Provérbios 4

₁Xera'y kuery, pendu ke penderu penembo'ea.

Pejapyxaka porã ke peikuaa porã aguã.

₂Mba'eta xee ma iporã va'e re rombo'e.

Ha'e nunga rupi penderexarai eme rombo'eague re.

₃Ha'e gui xee voi ta'y aiko va'ekue xeru ro py.

Naxembaraetei teri va'ekue, ha'i reve ipi'a peteĩ'i va'e aiko vy.

₄Ha'e jave py xeru xembo'e vy aipoe'i:

“Emoĩ ke xeayvua ndepy'a re.

Ejapo tema ajapo uka va'e, ha'e vy 'rã reikove.

₅Emoĩ ne'arandurã ha'e mba'emo reikuaa aguã.

Nderexarai eme, ejepe'a eme guive xeayvua gui.

₆Ejepe'a eme 'arandua rupi reikoa gui. Ha'e ramo 'rãe ndere opena porã.

Embovare ke, ha'e ramo 'rã nderepy.

₇'Arandua ma iporãve va'e ramo emoĩ ne'arandurã.

Tá, mba'emo rejoua rupi rejou avi 'rã mba'emo reikuaa aguã.

₈Embovare ete ke 'arandua, ha'e ramo 'rã nemboyvateve.

Remoĩ ete ramo nemoingo 'rã omboetepy.

₉Neakã re omoĩ 'rã akã regua iporãve va'e,

coroa hexakãmba va'e ome'ẽ 'rã ndevy”, he'i va'ekue xevy.

₁₀Xera'y, ejapyxaka ke, ha'e ejopy xeayvu.

Ha'e vy 'rãe reikove puku.

₁₁Mba'eta xee rombo'ea ma tape 'arandua katy oo va'e rupi reo aguã,

heko porã va'e ikuaia rupi avi reiko aguã.

₁₂Ha'e va'e rupi reguata ramo

mba'eve rei nandejokoi 'rã reikoa rupi.

Renha teĩ nerenhepyxangai 'rã.

₁₃Ha'e nunga rupi emoĩ porã ete rombo'eague, nderexarai eme.

Emoĩ atã ndejee, mba'eta ha'e va'e rupi vy 'rãe reupity nderekoverã.

₁₄Nderepiai 'rã heko vai va'e kuery ooa katy.

Eiko eme heko vai va'e ikuaia rupi.

₁₅Ejapo eme ha'e kuery ojapo va'e.

Ejepe'a, tereo eme ha'e rupi.

Ejepekuavo mombyry rupi.

₁₆Mba'eta ha'e kuery ma mba'emo vai ojapo e'ỹa ja ndokei 'rã.

Ndokei 'rã joity e'ỹa ja.

₁₇Mba'eta ha'e kuery mbojape ho'u va'e ma teko vai anho,

ha'e vinho oy'u va'e ma ojerovia reia.

₁₈Ha'e rã heko porã va'e ikuaia ma ko'ẽ ouvy va'e rami hexakã,

hexakã porã-porãve 'rã ovy ko'ẽmba porã peve.

₁₉Ha'e rã heko vai va'e reko ma pytũ rupi oo va'e rami.

Ha'e kuery ndoikuaai mba'e nunga re 'rã pa onhepyxanga aguã voi.

₂₀Xera'y, endu pota xeayvua re.

Ejapyxaka ke xee rombo'ea re.

₂₁Emboyke eme nderexa py rexa va'ekue.

Ndepy'a py re 'rã remoĩ.

₂₂Mba'eta oupity va'e pe ma tekove me'ẽa oĩ,

ome'ẽ avi 'rã hete rexaĩrã.

₂₃Opa mba'e re repenaa gui epena porãve ndepy'a re,

mba'eta ha'e py ae oĩ nderekoverã.

₂₄Emombytu'u ndejuru ndeapu reiaty gui,

eipe'a ndejegui ayvu vai rupi ndeayvua.

₂₅Nderexa toexa porã ovy nerenonderã ae.

Nderova ma nerenonde re ae toĩ.

₂₆Eikuaa pota porã ke repyrõa re,

reikoa ha'e javi hi'yvi aguã.

₂₇Epia eme reiporu kuaa katy neĩ reiporu kuaa e'ỹa katy.

Ejoko ndepy teko vai katy oo ta ramo.