Phaulus in Masetoonia un Akaya
1Wan te tumult aus waar, hot Phaulus ti priiter ruufe kelos un hot mit tëne kexproch fer se uf muute. Tan hot eyer apxiit kemach un is noo te prowins Masetoonia kang. 2Tee is torich ti rechioone kang, ti kriste am uf muute mit sayn mensaaje. Too is eyer an ti prowins Akaya aan khom, 3woo eyer tray moonate keplip is. Wii eyer xon fërtich waar fer pis an ti prowins Siiria keen, hot eyer se wisee kriit tas ti yute pleen am mache waare keeche iim. Tan hot eyer resolweyert tsurik keen torich Masetoonia. 4Uf tee rees, sin tii layt mit tëm kang: Sopater, soon fon Piroo, fon te xtat Perëa; Aristarko un Sekuntus, fon Tesaloonika; Kayo, fon Dërbe; Timoteo un aach Tikikus un Trofimus, woo fon te prowins Aasia waare. 5Ti sin foer kang un hon uns an te xtat Troas kewaart. 6Noo em Fest fom Proot oone Heep, sin meyer ap kang fon te xtat Filipus. Finef taache truf hon meyer uns in te xtat Troas ketrof un sin een woch too keplip.
Phaulus in Troas
7Samstachs ooments, hon meyer uns fersamelt mit te priiter fer tas proot se teele. Phaulus hot uf tee fersamlung kexproch pis halep nacht, wayl eyer teet am anere taach sich uf rees mache. 8Waare fiil lampe aankextoch kep in te xtup woo meyer fersamelt waare, woo im trite xtok fom haus waar. 9En puup Eutikus kenënt hot an en fërnster kesetst. Un, wii Phaulus lang tsayt wayter am xpreche waar, hot tee xloof kriit. Uf mool is eyer inkexloof un is aus em fërnster kefal. Wii se em uf kerof hon, waar eyer toot kewees. 10Tan is Phaulus runer kang, hot sich niter kepikt, hot te puup umkeaaremt un saat:
— Ferxrekt net, wayl tee is leewent.
11Tëm noo is Phaulus noch mool ruf kang, hot es proote keteelt un hot es kes. Hot noch fiil tsayt kexproch, pis moynts, un tëm noo is eyer fort kang. 12Un too hon se te puup, leewent, hëm kenom, un tas hot se kans uf kemuut kelos.
Fon Troas pis Miletus
13Meyer sin foer kang un sin uf en poot kextii woo uns pis an te poot hoof fon Asoos kenom hot, woo meyer solte Phaulus ap waarte. Tee hot kexikt tas soo mache, wayl eyer wolt tsu fuus pis tort hiin keen. 14Wan eyer sich mit uns ketrof hot in Asoos, hon meyer em ap kehool am poot un sin pis ti xtat Mitileene kang. 15Tan sin meyer fon too fort kang un, am neekste taach, sin mer tich an te insel Kios langst kang. Am anere taach waare meyer xon an te insel Samos un en taach truf sin meyer am poot hoof fon Miletus aan khom. 16Phaulus hot resolweyert kehat net xtil hale in te xtat Ëfesus fer net lang tsayt in te prowins Aasia playwe. Tee hat es aylich kehat, wayl eyer wolt in Yeruusalëm aankhome, wën meechlich, foer em Phingste Taach.
Phaulus sayn mensaaj
17In Miletus hot Phaulus ti eltste fon te khërich ruufe kexikt fer mit iim sich trefe. 18Wii se aankhom sin, saat Phaulus:
— Teyer wist wii ich ti tsayt rom keprung hon ti kans tsayt woo meyer paysamer waare, tsayt am eyerxte taach woo ich in te prowins fon Aasia aan khom sin. 19Ich hon mayn aarwat kemach als em Hër sayne tiiner, mit humilteet un mit treene. Un tas, unich xwiiriche tsayte woo ich hat, weche te yute woo sich kesamelt hate keeche mich. 20Teyer wist aach tas ich tas ales kemach hon fer aych se helfe, te ewankeelium am aan saan un am unterichte in puplikum un in te hayser. 21Ich saat mit sicherheet fer ti yute un fer tii woo khee yute sin tas se miste sich roye fon sayn sinte, tsurik noo Kot keen un an unser Hër Yeesus klaawe. 22Yets keen ich noo Yeruusalëm, te Hayliche Kayst am aan heere, oone se wise was mich tort paseere tuut. 23Ich wees ploos tas in ale xtet te Hayliche Kayst mich awiseyert hot tas kefangnise un layte mich am waarte sin. 24Awer, ich kewe khee weyert fer mayn aychne leewe. Tas importante is tas ich mayn misioon kompleteere mus un ti aarwat woo te Hër Yeesus mich kep hot fer se mache. Un ti misioon is tii: ti kuute naychkheete aan saan fom Hërkot sayne knaate.
25— Ich waar unich aych, te Kotes Raych am aan saan, un yets wees ich tas teyer mich net mee siin tuut. 26Tesweche, mit kans sicher saan ich hayt tas, wën yemant fon aych sich ferleere tuut, sin ich net responsaawel. 27Also, ich hon aych te Hërkots plaan kans aan kesaat. 28Past aych selepst uf un te kanse krupe woo te Hayliche Kayst ap kep hot uf ayer khost, wii pastoore fon Hërkot sayn Khërich, woo Eyer khaaft hot torich sayn aychne pluut. 29Wayl ich wees tas, noo mayne auskang, khome peese wolfe unich aych un tii tuun te xoofe trop net petaure. 30Un khomt ti tsayt woo phaar fon aych liye fertseele, fer fersuuche ti priiter uf tëne sayn sayt hiin xlepe. 31Soo, playpt am wache un erinert aych tas iwer tray yoore, taache un nacht, hon ich, am prile, net uf keheyert yeete ëne fon aych se lërne.
32— Un yets, kewe ich aych ap tas Hërkot aych uf past un fer tëm sayn knaatich wort. Wayl Eyer khan aych helfe kaystlich noo foran keen un khan aych ti seechne kewe woo Eyer fer sayn kans folek uf heept. 33Ich hon net mool silwer, net mool kolt, net mool nimant sayn tsaych pekeert. 34Kraat es keeche teel, teyer wist tas ich kexaft hon mit mayn aychne hënt un hon pay kriit ales was ich un mayn aarwats khameraate kepraucht hon. 35In ales hon ich aych ketsaycht tas es is soo am xafe woo mer helfe khëne tii woo es neetich hon. Tënkt am Hër Yeesus sayn wërter: “Is kliklicher tee woo kept als tee woo was kriit.”
36Wii Phaulus fërtich waar mit xpreche, hot eyer sich kekniit mit sayn priiter un hot kepeet. 37Tan hon se al aarich fiil keprilt un hon Phaulus umkeaarmt un hon em kekhust. 38Ti waare traurich, ekstra wayl tee hat tëne kesaat kehat tas nii mee teere se iim se siin kriin. Tan sin se mit em kang pis an te poot.
