Ime ijayvuague
1Xereindy xerembireko, xee aike ma xeyvotyty py.
Xee amono'õ ma mirra heakuã porã va'e reve.
Ha'u ma ei hetã revegua,
ha'e ay'u ma vinho kamby reve.
Xeirũ kuery, pekaru ha'e pey'u.
Pey'u ndapey'uxevei peve, xerembiayvu kuery.
Ta'yxy ijayvuague
2Xee ake teĩ xekuraxõ ma ndokei.
Aendu xerembiayvu okẽ re ombota nhendu reve aipoe'i rã:
Ime ijayvuague
“Xereindy xerembiayvu, eipe'a na.
Xerymba apykaxu, ndevaikuea oĩ e'ỹ va'e.
Mba'eta xeakã inhakỹmba yvyxĩ rayvi gui,
xe'a yxapypa ma”, he'i.
Ta'yxy ijayvuague
3Ha'e gui xee ma amboipa ma xeao puku.
Amoĩ ju 'rã nda'u?
Ha'e xepy voi ajoipa ma,
teĩ amongy'a ju 'rã nda'u?
4Peteĩ yvyra pa'ũ oĩ va'e rupi xerembiayvu opoko rã
xekuraxõ omyĩmba ayvu vaipa rã.
5Ha'e rami vy avy okẽ aipe'a aguã xerembiayvu pe.
Xepo gui mirra amoeakuãague otyky rei oiny,
xekuã gui voi okẽ pe'aa áry otyky ajopy rã.
6Xerembiayvu pe aipe'a va'eri ojepe'a ju ma, oo ma ra'e.
Ha'e rami rã xenhe'ẽ py xekangypa ijayvu rire.
Aeka avy teĩ ndajoui, ha'e aenoĩ aikovy teĩ naxembovai.
7Tetã rarõa kuery xerovaexĩ tetã re onhangarekoa rupi.
Ha'e rami vy xepetepa vy xembojexavai.
Ha'e gui tetã kora rarõa kuery ju omboi xeao puku.
8Jerusalém memby kuery, ajerure pẽvy.
Xerembiayvu pexa vy mba'e pa pendeayvu 'rã ixupe?
Pemombe'u xee amano ta maa ayvu vaipa vy.
Irũ kuery ijayvuague
9Ha'e gui ndee pavẽ kunhague gui neporãve va'e,
mba'e py tu nerembiayvu amboae kuery gui ha'eveve?
Mba'e tu nerembiayvu amboae kuery gui iporãve va'e oguereko,
ha'e rami aguã re orevy rejerure aguã?
Ta'yxy ijayvuague
10Xerembiayvu ma xiĩ pytã rei,
ha'e ma dez mil ikuai va'e gui teĩ omboetevepy.
11Inhakã ma ouro oiky'a'o porã mbyre rami.
Hi'a ma guapytã xã ha'e xapirẽ rague rami huũ va'e.
12Hexa ma apykaxu yakã rembe re ikuai va'e rexa rami.
Kamby py omoxiĩ ha'e ombojegua pyre rami hexa.
13Hova ma yvyra bálsamo ty rami heakuã va'e,
ha'e yvyra rogue heakuã porã va'e omboaty pyre rami.
Hembe ma yvoty gui mirra iporãve va'e otykya rami.
14Ijyva ma ouro guigua aygue ita porãgueve oĩa rami.
Iku'a ma marfim xiĩ va'e ita safira py ombojegua pyre rami.
15Hetyma ma ita mármore guigua yta ouro ete áry omo'ã mbyre rami.
Yvatea ma Líbano yvyty rami, yvyra yvate va'e rami ete.
16Ijayvua ma he'ẽ porã va'e rami.
Ha'e ma opa mba'e py xembovy'a.
Ha'e rami rima xerembiayvu oiko.
Ha'e rami xeme, Jerusalém memby kuery.
