Akte 19

₁Soo lang wii Apolus in te xtat Korintus waar, is Phaulus torich tas inerlant fon te prowins Aasia kereest un an Ëfesus aan khom. Too hot eyer phaar tisiple aan ketrof ₂un hot kefroot:

— Wan teyer keklaapt hot, het teyer aach te Hayliche Kayst fon Hërkot kriit?

Tii hon keantwort:

— Meyer wuste kaarnet tas es en Hayliche Kayst kept.

₃Phaulus hot kefroot:

— Tan was fer sort taaf het teyer kriit?

Tii hon keantwort:

— Yohan Te Taafer sayne taaf!

₄Tan saat Phaulus:

— Yohan hot ketaaft tii woo sich keroyert hon fon sayn sinte. Un saat aach fer tas folek fon Israël tas se klaawe miste an tëm woo noo iim khome teet, tas mënt, an Yeesus.

₅Noo tas tii tas ales keheyert hon, sin tii layt ketaaft kep im Hër Yeesus sayne naame. ₆Tan hot Phaulus tëne ti hënt iwer kehal, un te Hayliche Kayst is iwer se khom. Tan hon se aankefang in frëmte xprooche se xpreche un aach em Hërkot sayn mensaaj aan saan. ₇Tii mëner waare unkefeyer tswelef.

₈Iwer tray moonate is Phaulus in ti sinakook kang un hot mit koraaj kexproch fer tas folek. Tee hot mit tëne fertseelt un hot fersuucht mit sicherheet xpreche tas se klaawe solte an Hërkots Raych. ₉Awer phaar waare tik khopich, hon net keklaapt, un foer te kanse layt, hon se noch xlecht kexproch fom Hër sayne Weech. Tan hot Phaulus ti sinakook tsurik kelos, hot ti kriste mit kenom, un hot aankefang se xpreche in te xuul fon en man Tiranus kenënt. ₁₀Phaulus hot tas iwer tswaay yoer lang kemach, pis ale pewooner fon te prowins Aasia, soo fiil ti yute soo wii ti woo khee yute waare, em Hër sayn mensaaj aan keheyert hate.

₁₁Hërkot hot kroos aartiche wunere kemach torich Phaulus, ₁₂soo tas ti layt thaxe ticher un xërtse kehool hon woo tee penutst hat un fer ti kranke hiin kenom tas se traan thupe khënte. Un, wën se tas kemach hon, sin se keheelt kep; un fon anere layt sin ti xlechte kayste raus kang. ₁₃Phaar yute woo fon een plats tsum anere ketsoo sin, xlechte kayste fort am yaae, wolte aach em Hër sayne naame penutse fer tas se mache, tëne am saan:

— Torich ti macht fon Yeesus sayne naame, tee selwiche woo Phaulus aan saat, xike ich tas teyer raus keet!

₁₄Ti mëner woo tas kemach hon waare siwe puuwe fon en yut Seewa kenënt, woo en Hooche Priister waar. ₁₅Awer, selich mool, saat en xlechte kayst fer iine:

— Ich khëne Yeesus un wees weyer Phaulus is. Awer, weyer sayt teyer?

₁₆Tan hot te man woo tomineyert waar fom xlechte kayst tëne atakeyert un hot se ferxlaa mit soo en kewalt, tas se aus keris sin fon tëm haus, kans wee un mit sayn tsaych kans feris. ₁₇Un al tii woo in Ëfesus kewoont hon, yute un tii woo khee yute sin, hon tas se wise kriit. Ti hon fiil pang kriit, un em Hër Yeesus sayne naame is noch mee rexpekteyert kep. ₁₈Tan sin fiil fon tëne woo keklaapt hon khom un hon foer te layt kesaat tas xlecht tings woo se kemach hate. ₁₉Un fiil fon tëne woo hekseray praktisiert hate hon sayn picher kesamelt un hon se keprung fer se ferprëne foer te kanse layt. Wan se te weyert fon te picher woo ferprënt kep sin kerechent hon, is te total an fuftsich tausent silwerne nikle khom. ₂₀Soo, mit kroos macht, is em Hër sayn mensaaj aan kesaat kep un hot sich imer mee ferprayt.

