Jó 40

₂— Ha'e gui ijayvu poyi va'e nda'u nhombovake ta Ipo'akapa va'e reve?

Nguuete rovai ijayvu va'ekue tombovai aỹ — he'i.

₄— Xevy pe ma nda'evei. Mba'exa tu rombovai ta?

Ajoko 'rã xejuru xepo py.

₅Peteĩgue xeayvu rire teĩ nambovai kuaavei ma.

Mokoĩgue katu va'eri ndaxeayvu reguavei ma — he'i.

₇— Eiko katu ha'vy ava rami.

Xee aporandu 'rã ndevy, ha'e rã ndee xembovai 'rã.

₈Ndee ta'vy remboyke rive 'rã xereko porãa?

Xemboeko vai 'rã teve renhemboeko porãvexe vy?

₉Tyrã ndee teve Nderuete rami ndejyva mbaraete va'e?

Ndee voi ndeayvu ryapu rei 'rã teve xee xeayvua rami?

₁₀— Ndejee emoĩ ha'vy ndeyvatea ha'e ndetuvixaa.

Enhemonde ndepo'akaa ha'e nerexakãa py.

₁₁Xevy pe exa uka ndepoxya.

Exa pota onhemboyvate rei va'e kuery re, ha'e eitypa.

₁₂Exa pota onhemboyvate rei va'e ha'e javi re, ha'e emo'yvyĩ'imba.

Epyrõmba vyvoi heko vai va'e kuery ikuaia re.

₁₃Ejatypa imbokuapy yvy ku'i py.

Ejao'ipa hova ituia py.

₁₄Ha'e rami rã mae 'rã xeayvu

reiporu kuaa regua py ae ndepo'akaa rami.

₁₅— Eikuaa pota aỹ hipopótamo ndereve amoingo avi va'ekue re.

Ha'e va'e ma vaka rami nhuũ ho'u oikovy va'e.

₁₆Imbaraetea ma hye re oĩ,

ipo'akaa ma hyepy ro'o re ae.

₁₇Huguai ma yary rakã rami hatã va'e.

Hi'u rajy ma oipopẽ mbyre rami oĩ.

₁₈Ikãgue ma overa va'e aygue rami imbaraete va'e.

Hetyma ma ferro aygue ramigua.

₁₉Ha'e va'e ma Nhanderuete remimoingo regua omboetevepy.

Imoingoare ae ome'ẽ kyxe hembiporurã.

₂₀Anhetẽ, yvy'ã ikuai va'e áry rupi oĩ nhuũ ho'u va'erã,

vixo nhuũndy regua ikuaiaty rupi.

₂₁Onheno 'rã yvoty ikuai va'e guy rupi,

takua'i ha'e yapo oĩ va'e rupi.

₂₂Ha'e ramo yvoty ae omo'ã 'rã inony.

Yy rembe rupi yvyra ikuai va'e mbyte py itui.

₂₃Yakã tyguaxu teĩ ndojapurai 'rã.

Ijuru peve ete Jordão yakã typy teĩ oiko porã rei 'rã.

₂₄Ha'e rã oma'ẽ ho'amy ramo amongue nda'u ojopy kuaa 'rã?

Ha'eve 'rã nda'u ixĩ rupi omoxãa aguã?