Salmo 103

₁Xenhe'ẽ, eroporaei ke Senhor.

Xere oĩ va'e ha'e javi togueroporaei hery iky'a e'ỹ va'e rupi!

₂Eroporaei Senhor, xenhe'ẽ,

nderexarai eme guive neĩ peteĩve xevy ojapo porãague re.

₃Mba'eta omboguepa ajejavyague,

xemonguera 'rã guive xemba'eaxy gui.

₄Xereraa jepe 'rã amano aguã gui,

ha'e xemboaxya ha'e xerayvua rupi xemoingo porã 'rã.

₅Xetuja'i teĩ xembovy'a 'rã opa mba'e porã py,

taguato rami xembopyau vy.

₆Senhor ha'evea rami joguereko vy

oikuaa pota 'rã ojexavai rei'i va'e re.

₇Moisés pe oikuaa uka raka'e ojeguigua tape,

Israel kuery pe oexa uka guembiapo.

₈Senhor ma nhomboaxya ha'e iporayvua rupi oiko va'e.

Ivai ma rei-rei 'rã e'ỹ, iporayvu vaipa guive.

₉Nhandevy nda'ijayvu ete riaei 'rã,

mboxy rupi riae ndoikoi 'rã.

₁₀Jajejavyague rami ete e'ỹ nhanembopaga,

nhandereko vaia rami e'ỹ nhanderereko.

₁₁Mba'eta yvy gui yva yvatevea rami avi

Senhor nhomboaxya voi yvate ete,

oexa uka 'rã henonde ojererokyjea rupi ikuai va'e pe.

₁₂Kuaray oẽa gui kuaray oikea mombyrya rami avi

jajejavyague oipe'a mombyry ete nhandegui.

₁₃Tuu kuery gua'y kue'iry omboaxya rami

Senhor voi omboaxy 'rã henonde ojererokyjea rupi ikuai va'e.

₁₄Mba'eta oikuaa mba'e nunga gui pa jaiko,

oikuaa ae ma yvy ku'i guigua rive jaikoa.

₁₅Ha'e rã avakue ma nhuũ rami avi hekove apu'a'i,

jai ipoty va'e rami rive 'rã ikuai.

₁₆Mba'eta yvytu oipeju ramo ipoty okanhymba 'rã.

Ha'e rire ikuaiague py teĩ ha'e kuery re na'ima'endu'aavei ma 'rã.

₁₇Ha'e rã Senhor ma jypy'i guive raka'e rã peve

omboaxy 'rã henonde ojererokyjea rupi ikuai va'e.

Gueko porãa oexa uka 'rã hamymino kuery raka'eve rãgua pe voi,

₁₈guexeve guarã ojapo va'ekue rupi ikuai va'e ha'e javi pe,

ojapo uka va'ekue ojapo ete aguã re ima'endu'a va'e kuery pe.

₁₉Senhor ma yva re omoĩ guenda opena atyrã.

Huvixave vy opa mba'e re ipo'aka va'e.

₂₀Ixupegua anjo kuery, peroporaei ke Senhor,

penembaraete ha'e pendepo'akapa va'e,

ojapo uka va'e pejapo, ha'e penhe'ẽ rendu va'e!

₂₁Ixondaro kuery pendekuai va'e ha'e javi, peẽ kuery voi peroporaei Senhor,

peẽ hembiguai kuery oipota va'e pejapo va'e!

₂₂Hemimoingo pendekuai va'e ha'e javi, peroporaei Senhor,

mamo rã ipo'akaa py ma guive rã!

Xenhe'ẽ, ndee voi eroporaei avi Senhor!