Provérbios 6

₁Xera'y, xapy'a rei neirũ orevea repaga aguã rami reiko 'rã,

e'ỹ vy rexa va'ety e'ỹ reve ha'e rami aguã re pejogueroayvu 'rã.

₂Xapy'a rei rã aipo'reague py ae reiko 'rã ojokua pyre,

ndeayvua py renhembo'a uka vy.

₃Xera'y, ha'e rami ri ramo aỹ ma po rami 'rã reiko

reo jepe aguã, neirũ po py re'a ma rire teĩ

tereo pojava, ejerure tema einy neirũ pe.

₄Nda'evei reke ranhe aguã,

emboty eme ranhe nderexa.

₅Tereo jepe nho pota ke, guaxu e'ỹ vy guyra

imba'ejuka va'e po gui oo jepea rami.

₆Ndee inhate'ỹ va'e, tereo eikuaa pota tay kuery reko re,

ha'e kuery reko re reikuaa pota vy ne'arandu nho aguã.

₇Ha'e kuery ma ndoguerekoi nguvixa,

neĩ herekoa, neĩ imomba'eapoarã.

₈Ha'e rami teĩ kuaray puku py voi ha'e kuery omoĩ porã 'rã ho'u va'erã,

nhamono'õa ára ha'e kuery voi omono'õ 'rã guembi'urã.

₉Ndee inhate'ỹ va'e, raka'e peve tu renheno 'rã rejupy?

Raka'e peve 'rã tu reke rejupy?

₁₀Mba'eta “Takeve'i ju ranhe” 're vy repytu'uve tema 'rã,

ha'e renhekuavã 'rã rejupy.

₁₁Ha'e rami ae 'rã ovaẽ xapy'a nemomboriauarã imonda va'e rami,

nemoĩ axyarã ou xapy'a 'rã ava guembiporu revegua rami avi.

₁₂Avakue mba'everã ovare e'ỹ va'e, heko vai va'e ma

opa marã rei 'rã ijayvu.

₁₃Oxapymi-pymi ha'e opy omomy-momyĩ rei 'rã okuapy,

opo ombovava-vava 'rã guive nhombotavya rupi.

₁₄Ha'e gui ipy'a re ma ha'eve e'ỹ va'e anho 'rã oĩ,

teko vai re ae 'rã onhembopy'a okuapy,

ha'e joo rami e'ỹ-e'ỹ nhomoingoa re 'rã ikuai.

₁₅Ha'e nunga rupi imokanhyarã ou xapy'a 'rã.

Ou xapy'a 'rã imopẽmbaarã, ha'e jipoi 'rã imongueraarã.

₁₆Mba'eta mboapy meme regua oiko Senhor ndojou porãi va'e,

sete-a voi oiko onhe'ẽ py ojou vai va'erã:

₁₇ha'e va'e ma guexa py onhemboyvate rei va'e,

oapekũ py ijapu va'e,

opo py heko porã'i va'e ruguy omoẽ va'e,

₁₈opy'a py mba'emo vairã re rive oikuaa pota va'e,

opy py mba'emo vai ojapo aguã katy ojapurave va'e,

₁₉joekokue ramigua rive ijapu vy omombe'u va'e,

ha'e joegua kuery joo rami e'ỹ-e'ỹ ikuai aguã rami ojapo va'e.

₂₀Xera'y, nderexarai eme nderu ijayvuague re,

ejepe'a eme ndexy nembo'eague rupi reikoa gui.

₂₁Emoĩ porã ke ndepy'a re,

mbo'y ndeaju'y re remoĩa rami emoĩ riae ndejee.

₂₂Mba'eta ha'e va'e ayvu ma reguataa rupi nderereko 'rã,

reke jave voi opena porã 'rã ndere,

ha'e rekeague gui revy jave nemo'arandu teri 'rã.

₂₃Mba'eta ojapo uka pyre ma tataendy rami 'rã oĩ,

nhanembo'ea nhanemoexakã 'rã,

arandu rupi nhanemongetaa ma tape tekove katy oo va'e oĩ,

₂₄ndejoko aguã kunha itavy rei va'e gui,

kunha mboae nembotavy aguã rupi ijayvu va'e gui.

₂₅Ha'e nunga iporãa rexa teĩ emoaruã rei eme,

enhembotavy uka eme oma'ẽ ngatu teĩ.

₂₆Mba'eta kunha itavy rei va'e pe ma mbovy'i 'rã opagaa peteĩ mbojape repyrã rive,

ha'e rã omenda va'e reve itavy reia rekovia ma guekove ae 'rã ome'ẽ.

₂₇Amongue opexo re tata oikuavã heravy ramo

ijao ndokai 'rã ri?

₂₈Ha'e rami e'ỹ vy tapyĩ áry oguata vy nda'u

ipy ndokai 'rã ri?

₂₉Ha'e rami ae 'rã oirũ ra'yxy reve itavy va'e re oiko.

Hexeve itavy rei va'ekue ma ndopaga e'ỹi 'rã.

₃₀Imonda va'e minha karuai gui imonda teĩ

ndajajou vai 'rã ri ty'y?

₃₁Mba'eta ha'e nunga ojoua ri vy sete-kue áryve 'rã ombopagaa.

Ngoo py oguereko va'ekue ha'e javi ome'ẽmba 'rã.

₃₂Ha'e rã kunha mboae reve itavy rei va'e ma na'inhakã porãvei ae.

Ha'e rami ikuai va'e ma ha'e kuery ae onhemomba ukaxe vy.

₃₃Ha'e rire oendu 'rã oinupãmba rã oxĩmba aguã.

Raka'e rã peve ima'endu'aa riae 'rã ha'ekue re.

₃₄Mba'eta ime hakate'ỹ vy ipoxy 'rãe,

ha'e vy ombopaga aguã ára py noendui 'rã omboaxya.

₃₅Neĩ mba'eve ndojopyxei 'rã onhemboaxy ukaa rupi ome'ẽ va'e voi,

ixupe mba'emo porã ome'ẽ reta ta teĩ.