Meme zati, nami zati narraro tauimarini
1Nezape qqui onapomanerre meme zati, nami zati qqui onarraro. Arri taidecca meme, nami narrarope amossi narraro. Passo imeni naqui amossi narraro. 2Deo pocca oza panani bicabote Zerozare zati qqui onade. Deo Poua tezerrema memeuarri ccaronade. Zerozarepe pina amonerre maqqui carriniuarrine narrorarrarossa narraro, bicarizaponi nade. 3Nezape memeuarri Deni torrauicca uiuittari bicabote cauittariniuarri touatti moui tehe omittarraro: —Rridapanapa Deo madirraza madiui. Pouadeniza madi-zanapouitoui. Madirra bazima Deocca cacaueheza toquerrenauitoui. Deopa pouadeni Cacauade torrazanapouitoui. 4Pouapa inocco pparrani sse inanitoui, denima orri inerreraniuarrine. Iaza Deo madizapa zoqquehe noue, orrie noue, ettima orri orri inarraro noue, coma inarraro naqui noueranitoui. Arri uima uapima namiza carri taporrarope rricanitoui −nade.
5Nazapa arra Deni torrauicca uiuittariza uittari canarrari Attipa: —Ouape bazima zati onanarizaui −nade. Poua Atti onihi naqui: —Arrirraro uima dozo tarri. Arrirraro uimape parrissa. Uimape pina arrirrarossa nehe torranitoui −nade. 6Nazapa ouaza uati tarrari: —Arrirraro uima uati onarrarope torranissa tehe rricani. Ouape Oua. Arrirraro zama nauatopo-rreraccazama omadiporraro. Niza zotode arrirraro zama rricaraha Ouape omadi-zanaponitoui. Madirra bacco rrocorizazapa passo camittehecca qquenarraro ze nauiuarrine pouaza da onanitoui. Pouaza: Manaconi, onerreranitoui. 7Arri occa dacorehema timadimaneza Ouaza rrehe tiquenarraro tinebomana-rrerezape rridacca uati uati onaporraro bazima tiadeniza torrarizanitoui. Ouape ticcadeni Deo orranitoui. Tiadenipe occa erredeni tiquerrenanitoui. 8Naraha Ouaza toquerrena-rrararraridenipa narrizoue carrimanauitoui. Arra madirra: “Zeso Cristopa oua Idinide” quenauiuarrine uatide cappinaqquiri narrari, madirra Zeso Cristoza parrissa quena-rrararrarideni, uima uaidira taniccaza dameraqquiri narrarideni, madirra poua tesse nanazoqquede damera tarrari narrizoue carrimanauitoui. Arra uananehecca dameraqquiri narrarideni, zoppinerredeni, siba nauatoniza uauatizemana narrarideni, mamaizadedeni naco narrizoue carrimanauitoui. Narrarideni bazimapa coriza imeni enxofre rrororo cananiuarri ua tozippauitoui. Narrarope zoqquehe zotodecca −nade. (Nanizape narrizoue rriquerreranicca tonauanemana-zanapouitoui.)
Oza panani Zerozare zati tauimarini
9Nazapa Deocca zozosse tabaqqui memeuarricca 7 quenaha tasaza narrizoue oppina tanicca carririzemanaporrari orraria ccarronaza ouaza uati tarrari: —Arri ticcarronarri, Eueue Bedicca amonerre torraniuarrine narrorarraro tia qqui onanana −nade.
10Nezape Deo Corimerrine uima ouaza auato tarraro. Pina occa uadassa neza qqui onarraro. Ocattoma cananerre Deocca zozosse ssono motaraniuarri oua touaccarrari. Naniuarri ouaza auato inanarraro. Memeuarri Deo pocca oza panani bicabote Zerozare Deo Poua tezerrema ccaronani qqui onade. 11Narraro oza pananipe Deo pocca deni torrehe, poua ssiuerrenerrine zibehi tarraro. Narraro zibehinipe pina siba uatini ccara tanicca diamante zibehinissa narraro. Ssiuarra tarraro pina cristalinossa narraro. 12Oza panani uapiuarripe siba ua nauarranini arabo tarraro. Motarehema ccauarranirraro. Totoqquezima 12 nehe carrirraro. Narraro totoqquezimaza Deocca zozosse tabaqqui orrari orrari naha uaueri narizarrari. Totoqquezimaza onideni dozo narizarrarope zodeodenicca idi orraria oni Izarraeo bedi 12 quenarrari onideni. 13Marri ccarronauiuarripe totoqquezima 3 nehe carrirraro. Marri toccauiuarri naqui totoqquezima 3 nehe carrirraro. Arobeniuarri naqui totoqquezima 3 nehe carrirraro. Arobeni onihiuarri naqui totoqquezima 3 nehe carrirraro. 14Oza pananicca siba ua nauarranirraro tocadacorade siba imeni 12 nehe carrirraro. Narraro siba 12 narrarozape Eueue Bedi Zeso poua uatimadedeni 12 quenarrari onideni dozo narizani qqui onade.
