Jó 3

₃— Xetui'iague ára ndoikoi ma voi va'e rire,

ha'e va'e pytũ “Ixy oguereko peteĩ ava'i”, 'ea va'e avi.

₄Ha'e va'e ára pytũmba va'e rire,

Nhanderuete yvate gui nopenai ramo,

yvate oĩa gui omoexakã e'ỹ va'e rire.

₅Pytũ reia ha'e kuaray'ã manoa anho oĩ va'e rire,

hi'áry rupi araipa va'e rire guive.

Ha'e va'e ára omoũmba va'e rire opa marã rei.

₆Ha'e va'e pyávy re ma pytũ ete va'e omo'ã va'e rire.

Ma'etỹ re ára mboae ikuai va'e rami toguerovy'aave eme.

Ha'e va'e jaxy pe “Jaxy ikuai va'e regua” ta'eave eme.

₇Ha'e va'e pytũ imemby e'ỹa va'e rire,

ha'e va'e py nonhenduai va'e rire ovy'a va'e.

₈Ijayvu vai kuaa va'e kuery ma ha'e va'e ára re ijayvu vai ma va'e rire,

vixo vaikue ye'ẽ rupigua momyĩ kuaa kuery ae.

₉Tá, ha'e va'e pytũ jaxy-tata ko'ẽ mbijarã ndojekuaai va'e rire,

ha'e hendy va'e oarõmby ndojekuaai va'e rire.

Ko'ẽ rai jave ko'ẽ oexaxe va'e kuery ndoexai ma voi va'e rire.

₁₀Mba'eta ha'e jave py nombotyi raka'e ha'i ryepy rokẽ,

xerexa py ajexavaia aexa e'ỹ aguã.

₁₁— Mba'e re tu xee namanoi raka'e xeryru'i pyve?

Mba'e re tu ha'e va'e gui aiko'i vy ndaxeayvuẽvei?

₁₂Mba'e re tu oiko raka'e o'u áry xekuavãarã?

Mba'e re tu oĩ ikã xemokambuarã?

₁₃Mba'eta ha'e va'e ndoikoi va'e rire aỹ apytu'u porã rei 'rãgue.

Ake ramo xevy oĩ 'rãgue apytu'u aguã,

₁₄huvixave ha'e nhomongeta va'ety yvy re ikuai va'ekue

onhono porãa aguã ojapo ma voi va'ekue py itui va'e rami,

₁₅ha'e rami e'ỹ vy yvatekueve ouro ha'e prata oguereko va'ekue py

ngoo omonyẽ va'ekue itui va'e rami,

₁₆ha'e rami e'ỹ vy hyru'i py oĩ va'e ojuka nhemi va'e rami xee ndaikoi ma voi va'e rire,

kyrĩ'i va'e hexakãa peteĩgueve oexa e'ỹ va'e rami.

₁₇Ha'e py ma ha'eve'ỹa rami ikuai va'ekue nanhomoangekovei ma 'rã.

Ikane'õ va'ekue guive ikane'õgua nho 'rã ha'e py.

₁₈Ha'e py ma escravo-rã ogueraa pyre ikane'õgua 'rã okuapy,

herekoa kuery ayvu nonhenduvei ramo.

₁₉Ha'e py yvyĩgueve ha'e yvatekueve ikuai va'ekue itui pavẽ 'rã,

tembiguai ikuai va'ekue voi opatõ pe ve'ỹ ma 'rã ikuai.

₂₀— Mba'erã tu iporiaukue ojapoa ri hendy va'e oexa riae aguã rami?

Mba'erã tu ikuerai va'e okuave aguã rami ojapoa?

₂₁Ha'e kuery ma omano aguã anho oarõ okuapy, ha'e rã novaẽi.

Ha'e kuery omano aguã oekave 'rã okuapy hepyve va'e onhomi mbyre oekaa rupi yvy ojo'o va'e gui.

₂₂Ha'e kuery ma onhono porãa rã ovy'a 'rã okuapy,

oguerovy'a rei 'rã yvykua py ovaẽ vy.

₂₃Mba'erã tu avakue pe oexa ukaa 'rã hexakã va'e haperã oikuaa uka e'ỹ re?

Mba'eta Nhanderuete ojoko 'rã joa katy gui e'ỹ-e'ỹ.

₂₄Mba'e re tu xee ha'u va'erã 'rãgue py ajou xepytuẽ atã aguã,

ha'e yy onhoẽ va'e rami ajae'o ete aguã?

₂₅Mba'eta akyjea ou ma xe'áry,

aexa'ãa oiko ma xere.

₂₆Ndapytu'uvei, naĩ rivevei, neĩ naxekane'õgua kuaavei,

xepy'a reta rei aguã anho ou ramo — he'i.