Provérbios 31

₂Xepi'a, mba'e pa aipoa'e 'rã ndevy, xepi'a xeryepy pyguare?

Mba'e pa ndevy aipoa'e 'rã, xepi'a anhemboayvu ma voi va'ekue?

₃Emboaxa rive eme nembaraetea kunhague mboae káuxa,

emboaxa eme reikoa huvixave reitya kuery pe.

₄Lemuel, nda'evei huvixave ha'e rami oiko aguã,

nda'evei huvixave vinho oy'u oikovy aguã,

neĩ iro va'e re rive yvatekueve ikuai aguã,

₅rey'ua rupi rive lei gui nderexarai vy

ojexavai rei'i va'e repya gui rejepe'a e'ỹ aguã.

₆Iro va'e ma omano rai'i va'e pe anho 'rã nhame'ẽ,

ha'e vinho ma ipy'a raxy va'e kuery pegua anho,

₇ha'e kuery oy'u vy hexaraipa aguã iporiau reia re,

ojexavai reia re riae ima'endu'a e'ỹ aguã.

₈Ndeayvu ke ijayvu e'ỹ va'e repya rupi,

openamby e'ỹ ikuai va'e ha'e javi repy aguã.

₉Ha'evea rami ke ndeayvu renhomboayvua py,

reikuaa pota porã aguã iporiaukue'i ha'e oipotapa rei'i va'e pytyvõa rupi.

₁₀Mava'e nda'u ojou kuaa 'rã kunha hi'arandu va'e?

Ha'e ramigua ma ita iporãve va'e gui voi ovareve va'e.

₁₁Ha'e va'e re ime ojerovia 'rã okuraxõ py,

ixupe ndoatai 'rã mba'emo repyrã.

₁₂Ome pe ojapo vai rei 'rãgue py ojapo porã 'rã,

ára nhavõ oikovea pukukue re.

₁₃Ogueru 'rã vexa'i rague ha'e nhimbo,

ha'e gui ovy'aa rupi 'rã omba'eapo opo py.

₁₄Kanoã guaxu mba'emo rerua rami avi

mombyry gui 'rã kunha va'e ogueru tembi'u.

₁₅Pytũ rei teri reve opu'ã 'rã

omongaru aguã ngoo pygua kuery,

ha'e guembiguai kuery kunhague pe mba'emo ojapo uka 'rã.

₁₆Mba'etyrã re oikuaa pota porã ma vy ojogua 'rã,

uva renhoĩ onhotỹ 'rã omba'eapoague repykue re ojogua va'ekue.

₁₇Kyre'ỹ py onhemonde vy

omombaraete 'rã ojyva omba'eapo aguã.

₁₈Mba'emo repyrã ojouxe ramo

pyávy teĩ hataendy ndoguei.

₁₉Okuave'ẽ 'rã nhimbo onhemama va'e re,

opo rovai py hi'y re ojopy reve.

₂₀Opo oipe'a 'rã ojexavai va'e

ha'e oipota va'e kuery oipytyvõ aguã.

₂₁Ha'e gui ngoo py ikuai va'e re oma'ẽ vy ndoguerokyjei 'rã yro'y vaipa teĩ,

ao raku py peteĩ-teĩ onhemonde ramo.

₂₂Kunha va'e ojapo avi 'rã onheovã aguã,

ha'e onhemonde 'rã ao porã púrpura guigua py anho.

₂₃Ime ma huvixa kuery omboete pavẽ 'rã,

oyvy re ikuai va'e mongetaa kuery reve oguapy oiny ramo.

₂₄Ta'yxy ma nhimbo porãgue gui ojapo 'rã aorã, ovende 'rã guive,

ku'axã ma mba'emo vendea kuery peguarã voi.

₂₅Ojee omoĩ va'e ma ombaraeterã ha'e omboetepy oiko aguã.

Ha'e rami vy ko'ẽ rã guarã re ma ndojapura rei 'rã.

₂₆'Arandu rupi 'rã ijayvu,

ha'e joayvua rupi nhombo'e kuaa 'rã.

₂₇Opena porã 'rã ngoo pygua kuery re,

ha'e inhate'ỹ reiague re e'ỹ 'rã omongaru.

₂₈Ha'e ramo imemby kuery opu'ãmba vy oxy pe “Ovy'a ete va'e” he'i 'rã okuapy.

Ime voi oguerovy'a vy aipoe'i 'rã:

₂₉“Kunhague hi'arandu va'e heta ikuai

teĩ ndee ma pavẽ gui ne'aranduve va'e”, he'i 'rã.

₃₀Onhemoporãa re ikuai va'e ojekore 'rã, onhemoatyrõa voi opa rive 'rã.

Ha'e rã kunhague Senhor renonde ojererokyjea rupi ikuai va'e ma oguerovy'aa riae 'rã.

₃₁Nhanema'endu'a porã 'rã opo py ojapo porãa re,

pavẽ oendua py jarovy'a 'rã oiko porãa.