Lamentações 1

₁Tetã yma heta riae ikuaiague teĩ aỹ ma oejapaa ma!

Aỹ ma kunha imeve'ỹ va'e rami opyta,

yvy regua kuery omboeteve va'ekue ri.

Amboae tetã ikuai va'e gui huvixa rajy rami yvateve va'ekue ri

aỹ joupe rive ha'e kuery omomba'eapo nhea'ãa.

₂Ojae'o, ojae'o tema okuapy pyávy,

hexay oxyry tema 'rã hetovape rupi.

Ndoikoi imbopy'a porãarã

hembiayvu heta ikuai va'ekue ri.

Hembiayvu ikuai va'ekue ha'e javi ma anhetẽ rupi e'ỹ oguereko,

ha'e hovai guarã rive ju ikuai.

₃Mba'eta Judá kuery ma escravo-rã ogueraapaa,

oguereko axya ha'e omomba'eapoa poyi anho rei.

Yvy regua kuery mbyte rupi ikuaia py

ndojoui opytu'u aguã voi.

Ikuai axy reia py

hakykue monhaa kuery oupitypa ma.

₄Sião tetã katy tape oo va'e rupi ojae'oa,

mba'eta ndoikovei ma nhemboaty iky'a e'ỹ va'e katy oo va'e.

Tetã kora rokẽ ha'e javi ombovaipaa.

Ha'e pygua sacerdote kuery ipoaẽ rei,

kunhataĩgue voi iporiaupa okuapy.

Tetã py ojexavaia anho oendu.

₅Ha'e rami rã hovaigua kuery ovy'apa rei okuapy,

ija'e'ỹ va'e kuery ikuai porãmba rei,

ha'e pygua kuery anhetẽ rupi e'ỹ riae ikuai ramo

Senhor omoingo axy rã oexa vy.

Ta'y kue'iry voi hovaigua kuery

omondyi heravy escravo-rã.

₆Sião pygua kuery gui oaxapa ma

iporãa oĩ va'ekue ha'e javi.

Ha'e py yvatekueve ikuai va'ekue voi

guaxu ho'u va'erã ndojouvei va'e rami ma ikuai,

ikangypa rei vy ho'apa rive 'rã okuapy

imonhaa kuery renonde py teĩ.

₇Aỹ mombyry ogueraa ague py ombojexavaia rã

Jerusalém guigua kuery ima'endu'a 'rã okuapy

omba'e rei-rei oguerovy'a va'ekue re,

ymave rupi mba'emo oguereko va'ekue re,

heraa jepearã ndoikoi ramo

ngovaigua kuery po py ho'apaague re guive,

ha'e gui ho'a rã hovaigua kuery oexa vy

ojojai rei okuapyague re.

₈Jerusalém pygua kuery ojejavy vaipa ete okuapy.

Ha'e rami vy ae ojeguaru reipy ikuai.

Imboeteare kuery ma nonhemoirũvei okuapy

ipire reia rupi ikuai rã oexa vy.

Ha'e kuery ae voi ipoaẽ reve

ojepe'a 'rã okuapy oxĩmba rei vy.

₉Ijao re ojekuaa ha'eve'ỹa,

noexa'ãi guive va'ekue omombaa aguã re.

Ha'e rami vy oitya rã onhemondyipa rei okuapy,

ha'e avave rei ndoikoi imbopy'a porã jevyarã.

Senhor, exa ke aiko axya,

mba'eta hovaigua kuery ijayvu vaive rive tema okuapy.

₁₀Ore kuery mba'e rei-rei roguerovy'ave va'ekue ma

orerovaigua kuery ojopy vy omba'erã ae ogueraapa.

Roexa avi yvy regua kuery oike okuapy rã

rombojeroviaaty iky'a e'ỹ va'e py voi,

“Nda'evei xevygua kuery ijatya py ha'e kuery ikuai avi aguã” aipo're va'ekue ri.

₁₁Tetã pygua kuery ha'e javi ipoaẽ 'rã okuapy

tembi'u'i rekaa rupi ikuai vy.

Omba'e rei-rei ha'e kuery oguerovy'ave va'ekue ome'ẽmba ma

tembi'u ho'u va'erã rekovia, imbaraeteve'i ju aguã.

