1Ha'e gui Israel kuery rovai Satanás opu'ã vy Davi py'a re omoĩ Israel kuery oipapapa aguã.
2Ha'e rami vy Davi aipoe'i Joabe ha'e heta va'e kuery ruvixa ikuai va'e pe:
— Tapeo, peipapapa Israel kuery ikuai va'e, Berseba guive Dã peve. Ha'e vy peikuaa va'ekue peru ju xea py, xee voi aikuaa aguã mbovy pa ikuaia — he'i.
3Joabe ombovai:
— Ha'e rami avi tove Senhor Nderuete tomboetave cem-kue ju. Ha'e rami teĩ Xeruvixa, ha'e kuery ha'e javi e'ỹ teve nerembiguai ikuai? Mba'e re tu ha'e rami ete rejapoxe? Xeruvixa, mba'e re tu ha'e rami ete rejapo Israel kuery ha'e javi re jejavya ou aguã rami? — he'i.
4Ha'e rami teĩ huvixa ayvu Joabe ijayvua gui ipoyive ramo Joabe oo vy Israel yvy ha'e javi rupi oikuaa pota. Ha'e gui mae ma ojevy ju Jerusalém katy,
5ha'e Davi pe omombe'u heta va'e kuery mbovy pa ikuaia. Israel re avakue kyxe oiporu kuaa va'e ma um milhão e cem mil ikuai ra'e. Ha'e rã Judá py ma quatrocentos e setenta mil ikuai avakue kyxe oiporu kuaa va'e.
6Ha'e rã ha'e kuery reve Levi ha'e Benjamim regua ma Joabe ndoipapai, huvixa ayvu ndojou porãi ete vy.
7Ha'e nunga ha'e javi Nhanderuete ndojou porãi vy omoingo axy Israel kuery.
8Ha'e ramo Davi aipoe'i Nhanderuete pe:
— Ajejavy vaipa ra'e ha'e rami ajapoa py. Ha'e rami teĩ aỹ Senhor, ajerure xee nerembiguai ajejavyague rembogue aguã, inhakã porã ve'ỹ va'e rami aiko rire — he'i.
9Ha'e gui Senhor ijayvu Davi pegua profeta Gade pe. Ha'e vy aipoe'i:
10— Tereo aipo're Davi pe: “Po rami Senhor ijayvu: ‘Mboapy regua va'e peteĩ ma ambou 'rã ndere. Ha'e va'e regua peteĩ eiporavo ajapo aguã’, he'i.”
11Ha'e ramo Davi oĩa py Gade ou vy aipoe'i ixupe:
— Senhor ma po rami ijayvu: “Eiporavo reipota va'e rei:
12Mboapy ma'etỹ re karuai oiko aguã, tyrã pa mboapy ma'etỹ re nderovaigua kuery nhandereity aguã kyxe nderupitya py, tyrã pa mboapy ára re Senhor okyxe ae oiporu aguã. Ha'e va'e ma mba'eaxy vaikue oiko aguã ndeyvy re, Israel ha'e javi rupi Senhor-a guigua anjo nhomokanhymba aguã.” Eikuaa pota porã ke aỹ, xembouare pe ambovai kuaa aguã — he'i.
13Ha'e ramo Davi ombovai Gade pe:
— Xee ma ajexavai vaipaa aendu. Ha'eveve Senhor po py anhemboaxa uka rã, mba'eta ha'e ma opa e'ỹ va'e nhanemboaxy va'e. Ha'e rã avakue po py ma xee nanhemboaxa ukaxei — he'i.
14Ha'e rami rã Senhor ombou mba'eaxy vaikue Israel ha'e javi rupi. Ha'e ramo Israel kuery va'e regua setenta mil avakue omano.
15Jerusalém tetã py voi Nhanderuete ombou peteĩ anjo nhomombaarã. Ha'e rami teĩ omomba ta ma ramo Senhor oma'ẽ vy opytu'u ma mba'emo vai omoingoa gui. Ha'e vy aipoe'i anjo nhomombaarã ombou va'ekue pe:
— Ha'eve ma, emboguejy ju ndepo — he'i. Ha'e va'e jave ma anjo hi'aĩ jebuseu regua Ornã mba'emo moa'yĩaty yvy'iry.
