Maraco 8

₁Nezape uada onihiza naqui madirra bazima Zesoza queriqquipomarrari. Madirra uapi taraha rripemanauiuarrine zamatapa rricarrari. Narraria arra Zeso poua uatimadedeni ua inabaqquiza pouadeniza uati tarrari: ₂—Madirraza ouati cauanariri canani. Uada 3 nehe ouaza rrauirizazapa pouadeni tapari rricarrari. ₃Naraha rripemanauiuarrine poccadeni ozauarri zosse onanibaqquizapa pemi uatiacossarra canimarana. Motadenipa zamarideni uarri tani −naui nade Zeso.

₄Naraha Zeso uatimadedeni attidenia: —Naraha iape madirra madide nouerauiuarri iqueriqquizape nerrecoma ineza madirra inarripabaqquiuiuarrine? −quenaui nade. ₅Nazapa pouadeniza uati tarrari: — Pao coma naha ticarrimanani? −naui nade. Naraha: —Pao 7 naha icarrini −quenaui nade.

₆Nazapa Zeso madirraza: —Bazima rrassi tinarizarri −naui nade. Nazapa Zeso pao 7 naha poua zepeza inaccaza Deoza uati tarrari: —Rrehe Abi Deo, peperri, ticca danirri iaza bica taui −nazapa pao icanabobirizarrari. Icanabobirizazapa poua uatimadedeniza da inabaqquirrari. Pouadenina madirra bazimaza da inabaqqui-rizemanarrari. ₇Aba bedi naco pamaha carrimanarrari. Narrari naco izaba naza Zeso Deoza uati tapomarrari: —Rrehe Abi Deo, peperri, ticca danirri iaza bica taui −nazapa izossebaqquirrari: —Aba naco da tinabaqquimanarro −naui nade. ₈Nazapa Zeso canauatori canarrarirrine pao, aba narrari touapiza madirra bazima rripemanazapa accararize-manarrari. Rripemanauissa taraha mota torrarrari. Pao bobi, aba ime mota inaccanirize-manazapa quiqui 7 naha irririzarrari nade. ₉Naza madirra rripemanarraridenipa 4 mil quenarrari. Rripemanaha rricazapa Zeso zosse inanibaqquirrari nade. ₁₀Nazapa Zeso poua uatimadedeni tezerre darroniza rraui torrezarrari. Coriza rrippeuarri touaqquemanazapa zama Daomanotauarrina bacco toquenarrari.

₁₁Zesopa coriza rrippeuarri bacco nanipomaza nauicca Izarraeo potemaui zodeodeni mota marinarra parizeoza rrehe quenarraridenipa poua qquide rrauirronarrari. Zesoza bacco quenazapa poua tezerre arrauarri uati arrauarri uati quenarrari. Pouadeni bodipa: —Zeso nattome inana, pocca uima tossamoniuarrine −quenazapa Zesoza uati toquenarrari: —Zeso, parrissa Deocca dacorehe ticarrizape memeuarricca nauatoue bicabote auato tinanarri. Qqui inana, inarraro −quenaui nade. ₁₂Nazapa Zeso poua bodi tonacasseraui naza rrazirema poua ssa tocanacossaza uati tarrari: —Nerrecotoui arra rridapana madirra madimanarraridenipa ocanauatoriri cananiuarrine touira uati toquenarrari? Parrissehera tiadeniza uati onarraro: Rridapana madimanarrarideniza occa nauatoue onauatona onerrerani −naui nade Zeso. ₁₃Nazapa inebobaqquiza darroniza toqquezanipomazapa pocca zozosse tabaqqui tezerre rrippeuarri rraui torrarrari nade.

₁₄Coriza rrippeuarri rraui torraraha rripemanauiuarrine poccadeni zamatapa uatideni rrimemanazapa iaqquemanarraraui. Pouadenipa pao orraria naui darroniza carrimanaraha bazimaza parrire-rraraui. ₁₅Nazama naui darroniza rrassi zaza Zeso pouadeniza uati tarrari: —Tetideni uatorri. Zodeodenicca marinarra onini parizeo, arri tamine Erodicca uima naqui pina pao ssarra tauiuarrine cacarrima tauimarissa narraro. Parri, narraro tiadeniza torra-rreraniuarrine tiadenipe dacoco tirrirarri, onarraro −naui nade Zeso. ₁₆Poua atti nama nazapa poua uatimadedeni pouadenira orriza uati tocanirere canarrari: —Nerrecotoui poua atti nama narrari? Arri irripaniuarrine pao icappirarrarocca uati tarrarirana −quenarrari. ₁₇Naraha Zesopa pouadeni bodi nauato tarrari: —Nerrecotoui pao ticappiremananicca uimazara uimahaha ticanarraro? Nerrecoma naza ticauatteraniuarrine? Nerrecoma naza occa marinarra timittemananiuarrine? Tibodideni narroqquiri narrarorane? ₁₈Tinoccodeni ticarrimaneraha qqui tiquenerrerarraroqui? Teribodeni naqui ticarrimaneraha timittemana-rrerarraroqui? Tinoccodeniza qqui tiquenaporaha tetideni rrimama canarrarorane? ₁₉Madirra 5 mil quenaraha pao 5 naha dize onaririzaza rriparizemanarrari. Motapa quiqui irririzaui nerrecoma naha tidirizemanatta? −narrari. Nazapa: —Quiqui 12 nade −quenarrari. ₂₀Nazapa Zeso: —Arra madirra 4 mil quenaraha pao 7 naha dize onaririzaza rriparizemanarrari. Motapa quiqui irririzaui nerrecoma naha tidirizemanatta? −narrari. Nazapa: —Quiqui 7 nade −quenarrari poua uatimadedeni. ₂₁Nazapa pouadeniza Zeso attipa: —Pao irripaniuarrine ocanauatoriri canani oparrireni. Naraha pao ticappiremananicca uima uati onerrerapa. Ticauattera-rreraccarraroqui? −naui nade Zeso.

