Salmo 18

₁Senhor xemombaraetea, xee roayvu.

₂Senhor, ndee ma xe'itaova.

Ndee ma oo ikorapa va'e ha'e xerepya.

Xeruete ma xe'itaova anhemiaty,

mba'emo vai jokoa, xereraa jepea imbaraete va'e ha'e oo imbaraete ete va'e.

₃Senhor ogueroporaeipy va'e pe xee ajapukai vy

aa jepe kuery 'rã xerovaigua kuery po gui.

₄Nhuã manoa regua xejura va'ekue,

yai rami heko vai va'e xere opu'ã vy xemongyje.

₅Manoa pygua xejokua,

nhuã xã xejura xapy'a.

₆Ha'e ramo ajexavaia py ajapukai karamboae Senhor pe.

Xeruete pe ajapukai xereraa jepe aguã.

Ha'e rã oĩaty templo gui oendu xeayvua,

ijapyxa peve ajapukaia ovaẽ ramo.

₇Ha'e ramo yvy omyĩ ha'e oryryi.

Yvyty yta ikuai va'e voi ovavapa, oryryipa,

Senhor ogueropoxy ramo.

₈Inhapyĩgua gui opu'ã hataxĩ,

ijuru gui ma tata nhomombaarã oẽ,

tapyĩ hexakã va'e avi.

₉Yva omo'yvyĩ'i vy oguejy,

ipy guýry pytũ vaikue oĩ reve.

₁₀Anjo ipepo va'e áry oĩ vy oveve ouvy,

yvytu opepo áry ou pojava.

₁₁Pytũ gui ojapo onheovã aguã.

Ha'e va'e ojee omoĩ ouvy.

Yy ha'e arai pytũ va'e hoo rami oĩ.

₁₂Hexakã henonde oo va'e gui ma arai ivaipa,

amandau ha'e tapyĩ hexakã va'e ho'a.

₁₃Ha'e gui ma Senhor yapu yva re.

Yvate ete va'e ijayvu atã ramo

ho'a amandau ha'e tapyĩ hexakã va'e.

₁₄Ngu'y omombo vy omoaĩmba xerovaigua kuery.

Overa vy omondyipa.

₁₅Ha'e ramo ojekuaa yy rupa peve,

yvy yta avi ojekuaapa,

ndeayvu atãa py Senhor,

ndepoxya rupi neapyĩgua gui nepytuẽ ramo.

₁₆Yvate gui Senhor okuave'ẽ vy xerupity,

xerenoẽ yy tuvixa va'e gui.

₁₇Xereraa jepe xerovaigua kuery imbaraete va'e gui,

xemomboriau rei va'e kuery gui ae,

xegui ipo'akave ete va'ekue ri.

₁₈Ha'e kuery ma ajexavai jave opu'ãmba rei va'ekue xere,

teĩ Senhor onhemoĩ xepytyvõarã.

₁₉Ha'e rami vy xereru peteĩ henda ipa'ũ ja'eavea py.

Xererovy'a vy xereraa jepe.

₂₀Xereko porãa rekovia Senhor ome'ẽ iporã va'e,

xevy ome'ẽ ndaxepo ky'aia repy.

₂₁Mba'eta xee ma Senhor guigua tape rupi anho aiko va'e,

Xeruete gui ndajepe'ai guive ha'eve'ỹa rami aiko aguã.

₂₂Xejee amoĩ ijayvuague ha'e javi,

xejegui ndaipe'ai ayvu omoĩ va'ekue.

₂₃Henonde aiko anhetẽ rupi,

ajejoko guive teko vai rupi aiko e'ỹ aguã.

₂₄Ha'e ramo xevy Senhor ome'ẽ xereko porãa repy,

henonde rupi ndaxereko ky'ai rire.

₂₅Heko porã va'e kuery pe rejekuaa uka 'rã heko porã va'e,

anhetẽ rupi ikuai va'e pe rejekuaa uka anhetẽ rupigua avi,

₂₆iky'a e'ỹ va'e pe rejekuaa uka iky'a e'ỹ va'e,

ha'e rã heko vai va'e pe ma rejekuaa uka 'rã nhombopaga kuaa va'e.

