2 Samuel 22

— Senhor, ndee ma xe'itaova.

Ndee ma oo imbaraete va'e ha'e xerepya.

₃Xeruete ma xe'itaova anhemiaty,

mba'emo vai jokoa, xereraa jepea imbaraete va'e,

oo yvate va'e, ha'e anhemiaty.

Ndee Xeruete, xereraa jepe 'rã xejukaxea kuery gui.

₄Ajapukai Senhor ogueroporaeipy va'e pe.

Ha'e rami vy aa jepe 'rã xerovaigua kuery gui.

₅Manoa pygua xejoko va'ekue yai rami,

heko vai va'e yai rami xere opu'ã vy xemongyje.

₆Manoa pygua xejokua va'ekue,

nhu'ã xã xejura xapy'a.

₇Ha'e ramo ajexavaia py ajapukai karamboae Senhor pe.

Xeruete pe ajapukai ainy.

Ha'e rã ojeupegua templo gui oendu xeayvua,

ijapyxa peve ajapukaia ovaẽ ramo.

₈Ha'e ramo yvy omyĩ ha'e oryryi.

Yva yta ikuai va'e voi ovavapa, oryryipa,

ogueropoxy ramo.

₉Inhapyĩgua gui opu'ã hataxĩ,

ijuru gui ma tata nhomombaarã oẽ,

tapyĩ hexakã va'e.

₁₀Yva omo'yvyĩ vy oguejy,

ipy guýry pytũ vaikue oĩ reve.

₁₁Peteĩ anjo ipepo va'e áry oĩ vy oveve ouvy,

yvytu opepo áry ogueru pojava ramo.

₁₂Oyvýry rupi rami omoĩ pytũ reia oo'irã,

pytũ, yy ijatya ha'e yva re arai ikuai va'e voi.

₁₃Hexakãa henonde oo va'e gui

hendy ovy tapyĩ rexakã ramigua.

₁₄Ha'e gui Senhor yapu yva re,

Yvate ete va'e ijayvu atã.

₁₅Ngu'y omombo vy omoaĩmba xerovaigua kuery.

Overa vy omondyipa.

₁₆Ha'e ramo ojekuaa yy rupa,

ha'e yvy yta avi ojekuaapa,

ndeayvu atãa py Senhor,

ndepoxya rupi neapyĩgua gui nepytuẽ ramo.

₁₇Yvate gui ha'e okuave'ẽ vy xejopy,

xerenoẽ yy tuvixa va'e gui.

₁₈Xereraa jepe xerovaigua kuery imbaraete va'e gui,

xemomboriau rei va'e kuery gui ae,

xegui ipo'akave ete va'ekue ri.

₁₉Xere ha'e kuery opu'ãmba rei ajexavai jave,

teĩ Senhor onhemoĩ xepytyvõarã.

₂₀Ha'e rami vy xereru peteĩ henda ipa'ũ ja'eavea py.

Xereraa jepe xererovy'a vy.

₂₁Xereko porãa re Senhor xerereko porã,

xevy pe ome'ẽ ndaxepo ky'aiague repy.

₂₂Mba'eta xee ma Senhor guigua tape rupi aiko va'e,

ndajepe'ai Xeruete gui ha'eve'ỹa rami aiko aguã.

₂₃Xejee amoĩ ijayvuague ha'e javi,

xejegui ndaipe'ai ayvu omoĩ va'ekue.

₂₄Henonde aiko anhetẽa rupi,

ajejoko teko vai rupi aiko e'ỹ aguã.

₂₅Ha'e ramo Senhor ome'ẽ xereko porãague repy,

henonde rupi ndaxereko ky'ai rire.

₂₆Heko porã va'e kuery pe rejekuaa uka 'rã heko porã va'e,

anhetẽ rupi ikuai va'e pe rejekuaa uka anhetẽ rupigua avi,

₂₇iky'a e'ỹ va'e pe rejekuaa uka iky'a e'ỹ va'e,

ha'e rã heko vai va'e pe ma rejekuaa uka 'rã nhombopaga kuaa va'e.

₂₈Ndee reraa jepe 'rã onhemo'yvyĩ'i va'e,

ha'e rã oma'ẽ vaikue reia rupi onhemboyvate va'e ma remomba 'rã.

₂₉Ndee Senhor ma xerexapea,

Senhor omoexakã pytũ rupi aiko rã.

₃₀Ndereve vy amomba 'rã xondaro kuery,

Xeruete reve vy apo 'rã hetã kora áry rupi.

₃₁Nhanderuete guigua tape ma iky'a e'ỹ va'e,

Senhor ayvu ma oa'anga pyre.

Hexe onhemi va'e ha'e javi pe ma mba'emo vai jokoa oiko.

₃₂Mava'e tu Nhanderuete oiko Senhor e'ỹ vy?

Mava'e tu nhande'itaova oiko Nhanderuete e'ỹ vy?

₃₃Nhanderuete ma xemombaraetea xekangy e'ỹ aguã,

omoatyrõ 'rã aguata aguã rupi.

₃₄Ha'e ojapo xepy guaxu rami inhakuã aguã.

Ha'e vy yvatea rupi xemoingo.

₃₅Xepo pe voi ome'ẽ joe apu'ã kuaa aguã.

Ha'e ramo guyrapa overa va'e guigua voi aipira 'rã.

₃₆Mba'emo vai jokoarã reme'ẽ xereraa jepea,

xemboaxya rupi xemboyvate.

₃₇Apyrõ aguã tape rembopyve ramo

ndaxepyxyryi 'rã.

₃₈Xerovaigua kuery amonha 'rã aupity peve.

Amomba rire ma ajevy ju.

₃₉Amomba ae, amou'ũmba opu'ã aguã nda'evevei peve.

Xepy yvýry ho'apa.

₄₀Mba'eta ndee xemombaraete ajoguero'a kuaa aguã,

rejapo xere opu'ã va'ekue re xepo'aka aguã rami.

₄₁Xerovaigua kuery rejapo ojavapa aguã rami.

Xerayvu e'ỹ va'e amomba.

₄₂Ha'e kuery oma'ẽ rã avave rei ndoepyai.

Tá, Senhor pe ha'e kuery ojapukai teĩ nombovai.

₄₃Ha'e ramo amongu'ipa yvy ku'i rami.

Amou'ũmba, yapo tape guiguare rami amomba.

₄₄Xeretã pygua kuery xere opu'ãa gui xereraa jepe,

xemoĩ yvy regua kuery ruvixarã.

Amboae regua kuery ndaexai va'ety voi xevygua ikuai.

₄₅Amboae regua kuery xenhe'ẽ rendu.

Xeayvu oendu vy ojapopa okuapy.

₄₆Ha'e gui amboae regua kuery okanhymba,

onhemiague gui oẽmba onhemondyipa vy.

₄₇Senhor ma oikove va'e, togueroayvu porãa xe'itaova!

Tomboetea Xeruete, ita xereraa jepea.

₄₈Nhanderuete xerepy vy jojukapa,

heta va'e kuery re xembopo'aka.

₄₉Nhanderuete ae xereraa jepe xerovaigua kuery gui.

Ndee ma xemboyvate xerovaigua kuery áry,

ha'e xerepy avakue jojuka va'ety po gui.

₅₀Ha'e ramo Senhor, roguerovy'a 'rã yvy regua kuery oendua py,

aporaei 'rã nderery rupi.

₅₁Ha'e ae ombopo'aka 'rã huvixave omoĩ va'ekue,

oexa uka 'rã guembiporavo oayvua,

Davi ha'e hamymino kuery pe, raka'e rã peve.