16Ha'e gui Davi oma'ẽ vy oexa anjo Senhor-a guigua yvy ha'e yva mbyte opyta rã, opo py kyxe oekyi va'ekue oupi ho'amy Jerusalém rovai. Ha'e ramo Davi ha'e nhomongeta va'ety kuery hexeve ikuai va'e ajukue vaikue py onhemonde reve ojero'apa vy yvy re ngova omovaẽ okuapy.
17Ha'e ramo Davi aipoe'i Nhanderuete pe:
— Xee ae e'ỹ ri ty'y heta va'e kuery aipapa aguã re xeayvu va'ekue? Xee rima ajejavy, xee ae ha'eve'ỹ va'e ajapo. Ha'e rã kova'e vexa'i kuery, mba'e tu ha'e kuery ojapo? Senhor Xeruete, xerovai anho eupi ndepo, ha'e xeru ro pygua kuery rovai. Ha'e rã ndevygua kuery ma embopaga eme.
18Ha'e gui ma Senhor-a guigua anjo aipoe'i Gade pe:
— Davi too peteĩ altar Senhor peguarã tojapo, jebuseu regua Ornã mba'emo moa'yĩaty py — he'i.
19Ha'e gui Senhor rery rupi Gade ha'e rami ijayvu ramo Davi oo ijayvuague rami vy.
20Ornã ma ha'e va'e jave trigo moa'yĩa rupi oiko. Ha'e gui ojere vy oexa anjo hi'aĩ rã. Ha'e ramo hexeve ta'y kuery irundy omba'eapo okuapy va'e onhemimba jogueravy.
21Ha'e gui Ornã oĩa py Davi ovaẽ ouvy ramo oma'ẽ. Oexa kuaa vy mba'emo moa'yĩaty gui oẽ vy Davi renonde py oĩ guenapy'ã re, ngova yvy re omovaẽ reve.
22Davi aipoe'i Ornã pe:
— Xevy pe eme'ẽ kova'e yvy peteĩ altar Senhor peguarã ajapo aguã, mba'eaxy vaikue heta va'e kuery áry ombou va'ekue opytu'u aguã. Emboaxa xevy, ha'e rã hepy xee ame'ẽ 'rã ha'evea rami.
23Ha'e rã Ornã aipoe'i Davi pe:
— Xeruvixa, ejopy tema ndejeupe guarã, ha'e ejapo reipota va'e rei. Apy ma vaka ikuai, ame'ẽ reapy reve reme'ẽ va'erã. Ame'ẽ avi yvyrape mba'emo moa'yĩaty regua yxakãrã, ha'e trigo ra'yĩgue guive reme'ẽ va'erã irũrã. Ame'ẽmba rive — he'i.
24Huvixa Davi ombovai Ornã:
— Any, ha'e rami 'rãgue py ndevy pe xee amboekovia 'rã hepyrã porã re. Mba'eta ndepo gui nda'evei ajopy rive aguã Senhor pe ame'ẽ va'erã. Ome'ẽ rive pyre ma xee name'ẽ reguai — he'i.
25Ha'e rami vy ha'e va'e yvy repyrã Davi ome'ẽ Ornã pe seiscentos hatã'i va'e ouro guigua.
26Ha'e py ma Davi ojapo altar Senhor peguarã. Hi'áry ma ome'ẽ mymba oapy reve, hexeve peteĩ rami ju ikuaia regua guive. Ha'e gui Senhor pe ojapukai ramo ombovai tata yva gui altar áry ombou vy.
27Ha'e gui anjo pe Senhor ijayvu ramo omboyru ju kyxe.
Templo oĩ aguã py mba'emo ome'ẽague
28Ha'e jave py Davi oexa rã jebuseu Ornã mba'emo omoa'yĩaty py Senhor ombovai. Ha'e rami vy mba'emo ome'ẽ ixupe ha'e py.
29Mba'eta ha'e va'e jave py ma oo'i Senhor peguarã tekoa e'ỹa py Moisés ojapo va'ekue ma Gibeão yvy'ã re teri oĩ, altar mba'emo oapyaty voi.
30Ha'e katy nda'evei Davi oo aguã Nhanderuete pe oporandu aguã, Senhor-a guigua anjo kyxe oguereko va'e gui okyje vy.
