Provérbios 9

₁'Arandua ojapo ngoorã,

ha'e vy omoatyrõ sete ijytarã.

₂Ojuka uka mymba ngaru ojapo aguã,

oguereko katu ma vinho, ha'e gui mesa áry omoĩmba.

₃Ha'e rami vy guembiguai kuery omondouka

tetã yvateve va'e áry rupi nhoenoĩ aguã. Aipoe'i uka:

₄“Ndapeikuaai rei va'e, peikepa ke apy!” he'i uka.

Hi'arandu e'ỹ va'e kuery pe aipoe'i uka:

₅“Peju ke pe'u mbojape xea py,

ha'e pey'u vinho areko katupa va'ekue.

₆Pendekuaive eme 'arandu e'ỹa rupi, ha'e vy 'rã peiko areve.

Tape 'arandu oĩa rupi anho peiko”, he'i uka.

₇Ha'e gui porojojai rei va'e kuery pe pendeayvu vy

peẽ ae pejejojai uka rei,

heko vai va'e kuery pe pendeayvu vy pejeavyky uka rei 'rã.

₈Nda'evei ae porojojaia pe nhandeayvu aguã, nhandevy ipoxy e'ỹ aguã.

Ha'e rã hi'arandu va'e pe nhandeayvu ramo ma nhanderayvu 'rã.

₉Hi'arandu va'e nhambo'e ramo ma hi'aranduve 'rã,

heko porã va'e nhambo'e ramo oiko kuaave 'rã ovy.

₁₀Senhor renonde jajererokyjea rupi jaiko vy 'rãe jaupity 'arandua,

Iky'a e'ỹ va'e jaikuaa vy 'rãe jaiko kuaa.

₁₁Mba'eta xereve vy anho peiko pukuve 'rã,

penerenonderã ma'etỹa amoĩ retave ramo.

₁₂Pene'arandu ri vy pendejeupe guarã ae 'rã pejou,

ha'e rã pejojojai reia py ma peẽ ae 'rã penhemoĩ vai.

₁₃'Arandu e'ỹa ma kunha ojejoko kuaa e'ỹ ha'e opa marã rei onhendu va'e.

Ha'e nunga ma mba'eve ndoikuaai 'rã.

₁₄Oguapy 'rã oiny ngokẽ py,

tetã yvatevea py tenda áry oĩ 'rã,

₁₅oaxa va'e-va'e ha'e omba'eapo vy

oje'oi va'e pe aipoe'i aguã:

₁₆“Ndapeikuaai rei va'e, pejupa ke apy!”

Hi'arandu e'ỹ va'e kuery pe aipoe'i 'rã:

₁₇“Yy mondakue ma yro'yxã porãve,

ha'e mbojape nhemi rupi ja'u va'e ma heeve”, he'i.

₁₈Ha'e rã ha'e pyguarã oenoĩ va'ekue ma ndoikuaai oĩa py manogue anho ikuaia,

ha'e py oike va'ekue ma yvykua manoa py meme ikuai.