Jó 38

₂— Mava'e tu ndee mba'eve reikuaa e'ỹ vy

xepy'aa ha'eve'ỹa rami remombe'u va'e?

₃Eiko katu ha'vy ava rami,

mba'eta xee aporandu 'rã ndevy.

Ha'e rã ndee ma xembovai 'rã.

₄— Mamo tu reĩ raka'e yvy ytarã anhono jave py?

Ndeayvu ke, anhetẽ ri ne'arandu va'e vy.

₅Mava'e tu oa'ã raka'e yvy, xapy'a rei reikuaa rã?

Mava'e tu ixã omoatã raka'e hi'áry rupi?

₆Mba'e nunga áry tu ijyta oĩ?

Ha'e mava'e tu omoĩ raka'e ita jypy guarã?

₇Ha'e va'e jave py ma jaxy-tata ko'ẽ rai'i javegua ovy'a ete reve oporaei okuapy,

ha'e Nhanderuete ra'y kuery ikuai va'e oguerovy'a okuapy.

₈— Ha'e mava'e tu okẽ py rami ojoko raka'e ye'ẽ

iguy gui ovu ouvy jave?

₉Mba'eta xee ae arai amoĩ ijaorã,

ha'e pytũ py anhovã ajukue py rami.

₁₀Xee ae amoĩ raka'e yy apyrã,

okẽ py rami ajoko vy.

₁₁Ha'e vy aipoa'e: “Apy peve'i 'rã reju, ndereaxavei 'rã.

Apy ae 'rã ndeguigua yai onhemboyvate reve ojeapi vy oxopa”, ha'e va'ekue.

₁₂— Ndee teve reikoa ára guive ndeayvu raka'e ko'ẽ rai ouvya va'e pe,

ko'ẽ va'e pe reikuaa uka vy hexakã aguã,

₁₃yvy apy re ovaẽ aguã,

heko vai va'e kuery omondyi heravy vy?

₁₄Yvy ojekuaa 'rã yapo omou'ũ mbyre

ha'e ao ixorĩmba va'e rami.

₁₅Heko vai va'e kuery gui amokanhy 'rã “Nhandevygua hexakã va'e” he'ia va'e,

ha'e amopẽ 'rã ijyva jojuka aguã oupi va'e.

₁₆— Ndee teve revaẽ ma ye'ẽ ryapy py,

e'ỹ vy reguata ma iguýry typyvea rupi?

₁₇Ndevy pe teve oexa ukaa omanogue ikuaia rokẽ?

Ndee rexa ma teve hokẽ pytũ anaa py oĩ va'e?

₁₈Reikuaa teve marã rami ete pa yvy ipya?

Ndeayvu ke, xapy'a rei reikuaa ri vy.

₁₉— Mamo rupi tu oĩ tape hendy va'e ro katy oo va'e?

Pytũa oĩaty voi mamo tu oĩ?

₂₀Erojevy ha'vy hekoa katy,

hoo via reikuaa ri vy.

₂₁Ndee nhi'ã reikuaa 'rã, ha'e va'e jave reiko ae ma rire,

ha'e reikoa ára mbovy rei e'ỹ!

₂₂— Ndee teve revaẽ ma yro'y apĩ amoĩ porãaty py,

ha'e rexa teve amandau amoĩ porãaty?

₂₃Mba'eta ha'e va'e ma xee amboyru imoiny anhombojexavai aguã,

joguero'a ha'e joe opu'ãa jave guarã.

₂₄— Mamo rupi tu oĩ tape hendy va'e oẽ ovy aguã katy,

ha'e yvytu kuaray oua katy gui yvy áry rupi oipeju ouvya katy?

₂₅Mava'e tu oipe'a 'rã oky xapy'a-py'a ou aguã,

ha'e tape hyapu ha'e overa va'e ou aguã?

₂₆Mba'eta ambo'oky 'rã yvy áry

avave rei oĩ e'ỹa py, tekoa e'ỹa rupi ae,

₂₇amoakỹ aguã yvy tekoa e'ỹa ipirupa va'e,

ajapo aguã jai roky yvate ovy aguã rami.

₂₈Oky nda'u tuu va'e oiko?

Mava'e tu ojapo 'rã yxapy otyky aguã rami?

₂₉Magui nda'u oiko yro'y hatã va'e?

Ha'e mava'e tu omoingo 'rã yro'y yva gui ho'a va'e?

₃₀Mba'eta yy hatã 'rã ita rami,

yy typy rei teĩ hi'áry rupi ma hatãmba 'rã.

₃₁— Tyrã ndee teve rejokua kuaa Eixu jaxy-tata,

e'ỹ vy rejora kuaa Hendy guaxu va'e ojokuaague?

₃₂Ndee teve reru kuaa 'rã jaxy-tata ijaty va'e,

e'ỹ vy reraa 'rã teve henoiny Ursa ta'y kuery reve?

₃₃Reikuaa teve yva re ikuai va'e rekorã oeja pyre?

Reikuaa teve marã rami pa yvy re ha'e kuery ipo'akaa?

₃₄— Tyrã ndee teve renhendu kuaa 'rã arai ikuaia peve,

oky vaipa aguã yy ndeao'i peve?

₃₅Tyrã overa va'e pe ndeayvu kuaa 'rã teve,

nembovai vy ha'e kuery “Apy ma roĩ” he'i okuapy aguã?

₃₆Mava'e tu omoĩ 'arandu arai ikuai va'e áry?

Ha'e mava'e tu omo'arandu jaxy-tata ova aguã re?

₃₇Mava'e nda'u o'arandu rupi oipapa kuaa 'rã arai ikuai va'e?

Ha'e rami e'ỹ vy mava'e nda'u onhoẽ kuaa 'rã yy yva re yryru ikuai va'e gui,

₃₈yvy ku'i oĩ va'e ojeapo aguã oja va'e,

ha'e yvy hakytã joe oje'apa aguã?

₃₉— Ndee teve rejuka 'rã guary kunha ho'u va'erã?

Ha'e guary ra'y kue'iry okaruxe rã remoevyatã kuaa 'rã teve

₄₀okua rupi ikuai jave,

e'ỹ vy onhemiaty gui oma'ẽ mbegue jave?

₄₁Mava'e tu uruvu kuery pe ojou uka 'rã ho'u va'erã,

ta'y kue'iry Nguuete pe ojapukai reve

ho'u va'erã rekaa rupi ikuai ramo?