Lamentações 3

₁Xee ma ava jexavai aendu va'ekue

Nhanderuete opoxya rupi yvyra po'i'i ombou rã.

₂Mba'eta xereraa vy ojapo karamboae pytũ rupi aiko aguã,

hexakãa rupi e'ỹ.

₃Mbovykue rei e'ỹ xerovai omoĩ opo,

ára pukukue re.

₄Omoxorĩmba xero'o, xepire voi.

Xekãgue omopẽmba guive.

₅Xerovai omopu'ã xejokoarã kuery.

Veneno ha'e haxy va'e py ae xejoko.

₆Ojapo pytũa py xerekoa aguã rami,

raka'e rã peve guarã omano va'ekue rami.

₇Kora py xejoko rã nda'evevei ma aẽ aguã.

Corrente overa va'e guigua py xejokua.

₈Ajerure ha'e ajapukai teĩ

noendui anhembo'ea.

₉Ita guaxu omoatyrõ mbyre py ojopia xerape,

omokarẽ rei guive.

₁₀Xerarõ oiny urso oma'ẽ mbegue va'e rami,

ha'e xivi onhemi oiny va'e rami avi.

₁₁Ha'e rami vy xerape gui xepe'a xapy'a vy xemboa'ypa.

Ombovaipa pyre rami xereja inony.

₁₂Guapa oipira vy

xemoĩ guembiarã.

₁₃Xekuraxõ re oipyxo

ngu'y hyru guigua py.

₁₄Xeapo xeretarã kuery ha'e javi xejojai aguã rami.

Ára pukukue re xembojaru rei okuapy.

₁₅Jexavaia re anho xemongaru,

xevy ho'u uka reta haxy va'e.

₁₆Xeapo ita ra'y re xeraĩ amopẽmba aguã rami.

Xeao'i tanhimbu py rive.

₁₇Xenhe'ẽ gui oipe'a aiko porã aguã va'ekue.

Ha'e ramo xerexarai iporã va'e aexaague re.

₁₈Ha'e rami vy “Opa ma xeporãague,

Senhor aarõague voi”, ha'e.

₁₉Nema'endu'a nho ajexavaia ha'e ajae'o aikovya re,

haxy va'e ha'e veneno ay'u va'e re guive.

₂₀Xee ma ha'e nunga re xema'endu'a riae aikovy xenhe'ẽ py.

Ha'e ramo xeryepy rupi xenhe'ẽ nda'evei ju.

₂₁Ha'e rami teĩ xema'endu'axe ju

pova'e nunga arõ aikovy va'e re.

₂₂Mba'eta Senhor nhanemboaxy ramo nanhanemombaai,

mba'eta nhanemboaxya ma opa va'erã e'ỹ.

₂₃Opa mba'e py ojeroviapy reiko vy

rexa uka pyau 'rã ko'ẽ nhavõ.

₂₄Xejeupe ae aipoa'e: “Xevy guarã oĩ va'e ma Senhor ae.

Ha'e nunga rupi arõ tema 'rã hexe”, ha'e.

₂₅Senhor opena porã 'rã harõa kuery re,

onhe'ẽ py oeka va'e kuery ae.

₂₆Ha'eve nharõ Senhor nhandereraa jepe aguã,

nhakyrirĩ reve.

₂₇Nhandevy pe ha'eve

nhanekunumi teri reve canga jexavaia regua jaropo'aka kuaa.

₂₈Ha'e rami vy tajaguapy nhande ae'ia py, tanhakyrirĩ nhainy,

mba'eta ha'e va'e canga ae nhandere Nhanderuete omoĩ va'e.

₂₉Tajajero'a nhanderova yvy ku'i re omovaẽ peve.

Xapy'a rei ma oiko nho 'rã nharõ jaikovy va'ekue.

₃₀Tanhaunga uka nhanderova nhaneungaxe va'e pe.

Tanhaendu rive opa marã nhandejojai reia teĩ.

₃₁Mba'eta Senhor ma

nanhandereja riaei 'rã.

₃₂Xapy'a rei nhanemomboriau ranhe teĩ

nhomboaxy ete va'e vy oexa uka nho 'rã nhanemboaxya.

₃₃Mba'eta nhomoingo axyxe reia py e'ỹ

ombojexavai avakue ra'y kuery.

