu tas net ferxteen was ich am mache sin, awer xpeeter hiin tuust tuu tas ferxteen!

₈Pheeter saat:

— Teyer wërt nii mayn fiis wexe!

Yeesus hot keantwort:

— Wën ich se net wexe, pist tuu nime mayne tisipel!

₉Simon Pheeter hot ferlangt:

— Tan, Hër, wex net ploos mayn fiis; wex aach mayn hënt un mayne khop!

₁₀Too saat Yeesus:

— Weyer sich xon kepaat hot is kans sauwer un prauch ploos ti fiis wexe. Teyer al sayt sauwer, tas mënt al, ploos eene net.

₁₁Yeesus wust weyer iim hinerkeen teet. Tesweche saat eyer: “Al, ploos eene net.”

₁₂Wii eyer te tisiple sayn fiis kewex hat, hot Yeesus noch mool sayne mantel aan ketsoo, hot sich noch mool an te tix kesetst un hot kefroot:

— Hot teyer ferxtan was ich kemach hon? ₁₃Teyer nënt mich “Mayster” un “Hër” un het recht, wayl ich es wërklich sin. ₁₄Wen ich, te Hër un Mayster, ayre fiis kewex hon, tan mist teyer eene em anere sayn fiis wexe. ₁₅Wayl ich hon te payxpil kep tas teyer macht was ich kemach hon. ₁₆Ich fersichere aych tas tas woer is: te knecht is net importanter wii sayne hër, un te mensajeyer is net importanter wii te woo en kexikt hot. ₁₇Wën teyer tii woerheet tan xon wist, tan wërt teyer froo sin wën teyer tas macht.

₁₈— Ich sin net fon aych al am xpreche; ich khëne tii woo ich raus kesuucht hon. Wayl mus in kehal kewe was ti Hayliche Xrifte saan: “Tee woo mit meyer ese tuut hot sich keeche mich kextelt”. ₁₉Ich saan tas aych yets, eep tas paseyert, tas, wën tas paseere tuut, teyer klaawe tuut tas “Ich Sin Tee Woo Ich Sin”. ₂₀Ich fersichere aych tas tas woer is: weyer aan nëmt tee woo ich xike tuun, tuut mich aach aan nëme; un weyer mich aan nëmt, tuut aach aan nëme tee woo mich kexikt hot.

₂₁Wii eyer tas kesaat hat, is Yeesus aarich petriipt kep un hot kans klaar kesaat fer ti tisiple:

— Ich fersichere aych tas tas woer is: ëne fon aych tuut mich hinerkeen.

₂₂Too hon tii eene em anere aan kekukt, oone wise fon weem eyer am xpreche waar. ₂₃Neewich Yeesus hot eene fon tëne kesitst, woo Yeesus keliipt hot. ₂₄Simon Pheeter hot tëm en sinaal kemach un saat:

— Froo mool fon weem te Mayster am xpreche is.

₂₅Tan, is tee tisipel tichter pay Yeesus khom um hot kefroot:

— Hër, weyer is tee?

₂₆Yeesus hot keantwort:

— Is tee weem ich en xtik proot kewe woo in soos kethunkt kep waar!

Klaych tëm noo hot eyer en xtik proot kehool, in ti soos kethunkt un hot tas fer Yuutas kep, soon fon Simon Iskariotes. ₂₇Un soo wii Yuutas tas proot kenom hot, is Satanaas in tëm rin kang. Tan saat Yeesus tëm:

— Was tuu se tuun host, mach tas klaych.

₂₈Khee eene fon tëne woo am tix kesetst hon hot ferxtan warom Yeesus tas kesaat hat. ₂₉Yuutas hot imer ti thax fom kelt uf kepast, tesweche hon phaar ketënkt tas Yeesus em kexikt het tas tee etwas khaafe solt fer es fest ore en hilef fer ti aarme layt kewe.

₃₀Yuutas hot es proot kenom un is klaych aus kang. Un es waar nacht.

₃₁Wii Yuutas raus kang is, hot Yeesus kesaat:

— Yets kept ti kloor fom Soon fom Man reweleyert, un torich tëm kept aach ti kloor fon Hërkot reweleyert. ₃₂Un, wën torich tëm ti kloor fon Hërkot reweleyert kept, tan wërt Hërkot in sich selepst ti kloor fom Soon fom Man reweleere. Un Hërkot tuut tas kraat yets mache. ₃₃Mayn khiner, ich playwe nime fiil tsayt pay aych. Teyer wërt mich suuche, awer ich saan yets was ich xon saat fer ti yute fiirer: teyer khënt net hiin uf tas plats woo ich hiin keen. ₃₄Ich kewe aych tee naye kepoot: liipt ëne em anere. Soo wii ich aych keliipt hon, liipt aach ëne em anere. ₃₅Wën teyer liipe het ëne tsum anere, wëre al se wise kriin tas teyer mayn tisiple sayt.

₃₆Simon Pheeter hot fer Yeesus kefroot:

— Hër, woo keest tuu hiin?

Yeesus hot keantwort:

— Tuu khanst net yets hiin keen uf tas plats woo ich hiin keen. Eene taach khanst tuu meyer noo keen.

₃₇Pheeter hot noch mool kefroot:

— Hër, warom khan ich teyer net yets noo keen? Ich sin fërtich fer se xtërwe weche tich!

₃₈Yeesus hot kefroot:

— Wërklich? Ich fersichere es teyer tas tas woer is: eep te haan kreye tuut, saast tuu tray mool tas tuu mich net khënst.