Habacuque 3

₂Senhor, ndeayvua aendu vy

aendu avi anhemondyia.

Senhor, ore kuery ára py ju ejapo ymave rupi rejapo va'ekue ramigua.

Ore'ára py ju ejapo ha'e nunga oikuaapaa aguã rami.

Ndepoxya ramive ma nema'endu'a avi ke renhomboaxy aguã re.

₃Nhanderuete ma ou oiny Temã gui,

Parã yvyty gui ou Iky'a e'ỹ va'e.

Hexakãa omonyẽ yva,

yvy voi tynyẽ ogueroporai va'e.

₄Hexakãa ma tataendy rexakã rami,

ipo gui ma nhemboxi ojekuaa,

opo'aka onhomiague gui.

₅Guenonde rupi ombou mba'eaxy vaikue,

guakykue rupi voi nhomoingo axya omoingo.

₆Ha'e opyta vy rive ojapo yvy oryryipa aguã rami.

Oma'ẽ ho'amy vy rive ombojaity yvy regua kuery.

Ha'e ramo yvy jypygua va'e iku'ipa,

yvy'ã oĩ riae 'rã va'ekue voi ho'apa.

Ha'e rã Nhanderuete oikoa ma imarã e'ỹ va'e.

₇Cusã yvy re aexa oguy py ikuai va'e ojexavai rã,

ha'e Midiã yvy re ijaty va'e kuery oryryipa.

₈Senhor, yakã pe teve ndepoxy?

Yakã'i ikuai va'e pe teve,

e'ỹ vy ye'ẽ pe ndevai?

Mba'eta reguata reovy nerymba kavaju áry,

ndekaróxa py reju ndepo'akaa rexa uka vy.

₉Nderapa renoẽ renhomiague gui,

nderu'y ryru ma tynyẽ vaipa.

Yvy remboja'o yakã renhono vy.

₁₀Yvyty ikuai va'e nderexa vy ojero'a okuapy,

ha'e vy ojapo yvy'ã guy katy yy oxyry atã aguã rami.

Ye'ẽ voi typyvea guive hevovo nhendu,

ha'e yvate katy oupi opo.

₁₁Kuaray ha'e jaxy ma oĩa py ae opyta

nderu'y onhe'ẽ ovy va'e hexakãmba rã,

ha'e nderu'y guaxu hexakã va'e overa gui.

₁₂Rejou vaia rupi reguata reovy yvy jave rupi,

ndepoxya rupi repyrõmba yvy regua kuery re.

₁₃Ndejeupegua kuery reraa jepe vy ae reo,

huvixarã remoĩ va'ekue reraa jepe aguã.

Ha'e rami vy rembovaipa heko vai va'e kuery ro ao'ia,

hoo yta voi remboipa.

₁₄Nderovaigua xondaro kuery ru'y py ae reikutu inhakã rupi,

ha'e kuery yvytu atã rami xemokanhy aguã ou jave.

Ovy'a reve ou va'ekue nhemi rupi iporiaukue'i omokanhymbaa rami.

₁₅Ha'e gui ndee ma ye'ẽ áry rupi reguata rejuvy nerymba kavaju kuery reve,

yy oje'apa va'e rupi ae.

₁₆Ha'e nunga aendu vy anhemondyipa.

Ndeayvua gui xerembe ryryipa.

Xekãgue hu'ũmba rei,

xerenapy'ã voi ikangypa.

Ha'e rami teĩ akyrirĩ reve 'rã arõ aikovy jexavaia ára ovaẽ aguã,

mba'eta ou 'rãe orere opu'ã rei va'e kuery áry.

₁₇Xapy'a rei figo'y nda'ipoty porãi 'rã,

ha'e uva'y re hi'a noĩ,

oliveira ndai'a porãi,

ha'e mba'ety rupi voi ja'u va'erã ndoikoi,

vexa'i kuery oipe'apaa 'rã heravy ikora gui,

ha'e vaka voi ikora py nda'ipovei teĩ,

₁₈xee ma arovy'a riae 'rã Senhor,

avy'a 'rã Nhanderuete xereraa jepea re.

₁₉Senhor Nhanderuete ma anhemiaty oĩ.

Ha'e ojapo xepy oĩ atã aguã rami guaxu rami ae,

yvate rupi aiko aguã.