“Peikuaa pota Senhor porayvua re”, he'ia
Abimeleque renonde Davi inhakã porã e'ỹa rami onhemoingo ramo omoxẽ jave oo vy mboraeirã ombopara va'ekue (1 Samuel 21.10-15).
1Ára nhavõ xema'endu'a porã 'rã Senhor re.
Ixupe aporaei riae 'rã.
2Xenhe'ẽ py voi aporaei 'rã Senhor pe.
Ha'e ramo yvyĩgue'i oendu vy ovy'a 'rã.
3Pemboete ke Senhor xereve,
peteĩ rami jarovy'a hery.
4Senhor pe ajapukai ramo xere opena karamboae.
Xereraa jepe guive akyjea ha'e javi gui.
5Pema'ẽ hexe, ha'e ramo penemoexakã 'rã.
Pendere noĩvei 'rã pexĩmbaa.
6Xee ajexavai vy ajapukaia Senhor oendu vy
xereraa jepe karamboae opa mba'e py aiko axya gui.
7Senhor renonde ojererokyjea rupi ikuai va'e yvýry ma
ixuguigua anjo oiko ogueraa jepe aguã.
8Peikuaa pota pexa aguã Senhor porayvua.
Ovy'a ete 'rã hexe onhemi va'e kuery.
9Senhor rembiporavo pendekuai va'e, pendekuai henonde pejererokyjea rupi,
mba'eta ha'e rami ikuai va'e pe ndoatai 'rã mba'eve rei.
10Guary ra'y kue'iry ojexavai ha'e oendu 'rã karuai.
Ha'e rã Senhor oeka va'e pe ma mba'emo porã ndoatai.
11Xera'y kuery, peju ke, pejapyxaka xeayvu re.
Xee rombo'e 'rã Senhor renonde pejererokyjea rupi peiko aguã re.
12Peẽ kuery tu pendekove reve peikoxe
ha'e peikove pukuxe, iporã va'e rupi pevy'a aguã?
13Ha'e rami ri vy pejoko peneapekũ mba'emo vaia rupi pendeayvua gui,
pendejuru guive pejoko apu gui.
14Pejepe'a mba'emo vai gui, iporã va'e rupi anho peiko.
Peka peteĩ rami pendekuai aguã, penhea'ã ha'e rami aguã re ae.
15Heko porã va'e re Senhor oma'ẽ 'rã oiny,
ojapyxaka oendu aguã ojapukaia.
16Ha'e rã mba'emo vai apoa ma Senhor ndoexaxei,
yvy gui omboguepa 'rã ha'e kuery re ima'endu'aa.
17Ha'e rã heko porã va'e ojapukai ramo ma Senhor oendu 'rã,
ogueraa jepe 'rã oiko axya ha'e javi gui.
18Senhor nonhemombyryi 'rã opy'a py nda'evei va'ea gui,
ogueraa jepe 'rã onhe'ẽ py ojexavai va'e.
19Mbovykue rei e'ỹ 'rã oiko heko porã va'e ojexavai aguã.
Ha'e rami teĩ Senhor ogueraa jepe 'rã ha'e nunga ha'e javi gui.
20Opena 'rã ikãgue ha'e javi re,
neĩ peteĩ ma nomopẽ ukai 'rã.
21Teko vai ae ojuka 'rã heko vai va'e.
Heko porã va'e ndoayvui va'e kuery ombopagaa 'rã.
22Ha'e rã guembiguai kuery rekove ma Senhor oepy 'rã.
Hexe ojerovia va'e regua peteĩve nombopagaai 'rã.
