Lamentações 5

₁Senhor, nema'endu'a ke mba'emo vai orere oiko va'ekue re.

Eikuaa pota ha'e ema'ẽ roiko axya re.

₂Oreyvyrã reme'ẽ va'ekue oaxapa ma amboae regua kuery pe,

orerogue voi amboae yvy guigua kuery pe ju oaxa.

₃Ore kuery ma tyre'ỹ tuu ve'ỹ va'e rami orekuai.

Ha'e rã orexy kuery ma imeve'ỹ va'e ikuai.

₄Yy roy'u va'erã ma peráta re rive 'rã rojogua,

yxakã voi peráta re anho 'rã rojou.

₅Orerakykue monhaa kuery ma oreaju'y re ma ikuai.

Orekane'õ ma teĩ ropytu'u aguã voi noĩ.

₆Egito ha'e Assíria pygua kuery pe rojejopy uka

ro'u va'erã rojou aguã teĩ.

₇Oreru kuery ma ojejavypa rire jipovei ma.

Ha'e gui ore kuery ju 'rã roiko axy ha'e kuery ojapo vaiague re.

₈Escravo kuery rive 'rã ipo'aka orere.

Ndoikoi avave rei ha'e kuery po gui orereraa jepe va'erã.

₉Rojeayvu e'ỹkue py 'rã rojou ro'u va'erã,

kyxe tekoa e'ỹa rupi oguereko va'e gui.

₁₀Karuai roendu vaipa ramo

orepire ma tata kua rami hakupa rei.

₁₁Sião py oguero'apaa kunhague ikuai va'e,

kunhataĩgue guive, Judá tetã ikuai va'e rupi.

₁₂Hovaigua kuery ojyryvipypa yvatekueve va'ekue,

tujakue'i voi ojou vy ombojaru rei okuapy.

₁₃Ha'e rã kunumigue ma ogueraa 'rã mba'emo mongu'ia py omba'eapo aguã,

avakue'i voi yxakã re ombovoyi rã onhepyxanga rive oje'oivy.

₁₄Ha'e ramo nhomongetaa rupi ikuai va'ekue ma ndoguapyvei ma tetã kora rokẽ py,

kunumigue ndoporaeivei ma guive.

₁₅Rovy'aague okanhymba ma orekuraxõ gui.

Rojeroky 'rãgue py mboriau anho rei roendu.

₁₆Oreakã gui ho'a ma akã regua oĩ va'ekue.

Nda'evei ete orevy, rojejavy rire!

₁₇Ha'e nunga rupi ae orekuraxõ py oremba'eaxy,

ndorerexa pyxoveipa guive.

₁₈Sião yvyty ombovaipaa rire

mbyku anho ikuai ha'e rupi.

₁₉Ha'e rã ndee Senhor, ndepo'aka riae 'rã.

Tenda repenaaty oĩ 'rã raka'e rã peve guarã.

₂₀Mba'e re tu riae ta ri nderexarai orere?

Mba'e re tu remboare orepytyvõ aguã?

₂₁Senhor, orereko rerova ju ke ndejeupe guarã.

Ha'e ramo 'rãe rojeko rerova.

Embopyau ju ore'ára yma guare rami.

₂₂Mba'e re tu orerejapa ete ri?

Mba'e re tu ndepoxy anho ta ore kuery rovai?