Salmo 132

₁Senhor, nema'endu'a ke Davi re,

opa mba'e py oiko axy ramo.

₂Senhor pe Davi onhemboayvu vy

Jacó “Ipo'akapa va'e” he'ia va'e pe ijayvu raka'e po rami:

₃“Xee ma akeaty py ndaikevei 'rã,

tupa anheno ajupyaty py ndajeupivei 'rã,

₄xerexa nambotyvei 'rã ake aguã,

neĩ peteĩgue'i nanhenovei 'rã xerexa amombytu'u aguã,

₅Senhor oĩ aguã ajou e'ỹa ja,

Jacó Ruete Ipo'akapa va'e oĩ atyrã”, he'i.

₆Nhaendu omombe'ua rã Efrata yvy re lei ryru oĩa,

ha'e ramo Jaar yvy re ae jajou.

₇Ha'e gui ma jaike ke oĩaty py.

Nhambojerovia ipy renda renonde.

₈Senhor, epu'ã ke, eike ejuvy repytu'u aguã py,

ndee ha'e hyru ndepo'akaa kuaa ukaa reve.

₉Ndevygua sacerdote kuery re toĩ teko porã,

ha'e ndevy ete ikuai va'e toporaei ovy'a vy.

₁₀Nerembiguai Davi re nema'endu'a vy

ema'ẽ e'ỹ eme nerembiporavo rova re.

₁₁Davi pe Senhor oura ete raka'e,

oayvuague gui ndaexarai 'rã guive. Aipoe'i:

“Nderekovia peteĩ ndero'o guigua ae

amoĩ 'rã tenda repenaaty py opena oiny aguã rami.

₁₂Xapy'a rei xereve guarã ajapo va'ekue ndera'y kuery ikuai ramo,

xeayvua re ambo'eague rupi guive,

ha'e ramo ha'e kuery ra'y kuery ju 'rã oguapy

tenda repenaaty py raka'e rã peve.”

₁₃Mba'eta Senhor oiporavo raka'e Sião tetã,

ha'e py oĩ riae aguã. Aipoe'i:

₁₄“Apy apytu'u riae 'rã raka'e rã peve,

apy ae 'rã apena ainy, aĩxea py ae.

₁₅Ha'e py anhomoingo porã 'rã tembi'u oata aguã rami e'ỹ ajou uka vy,

iporiaukue'i pe voi ame'ẽ reta 'rã tembi'u.

₁₆Ha'e pygua sacerdote kuery ma amonhemonde 'rã ajogueraa jepea kuaa ukaa py.

Ha'e pygua ojerovia va'e kuery ovy'a vy oporaei 'rã okuapy.

₁₇Ha'e py ajapo 'rã Davi po'akakue ojekuaa jevy aguã rami.

Xerembiporavo rekovia ambou 'rã nhomoexakãarã.

₁₈Hexe coroa oĩ va'e ma ipoty 'rã.

Ha'e rã hovaigua kuery re ma ambou 'rã imoxĩmbaarã.”