15Arra Deocca zozosse ouaza uati tarraripa nanattome orocca zibehi tarraro zorro inarrari. Narraroza oza panani, noccobirri, ua nauarranini naqui nattomede torrarizarrari. 16Nazama oza panani arabonipe arriuarri nema arriuiuarri nema caniqquimerarraro. Deocca zozosse oza panani nattome inezape 2 mil, 200 quilometros (2.200) carrirraro. Neza tetepi araboni naqui arriuarri nema arriuarri nema caniqquimerarraro. 17Nezape ua nauarranini nattome ineza sibanipe 65 metros. Narraro nanattomepe arrirraro nami nanattomeza Deocca zozosse nattome inarraro.
18Oza panani uapiuarricca ua nauarranirrarope diamanteza nauatorraro. Oza pananipe oro poniraza canauatorraro. Narraro orope pina jaspe ssiuarra tarrarissa narraro, tocassiuerreqquimera narraro. 19Arri oza pananicca ua nauarranirraro tocadacorade siba imeni 12 quenarrarozape siba bedeni zibehini bicabote nepi narizarraro. Siba bedeni rranonipe onihi onihi narizarraro. Oninipe arrima narraro: Taidecca siba imenizape diamante zibehi tarraro irririzarraro. Zotodeccazape sapira soue tarraro irririzarraro. Onihi 3 naniccazape acata macconi rranoni carrini irririzarraro. Onihi 4 naniccazape esemeraoda soueni ssiuarra tarraro irririzarraro. 20Onihi 5 naniccazape onise soue tarraro moponiza carrimarraro irririzarraro. 6 naniccazape robi macco tarraro irririzarraro. 7 naniccazape crisolito uesse tarraro irririzarraro. 8 naniccazape berilo macconi, soueni, uesseni irririzarraro. 9 naniccazape topasio macco-cco narraro irririzarraro. 10 naniccazape crisoprasa soueni uesse tarraro irririzarraro. 11 naniccazape jasinto soueni irririzarraro. 12 naniccazape ametista soueni idira tarraro irririzarraro. 21Arri totoqquezima 12 narrarope perola moponi zibehi tarraro 12 nehe uacossarizarraro. Perola orrariepe totoqquezimaza orrari orrari narizarraro. Oza pananicca rraui bazimape zibehini oro ponira irrirraro, tocassiuerreqquimera narraro.
22Narraro oza pananizape Deoza dada toqquima oza qqui onerrerani. Deo Atti mamari naqui nouerarraro. Naraha ia Zozossede Deo Dacorabotena nauiza madirrari. Eueue Bedi Zeso naco nauiza madirrari. Iqueriqquiza etizeniuarrinepe pouadeni pamahazana ehetize naniuarrine. 23Deocca oza pananizapa marri noue, abazico ssiuerrene noueraui. Ssiuarra tarizarrarope Deo pocca deni torrehe, Poua ssiuerrenena parri. Eueue Bedi naco pina rrorrororossa narrari, poua ssiuerrene ssiuarra tarizarrari. 24Arri zama onihi onihi narizarrarocca madirra bazimapa narraro oza panani ssiuarraniza madimanauitoui. Zama onihi onihicca taminedeni naco poccadeni biquehe deni torranicca Deoza da iquenaniuarrine narraro oza pananiuarri zorro izimemananitoui. 25Totoqquezima touabehe nema zanaponitoui. Zomepe nouerani. Ssiuarrani ponira nema zanaponitoui. 26Zama bazimacca madirra poccadeni biquehe deni torranicca Deoza da iquenanitoui. Poccadeni zamacca biquehe naqui da iquenanitoui. 27Narraro oza pananiuarripe Deo nacassera tauicca noueranitoui. Madirra uimasiri totonanadedenipa rrauizima-rrarauitoui. Madirra mamaizadedeni naco rrauizima-rrarauitoui. Arra Eueue Bedicca papeo camittehe carrimana-zanapouiuarrineccaza onideni dozo narizarraridenira rrauizimaui orrariuitoui.
