Salmo 39

₁Xejeupe ae aipoa'e va'ekue: “Aỹ aiko kuaa pota 'rã

xeayvu py ajejavy e'ỹ aguã.

Amboty 'rã xejuru,

heko vai va'e xerenonde ikuai jave” ha'e va'ekue.

₂Ha'e rami vy akyrirĩ, neĩ iporã va'e rupi voi ndaxeayvuvei.

Ha'e rami teĩ haxy aenduve tema.

₃Xepy'a re aendu tata rami hendy va'e.

Ha'e aikuaa pota rã hendyve ovy.

Ha'e ramo xee anhemombe'u vy aipoa'e:

₄“ Senhor, eikuaa uka ndaikovei aguã ára,

ha'e mbovy ára ete'i ma 'rã pa aiko,

xemarãa aikuaa aguã.

₅Ndee aikoa ára reme'ẽ va'ekue mokoĩ, mboapy po puku-a'i rami ipuku aguã.

Nerenonde aikoa opa rive va'erã.

Anhetẽ ae avakue ha'e javi oĩ atãve va'ekue teĩ mba'e e'ỹ meme ikuai.

₆Ha'e rami ae avakue oaxa 'rã ovy kuaray'ã rami.

Heko eta reia mba'everã ndovarei.

Ojeupe guarã opa marãgua omoĩ porã teĩ ndoikuaai guive mava'e 'rã pa ogueraa.

₇Ha'vy xee, Senhor, mba'e tu xee arõ?

Ndee ae xee roarõ va'e.

₈Xereraa jepe ke xereko vaiague ha'e javi gui.

Xembojaru uka eme heko vai va'e pe.

₉Akyrirĩ ha'e ndaxeayvui va'ekue

ndee ae ha'e rami xemoingo ramo.

₁₀Eipe'a ke xegui ndee xemoingo axya.

Ndepo ipoyi ramo akanhy ma avy.

₁₁Avakue ojejavypaague re ndeayvu ete ha'e rembopaga vy

rembovaipa 'rã ha'e kuery oguerovy'a va'ekue, vixo'i mba'emo ho'upaa rami.

Avakue ikuai va'e ma opa rive va'erã meme.

₁₂Senhor, endu ke ajerurea.

Xerepy aguã re ajapukai ramo ejapyxaka.

Ekyrirĩ eme xerexay rã rexa vy,

mba'eta nerenonde ma mombyry guigua rami rive aiko,

oguata rei va'e aiko xeru kuery ikuaiague rami avi.

₁₃Eikuaa potave eme xere,

akanhy avy e'ỹ re avy'a ju aguã.”