1Ha'e va'e jave py huvixa Ezequias imba'eaxy vy omano ta ma oupy. Ha'e ramo oĩa py ou Amoz ra'y profeta Isaías. Ha'e vy aipoe'i ixupe:
— Po rami Senhor ijayvu: “Emoatyrõ mba'emo ndero py ikuai va'e, mba'eta remano 'rã, ndereikovevei ta ma”, he'i.
2Ha'e ramo Ezequias ojere vy ngoo mbotya re ngova omboja oupy. Ha'e vy Senhor pe ojerure vy
3aipoe'i:
— Senhor, ajerure ndevy. Nema'endu'a ke nerenonde rupi ha'evea rami aikoague re, xepy'a ha'e javi py. Ha'evea ramigua ajapo aikovy va'ekue nerenonde rupi — he'i. Ha'e vy ojae'o vaipa oupy.
4Ha'e gui Isaías pe Senhor ombou ju oayvu. Ha'e vy aipoe'i:
5— Ejevy ke, ha'e vy aipo're Ezequias pe: Po rami Senhor neramoĩ Davi ruete va'e ijayvu: “Xee aendu ma renhembo'ea, nderexay aexa guive. Ha'e vy amoĩve 'rã nde'ára quinze ma'etỹ peve ju.
6Ha'e vy rogueraa jepe 'rã Assíria pygua huvixa po gui, kova'e tetã guive. Aepy 'rã kova'e tetã”, he'i.
7Pova'e nunga Senhor oexa uka 'rã ndevy, reikuaa aguã oayvuague ojapo 'rãa.
8“Tape pyrõ-pyrõarã Acaz ojapo va'ekue re ajapo 'rã kuaray'ã dez pyrõa hakykue katy ju ojevy aguã rami”, he'i. Ha'e gui ha'ekue rami ae ojapo kuaray'ã dez pyrõa peve hakykue katy ju ojevy aguã rami.
Ezequias oporaeiague
9Ha'e ramo Judá pygua huvixa Ezequias imba'eaxy vaipa oupyague gui opu'ã ju ma rire po rami oporaei:
10— Xee aipoa'e va'ekue:
“Xembaraete rei reve aikovea py teĩ
aỹ aike ta yvyra rupa rokẽ rupi.
Mba'eta xegui oipe'aa ta ma aikovea ma'etỹ”, ha'e va'ekue.
11Aipoa'eve ju va'ekue:
“Okuave va'e yvy re xee ndaexavei ma 'rã Senhor.
Neĩ peteĩve ava ma voi ndaexavei ma 'rã yvy re hekoa va'e.
12Mba'eta xegui aikovea'i oipe'aa ta heravy mombyry,
vexa'i re opena va'e okeaty ombovaipaa rami.
Ajukue apoa rami rejaya ta xerekovea nhimbo rami.
Ára oaxa rã pytũa rami rejapo xerekovea opa aguã rami.
13Xee arõ are ma ainy ko'ẽ rai peve,
ha'e rã ha'e ma guary rami omopẽmba xekãgue.
Ára oaxa rã pytũa rami rejapo xerekovea opa aguã rami”, ha'e va'ekue.
14— Mbyju'i e'ỹ vy jeruxi rami avi anhe'ẽ aikovy va'ekue,
apykaxu rami xepoaẽ rei va'ekue.
Xerexa voi ikangypa ma yvate katy ama'ẽ riae ete rã.
“ Senhor, ajexavai rei aikovy, xembovai ke”, ha'e va'ekue.
15— Ha'e gui aỹ ma marã rami nda'u xeayvu 'rã?
Ndee ndeayvuague rami ae xerereko.
Ha'e nunga rupi aikovea pukukue re ha'evepa rei'i 'rã aikovy,
xerekovea ojexavai vaipa rire.
16Senhor, ha'e rami ndee orereko ramo ore avakue roikove,
xenhe'ẽ voi ha'e nunga re ae 'rã oĩ.
Mba'eta xemoexaĩ vy xemoingove ju.
17Xembopy'a porã ju aguã ae xembojexavai va'ekue.
Mba'eta ndee ma xerekovea reayvu vy
xereraa jepe yvykua py xevaipa aguã gui,
mba'eta nderakykue katy remombopa ma ajejavyague ha'e javi.
18Ha'e gui yvyra rupa py ma avave nandererovy'aai 'rã,
manoa py nanemboeteai 'rã.
Yvy kua katy oguejy va'ekue ma noarõvei 'rã okuapy anhetẽ ete va'e rupi reikoa.
19Okuave va'e anho 'rã ndereroporaei,
kova'e ára xee rogueroporaeia rami.
Ha'e tuu kuery omombe'u 'rã gua'y kuery pe anhetẽ ete va'e rupi reikoa.
20Mba'eta Senhor ou vy xereraa jepe.
Ha'e nunga rupi mba'epu ixã va'e nhambojoguy reve
jaroporaei 'rã ára nhavõ jaikovea pukukue re,
Senhor pegua oo py — he'i.
21Mba'eta Isaías aipoe'i ae va'ekue: “Peru figo'a oumbiri pyre, ha'e pemboja ijai re. Ha'e ramo okuera 'rã imba'eaxya gui”, he'i va'ekue.
22Ezequias voi aipoe'i va'ekue: “Mba'e nunga tu oiko 'rã aikuaa aguã Senhor ro py ju aa 'rãa?” he'i va'ekue.
