Zacarias 5

₁Ha'e gui teĩgue ju ama'ẽ vy aexa peteĩ kuaxia oveve-veve rã.

— Mba'e nunga tu rexa?

Xee ambovai:

— Peteĩ kuaxia oveve va'e rima aexa — ha'e. Ha'e va'e puku-a ma dez metros, ha'e rã ipya ma irundy raxa'i.

₃Ha'e ramo xevy pe anjo aipoe'i:

— Peva'e ma ayvu vai mbouarã yvy jave rupi oo va'e. Mba'eta peva'e ayvu vai rami vy imonda va'e ha'e oura rive va'e omoxẽmbaa 'rã.

₅Ha'e gui anjo xee reve ijayvu va'e ou jevy vy aipoe'i xevy:

— Aỹ ma yvate katy ju ema'ẽ rexa aguã mba'emo ou oiny va'e.

₆Xee aporandu:

— Mba'e tu peva'e nunga?

Xembovai:

— Ha'e va'e ou jekuaa va'e ma peteĩ ajaka. Ha'e va'e py ma oĩ yvy jave rupigua kuery reko vaia — he'i.

₇Ha'e gui ajaka juru mbotya chumbo guigua oipe'aa ramo peteĩ kunha va'e oguapy oiny ra'e ajaka py.

— Peva'e ma teko vai — he'i vyve ajakapy py ju kunha va'e omoanha vy omboty ju chumbo guigua ipoyi ete va'e py.

₉Ha'e gui teĩgue ju ama'ẽ vy aexa mokoĩ kunhague jogueru nhoguenoiny rã. Guyra guaxu rami ipepo va'e vy ipepo rupi yvytu oipeju reve ou. Ha'e va'e kuery ma ajaka oupi heravy yvy gui yvatevea peve.

₁₀Ha'e gui xee aporandu anjo xereve ijayvu va'e pe:

— Marã katy tu ha'e kuery ogueraa 'rã ajaka?

₁₁Ombovai:

— Sinar yvy katy rima ogueraa, kunha va'e rorã ojapo aguã py. Ha'e gui ojapopa ma vy omoĩ 'rã ha'e py, henda py ae — he'i.