Oséias 3
Nhanderuete nhomboaxy aguã re ijayvuague
1Senhor aipoe'ive ju xevy:
— Teĩgue ju tereo, eayvu ju kunha neirũ oayvu va'ekue itavy rei teĩ. Senhor Israel kuery oayvua rami eiko, ha'e kuery ma nguuete ramigua pe mbojape uva pirukue revegua ome'ẽxe vai va'eri — he'i.
2Ha'e ramo xee ma xera'yxyrã ju ajogua, quinze hatã'i va'e prata guigua ha'e quinze voxa cevada ame'ẽ vy.
3Ha'e vy ixupe aipoa'e:
— Ha'e gui ndee ma heta ára re teri 'rã xerarõve. Ndetavy reive eme, amboae ava reve eiko eme guive. Ha'e ramo xee voi roarõ 'rã aikovy — ha'e.
4Mba'eta Israel kuery ma heta ma'etỹ re 'rã ikuai nguvixa e'ỹ re, opena va'e e'ỹ re, Nhanderuete pe mba'emo ome'ẽ e'ỹ re, ta'angaarã ita omopu'ã va'ekue e'ỹ re, sacerdote i-manto va'e e'ỹ re, ha'e mba'emo ra'angaa ngoo rupi oguereko va'ekue e'ỹ re guive.
5Ha'e va'e rire Israel kuery ojevypa vy oeka ju 'rã okuapy Senhor nguuete ha'e Davi nguvixarã. Ha'e rami vy opaa ára ha'e kuery oryryipa reve 'rã onhemboja jogueruvy Senhor re onhemboaxy uka vy.
© 2004, Sociedade Bíblica do Brasil; © 2014, Wycliffe Bible Translators, Inc.