Senhor, exa ke, eikuaa pota guive,

mba'eta xere nda'ija'eavei ma.

₁₂Peẽ kuery tape rupi peaxa va'e,

ha'e nunga pexa vy napendui ri ty'y oremboaxya?

Pema'ẽ ha'e peikuaa pota.

Oiko 'rã nda'u haxy va'e xee aendu va'e ramigua,

xe'áry ou va'ekue ramigua ete?

Mba'eta Senhor opoxya oexa ukaa ára xemoingo axy avi.

₁₃Ha'e rami vy yvate gui tata ombou xekãgue ikuai va'e re

ipo'aka ete vy.

Ha'e gui xepy rupi ju kya omoĩ va'e py

xerakykue katy gui xemoatã vy xereity.

Ha'e rami vy xemomba tema heravy,

xemomba'eaxy ko'ẽ nhavõ.

₁₄Ajejavyague ma opo py ae ojokua vy

ojapo xe-cangarã rami.

Ha'e vy oipopẽ va'ekue xeaju'y rupi peve ovaẽ.

Ha'e rami py Senhor omomba ma xembaraetea,

xemboaxa guive xegui ipo'akave va'e kuery po py.

₁₅Senhor omoaĩmba avi ma ipy'a guaxukueve

xereve ikuai va'ekue.

Ombou reta xerovai ono'õ va'erã,

xea pygua kunumigue omou'ũmba avi aguã.

Kunhataĩ'i rami Judá pygua kuery ndojexavai va'ekue ri

Senhor opyrõ ukapa uva omou'ũaty py rami.

₁₆Ha'e nunga re ae xee ajae'o,

xerexay gui xerexa ndoexavei.

Xegui ojepe'a ma xembopy'a guaxuarã

xembaraete ombopyau 'rã va'ekue.

Xera'y kuery voi ojexavai reia rupi ikuai,

hovaigua ipo'aka ramo.

₁₇Sião pygua kuery opo oupi teĩ

avave rei ndoikoi ipytyvõarã.

Mba'eta Jacó regua kuery re Senhor ijayvu rire

ha'e katy'i rupi ikuai va'e hovaigua ju ikuai.

Ha'e ramo Jerusalém tetã pe ha'e kuery

“Ha'eve'ỹ va'e” he'i okuapy.

₁₈Ha'e rami avi Senhor ma heko porã va'e,

ha'e rã xee ma nanhe'ẽ renduxei va'ekue.

Peẽ yvy regua kuery ha'e javive, pendu ke,

pema'ẽ guive haxy aendu va'e re.

Xea pygua kunhataĩgue ha'e kunumigue

ogueraapaa ma escravo-rã.

₁₉Xeirũ kuery aenoĩ

teĩ ha'e kuery xembotavy.

Xea pygua sacerdote ha'e nhomongeta va'ety kuery voi

omanomba tetã rupi,

tembi'u rekaa rupi ikuai vy

imbaraetepa'i ju aguã.

₂₀Ema'ẽ Senhor, mba'eta xee ajexavai.

Xenhe'ẽ py nda'evei ete aikovy,

xekuraxõ py ndaxerekorãvei ma xeryepy rupi,

opa mba'e py noronhe'ẽ rendui rire.

Oka rupi xera'y kuery ojukapaa kyxe py,

ha'e rã opy rupi ma mano anho oiko.

₂₁Xepoaẽa onhendu

teĩ avave rei ndoikoi xepytyvõarã.

Mba'emo vai aendua xere ija'e'ỹ va'e kuery oikuaa vy

ovy'a reipa okuapy, ndee xemoingo axy ramo.

Ha'e rami avi ára ndeayvuague ovaẽ ramo

xee aiko axya rami avi ha'e kuery voi ikuai axy 'rã.

₂₂Tove ha'e kuery ojejavyague tojekuaapa nerenonde.

Ereko ha'e kuery voi xere rejapoague rami,

xee anhetẽ rupi e'ỹ aikoa py.

Mba'eta xepoaẽ vaipa ete,

xekuraxõ opa rai'i ma.