Salmo 20

₁Rejexavaia ára tove Senhor tanembovai.

Jacó Ruete rery tandereraa jepe reĩ atã aguã py.

₂Tombou nderepyarã guenda iky'a e'ỹ va'e gui.

Sião gui ma voi topena ndere.

₃Ta'ima'endu'a ixupe guarã reme'ẽ va'e ha'e javi re,

tojou porã mba'emo ixupe reapy rã.

₄Tome'ẽmba ndepy'a re reipotaa oĩ va'e,

tojapopa rejapoxe va'e ha'e javi.

₅Ha'e gui ma ndepo'aka ramo ore kuery rovy'a 'rã mboraei rupi,

Nhanderuete rery rupi roupi 'rã imoiny bandeira.

Ixupe Senhor tomoingo renhemboayvua ha'e javi.

₆Aỹ ma xee aikuaa Senhor ogueraa jepe 'rãa huvixarã omoĩ va'ekue.

Ombovai 'rã o'amba iky'a e'ỹ va'e gui,

ha'e rami vy opo py oexa uka 'rã opo'akaa.

₇Amongue ma ojerovia 'rã mba'eyru re,

amboae kuery ma kavaju re 'rã ojerovia.

Ha'e rã nhande kuery ma Senhor Nhanderuete rery anho jarovy'a.

₈Ha'e kuery ma ojero'a vy ho'apa 'rã.

Ha'e rã nhande kuery ma nhapu'ã 'rã jakuapy.

₉Senhor, embopo'aka ke oreruvixave.

Rojapukai ramo orembovai.