Salmo 65

₁Oreruete, ndere rojeroviaa rupi rogueroporaei 'rã Sião tetã py!

Ndevy pe rojapo 'rã ronhemboayvuague.

₂Ronhembo'ea rendu va'e,

ndea py ou 'rã opa marãgua avakue

₃gueko vaiague re ndovy'ai vy.

Rojejavyague orere ipo'aka ramo

ndee rembogue 'rã.

₄Ovy'a ete 'rã ndejeupe guarã reiporavo va'ekue.

Ha'e va'e kuery onhemboja 'rã ndere, nderoka py ikuai aguã.

Ha'e ramo rovy'a vaipa 'rã ndero py oremboaxya rexa uka va'e re,

ndevygua templo iky'a e'ỹ va'e py.

₅Oreruete orereraa jepea, ndeguigua teko porã re rojapukai ramo

ndee orembovai 'rã nhomondyipaarã rejapo vy.

Yvy apy re ikuai va'e ha'e ye'ẽ mombyryve oĩ va'e rupigua

ndee anho nerarõ okuapy.

₆Nembaraetea rupi vy remombyta porã raka'e yvyty,

ndepo'akaa py renhemonde reve.

₇Ye'ẽ revovo onhendu ramo remombytu'u ju,

yai opu'ã-pu'ã va'e revovo,

yvy regua kuery revovo guive.

₈Ha'e ramo hexa pyrã rejapo va'e

yvy apy re ikuai va'e oexa vy onhemondyipa 'rã okuapy.

Kuaray oua katy gui ha'e oikea katy gui ou va'e

rejapo 'rã ovy'a reve oporaei okuapy aguã rami.

₉Yvy re reikuaa pota vy remoakỹ 'rã,

remoingo porã ete 'rã.

Yakã'i Nhanderuete pegua typy porã meme 'rã.

Mba'emo ra'yĩ oiko porã 'rã,

ha'e rami aguã rami remoingo rire.

₁₀Ha'e rami vy remoakỹ 'rã yvy roikaraĩague rupi,

rembojojapa 'rã yvy'ã ikuai va'e.

Oky rayvi py remoakỹ

ronhotỹ va'ekue remoingo porã vy.

₁₁Ma'etỹa opaa py rexa uka 'rã ndeporayvua coroa rami iporã va'e.

Repyrõague rupi reja 'rã yvy moingo porãarã,

₁₂teko e'ỹa rupi jai rogue ikuai va'e re guive.

Yvy'ã ikuai va'e voi ovy'a 'rã.

₁₃Mymba heta 'rã ikuai nhuũndy rupi,

ha'e yvy'ã guy rupi ma hary anho 'rã ikuai.

Ha'e nunga ha'e javi ovy'a vy oporaei 'rã okuapy.