₂₁Noo tëm ales was paseyert waar, hot Phaulus resolweyert torich ti prowinse fon Masetoonia un Akaya keen un pis Yeruusalëm keen. Eyer saat:

— Noo te pesuuch fer Yeruusalëm, mus ich noo Room keen.

₂₂Tan hot Phaulus tswaay fon sayn hilfer, Timoteo un Erastus, no Masetoonia kexikt, awer eyer is noch en tsayt in te prowins Aasia keplip.

₂₃In tee keleechenheet is en kroos unortnung in Ëfesus paseyert weche em Hër sayne Weech. ₂₄En silwer xmit, Demëtrius kenënt, hot kleene motele fon silwer kemach fom thëmpel fon te kotin Diana, un sayn kexeft hot fiil kelt kep fer tii woo mit iim kexaft hon. ₂₅Tan hot eyer ti aarwater samer keruuf un anere woo tas selwiche kemach hon un saat:

— Mayn froynte, teyer wist tas unser raychtum fon tee aarwat khomt. ₂₆Teyer selepst khënt siin un heere was tee Phaulus am mache is. Tee fersichert tas kote fon mënxliche hënt kemach khee wërkliche kote sin. Un is fiil layt am rom xpreche, in te kans keechent un iwer neekst ti kans prowins Aasia. ₂₇Soo sin meyer in kefoer tas es folek unser kexeft net mee hon wil. Un is net ploos tas. Es kep noch te kefoer tas te thëmpel fon te kroos kotin Diana niks mee weyert is. Un too is aach te kefoer tas ti kroosheet fon tee kotin woo in te kans Aasia un uf te kans welt atoreyert kept fernicht wërt.

₂₈Wan ti layt tas keheyert hon, sin se wuutich kep un hot aankefang se xraaye:

— Lank leewe fer ti kroos Diana fon Ëfesus!

₂₉Un ti unortnung hot sich in te kans xtat ferxtraut. Tas folek hot Kaio un Aristarkus kekrif, tswaay masetoonye woo mit Phaulus am reese waare, un hot se pis an te theaater kexlept. ₃₀Phaulus wolt fer tas folek xpreche, awer ti priiter hon net kelos. ₃₁Phaar autoriteete fon te prowins, woo Phaulus sayn froynte waare, hon tëm en orte kexikt, am ferlange tas eyer net pis an te theaater keen solt. ₃₂In tee tsayt waar tas folek woo im theaater waar in komplet unortnung. Phaar hon etwas kexraayt, anere hon was aneres kexraayt, wayl ti meyerxte wuste kaar net warom se sich fersamelt hate. ₃₃Phaar layt hon ketënkt Aleksanter weyer te xulner, wayl ti yute hon en ketswung fone hiin keen un tort playwe. Tan hot Aleksanter en sinaal kemach mit te hant un fersuucht se xpreche fer sich tefenteere foer em folek. ₃₄Awer wan se kemërekt hon tas tee en yut waar, hon se al mitsamer tas selwiche tings kexraayt iwer tswaay xtun lang:

— Lank leewe fer ti kroos Diana fon Ëfesus!

₃₅Entlichmool khont te sekreteyer fon te xtat tas folek peruiche. Eyer saat tëne:

— Pewooner fon Ëfesus! Teyer al wist tas unser xtat te thëmpel fon Diana un te xteen woo fom himel kefal is uf pase tuut. ₃₆Khee mënx tuut tas ap saan. Soo, peruicht aych un macht niks oone aych kuut petënke. ₃₇Teyer het tii mëner heyer keprung, awer tii hon te thëmpel net iwerfal, net mool unser kotin pelayticht. ₃₈Wën Demëtrius un sayn hilfer etwas keeche yemant se saan hon, khan sayn klaache am kericht presenteere, wayl tesweche paseere ti fersamlunge uf aankesaate taache un es kept ti kowerneyer. ₃₉Awer, wën teyer sonst noch etwas wolt hon, kept tas uf te foleks fersamlung erklëërt, woo samer keruuf kept tëm noo ti kesets. ₄₀Wayl tas was hayt paseyert is khan uns laycht als repelioon aan kesaat kewe. Is khee uersach fer soo en kroos unortnung. Un meyer khëne tas ales net justifikeere.

₄₁Noo tëne wërter, hot eyer xlus kemach mit te fersamlung.