₂₇Mba'eta reraa jepe 'rã onhemo'yvyĩ'i va'e,

ha'e rã oma'ẽ vaikue reia rupi onhemboyvate va'e ma remomba 'rã.

₂₈Ndee rejapo xerata endy hexakãve aguã rami.

Pytũ rupi aikoa rupi ma ndee Senhor Xeruete remoexakãmba.

₂₉Ndereve vy amomba 'rã xondaro kuery,

Xeruete reve vy apo 'rã tetã kora áry rupi.

₃₀Nhanderuete guigua tape ma iky'a e'ỹ va'e,

Senhor ayvu ma oa'anga pyre.

Hexe onhemi va'e ha'e javi pe ma mba'emo vai jokoa oĩ.

₃₁Mava'e tu Nhanderuete oiko Senhor e'ỹ vy?

Mava'e tu nhande'itaova oiko Nhanderuete e'ỹ vy?

₃₂Xeruete xemombaraetea oiko,

omoatyrõ 'rã aguata aguã rupi.

₃₃Xepy ojapo 'rã guaxu rami inhakuã aguã.

Yvatea rupi aẽ teĩ xemoĩ atã.

₃₄Xepo pe voi ome'ẽ joe apu'ã kuaa aguã.

Ha'e ramo guyrapa overa va'e guigua teĩ xee aipira 'rã.

₃₅Mba'emo vai jokoarã reme'ẽ xereraa jepea,

reiporu kuaa regua xemoĩ atã,

xemboaxya rupi xemboyvate.

₃₆Apyrõ aguã tape rembopyve ramo

ndaxepyxyryi 'rã.

₃₇Xerovaigua kuery amonha 'rã aupitypa peve.

Ha'e gui amomba rire ajevy ju 'rã.

₃₈Amou'ũmba opu'ã aguã nda'evevei peve.

Xepy yvýry ho'apa.

₃₉Mba'eta ndee xemombaraete ajoguero'a kuaa aguã,

rejapo xere opu'ã va'ekue re xepo'aka aguã rami.

₄₀Xerovaigua kuery rejapo ojavapa aguã rami.

Xerayvu e'ỹ va'e amomba.

₄₁Guepyarã pe ha'e kuery ojapukai teĩ ndoepyai.

Senhor pe voi ha'e kuery ojapukai teĩ nombovai.

₄₂Ha'e ramo amongu'ipa yvy ku'i yvytu rupi ovevepa va'e rami,

yapo tape guiguare nhamomboa rami amokanhymba.

₄₃Heta va'e kuery xere opu'ã teĩ xereraa jepe,

xemoĩ yvy regua kuery ruvixarã.

Amboae regua kuery ndaexai va'ety voi xevygua ikuai.

₄₄Xeayvu oendu vyve xenhe'ẽ rendu okuapy.

Yvy mboae regua oexa uka xevy ikuaia,

₄₅amboae regua kuery okanhymba,

onhemiague gui oẽmba onhemondyipa vy.

₄₆Senhor ma oikove va'e, togueroayvu porãa xe'itaova!

Tomboetea Nhanderuete xereraa jepea!

₄₇Nhanderuete xerepy vy jojukapa,

heta va'e kuery re xembopo'aka.

₄₈Nhanderuete ae xereraa jepe xerovaigua kuery gui.

Ndee ma xemboyvate xerovaigua kuery áryve,

ha'e xerepy avakue jojuka va'ety po gui.

₄₉Ha'e ramo Senhor, roguerovy'a 'rã yvy regua kuery oendua py,

aporaei 'rã nderery rupi.

₅₀Ha'e ae ombopo'aka 'rã huvixaverã omoĩ va'ekue,

oexa uka 'rã guembiporavo oayvua,

Davi ha'e hamymino kuery pe, raka'e rã peve.