₃₄Xapy'a rei amongue opyrõ imoiny 'rã

nhuã py ikuai va'e re,

₃₅ha'e rami e'ỹ vy Yvate ete va'e renonde teĩ

ha'eve'ỹa rami oikuaa pota 'rã joe,

₃₆ha'e rami e'ỹ vy avakue ojerure rã oendu rive 'rã,

teĩ Senhor ndoexai 'rã teve ha'e rami oikoa?

₃₇Mava'e ayvu rupi rive tu mba'emo oiko 'rã,

Senhor omoingo e'ỹ rã?

₃₈Yvate ete va'e gui nda'u ndoikoi 'rã ri

mba'emo vai ha'e iporã va'e?

₃₉Mba'e re tu ha'vy avakue imarã va'e ndojou porãia rupi ijayvu,

ojejavyague re ombopaga rã?

₄₀Jaikuaa pota ke jaikoa re ae.

Ha'e gui jaikuaa porã ma vy jajevy ke Senhor pe.

₄₁Nhandepo jaupi reve ke nhanekuraxõ voi jaupi

Nhanderuete yva re oĩ va'e pe. Ha'e vy aipo ja'e:

₄₂“Rojejavy, noronhe'ẽ rendui guive ramo

ndee ma ndoreperdoai teri.

₄₃Ndee ma ndepoxya py oreao'i reve orerakykue monha.

Oremboaxy e'ỹ re oremokanhymba.

₄₄Arai py renhemi

ndea py peve ronhembo'ea onhendu e'ỹ aguã.

₄₅Yty omombo pyrã rami rive oremoingo

yvy regua kuery ikuaia rupi.

₄₆Orerovai orerovaigua kuery ha'e javi

oipe'a okuapy ojuru.

₄₇Ore'áry ou ndorerekorãvei aguã ha'e yvykua py orembo'aarã,

orereityarã ha'e oremokanhymbaarã.”

₄₈Xeretarã kuery omokanhymbaa rã

xerexay oxyry atã ete.

₄₉Xerexa ojae'o tema.

Ndopo'oi, ndopytu'ui 'rã guive

₅₀Senhor opena e'ỹa ja,

ha'e yva gui oexa pota peve.

₅₁Mba'emo aexa va'e gui xeporiau xenhe'ẽ py,

kunhague xeretã rupi ikuai va'e re mba'emo oiko va'ekue káuxa.

₅₂Mba'e re'ỹ xerovaigua kuery

xejukaxe okuapy guyra'i rami rive.

₅₃Xemombaxe vy xemombo yvykua py,

ha'e ita py xeapipa.

₅₄Xeakã áry rupi yy oxyry atã ouvy.

Ha'e ramo “Akanhy ta ma!” ha'e.

₅₅Ha'e gui ma Senhor, yvykua pukuvea py aĩa gui

ajapukai nderery rupi.

₅₆Ha'e ramo ndee rendu xeayvua.

Emboty eme ndeapyxa ajae'oa ha'e ajapukaia gui.

₅₇Ndevy pe ajapukaia ára ndee ae renhemboja xere.

Ha'e rami vy xevy pe “Ekyje eme” 're.

₅₈Senhor, xerekove re reikuaa pota vy

xereraa jepe va'ekue aikove aguã rami.

₅₉Senhor, rexa reiny ha'eve'ỹa rami xerereko okuapyague.

Eikuaa pota 'rãgue xere!

₆₀Rexapa xeapo vai okuapya

ha'e xerovai onhembopy'aa ha'e javi.

₆₁Senhor, rendu xere ijayvu rei okuapy rã,

xerovai onhembopy'aa nhavõ,

₆₂xerovaigua kuery xerekokue ramigua rive omombe'u rã,

ha'e ára pukukue re xere ijayvu mbegue rei okuapy rã.

₆₃Exa pota tema ha'e kuery re, oguapy ha'e opu'ã ju ramo.

Mba'eta xembojaru rei rive okuapy.

₆₄Senhor, ndee rembopaga 'rã

opo py mba'emo ojapoague re.

₆₅Remopytũmba 'rã ha'e kuery py'a,

ha'e kuery re rembou 'rã ayvu vai.

₆₆Ndepoxya py remonha 'rã heravy.

Ha'e rami vy remokanhymba 'rã ndevygua yva guy gui.