₂₂Nazapa Zeso poua uatimadedeni tezerre oza panani Besaidauarri bacco toquenarrari. Nauicca madirrapa Zesoza nocco siri eccarronemanaza attidenipa: —Zeso ettiza nacassa tinaqui? Itesse nocco bara tarro, inarraro −quenaui nade. ₂₃Nazapa Zeso nocco siri zepeza dama inaza oza panani uapiuarri iaccarrari. Nazapa poua nassopeza nocco siri nocco pparra inanarrari. Nazana bara inaza pouaza uati tarrari: —Nirra, tinocco touatoqui? −naui nade. ₂₄Nazapa poua nocco ssire-re nazapa: —Rrehe, madirra qqui onabaqquiraha pouadenipa pina aua domoni ccarizarrarossa quenaui −naui nade nocco siri.

₂₅Nazapa nocco bara inapomazapa nocco touatonissa tarraro. Bazima qqui tarizauissa tarrari. ₂₆Nazapa zosse inanirrari pocca ozauarri: —Rrehe, ticca ozauarri ticcanirri. Naraha oza pananiuarripe tiqquezimani-rreraccarri −naui nade Zeso.

₂₇Nocco siri tonomiui zotodepa Zeso poua uatimadedeni tezerre rraui torrarrari. Oza panani Sezarea de Piripo rrauiuarri rraui torrazapa naniuarricca oza capamema narraro onihiza onihiza rrauirizarrari. Naza rraui rraui torraza Zesopa poua uatimadedeniza uati tarrari: —Madirra otauimari uati uati nanarizemana nazapa ouaza attideni nerrecoma nerrecoma quequenanaui? −narrari Zeso pouadeniza.

₂₈Naraha pouadeni attipa: —Tiaza madirra motapa: “Zouao Batista tirrani” quequenanarrari. Ouahadenipa: “Maittaccazamacca Deo Atti cacomerabote Eria tirrani” quequenanarrari. Ouahadeni naco: “Maittaccazamacca Deo Atti cacomerabote ouaha tirrani” quequenanarrari −quenaui nade Zeso uatimadedeni attidenipa.

₂₉Nazapa Zeso pouadeniza uati tapomarrari: —Naraha tiadenizape nerrecorrari orrani? −naui nade. Nazapa manaco Pedoro uati tarrari: —Tiape Cristo-Mesia tirrani −narrari.

₃₀Nazapa Zeso poua attipa: —Rrehe, bica tani. Naraha occa uimape madirra ouahadeniza tecomemanaccana −naui nade.

₃₁Zesopa poua uatimadedeni mari icanabaqquizapa arrama narrari: —Arri ouape Madirra Bedi orrarraroa niza zotode narrizoue imeni ocasserani ouanitoui. Zodeodeni ime rrocouideni, dada toqquimade taminedeni, zodeodenicca marinarra maridedeni quenarraridenipa oua ettarromananitoui. Nezape oua inanazoqque-mananitoui. Naraha oua ppa izemaneraha uada pama torrari nezape Abi Deo oua nauatoniuitoui −naui nade Zeso.

₃₂Zeso poua tezerremacca uima uati taza auato tarraro. Naraha Pedoroa Zeso iacca-cca naza uati tarrari: —Rridacca uima uati tinarraro ticca uima nema narraro uimape uati tina terrerarri −naui nade Pedoro. ₃₃Naraha Zeso tauide uarraniza poua uatimadedeni icattabaqqui naza Pedoroza uati tarrari: —Parri, otezerremape! Oua teccocco terrerarri, onarraro. Tettipe pina maizehe rrinede Tocorime-Tamine attissa tani. Tiape Deo nacassa tauicca ssamo tinani. Madirra touini quenarrariccana nauato tinarraro −naui nade Zeso.

₃₄Nazapa Zeso denima mari icanabaqquiuiuarrine madirra bazima, poua uatimadedenima ua inabaqquirrari. Poua attipa: —Arri “Zesocca madirra iquerrenana” tiquenezape tiadeni touini tiquenanicca toui tetideni rrimemanarri. Ouazara dameraqquiri tiquenarri. Madirra tiadeniza: “Aua porimacossaniza tizoqquerri” quenaza naco: “Rrehe, ozoqqueni bica tani. Zeso onebo-rraraui” titizanapomana nana, onarraro. ₃₅Tiadenipe ticcadeni madie ouaza teccoremanezape otauimari madirra tocassiuauerauiuarrinecca maride tiquerreneza naqui madirra tiadeni tonarricabaqqui-manaraha camittehe rriquerreranicca ticarrimana-zanaponitoui. Naraha madirra ouaha pocca madie ouaza acco taza arrirraro namiza madi zanapouiuarrine touinira nazapa zoqqueuitoui. Zoqquezapa camittehe rriquerreranicca carri-rrarauitoui −naui nade Zeso atti. ₃₆—Madirra naco arrirraro namicca biquehe touini madiza, arrirraro zamacca uima deni torranicca touini madiza naco uapima pouaza torreraha Deotoui narrarazapa niza poua zoqqueza rrororoni rriquerreraniuarri zori tarrarauitoui. Nazapa poua carrirraricca bazima ponima torranitoui. ₃₇Pouapa poua carrirrariccaza camittehe rriquerreranicca mitta inaniuarrine ssamo tani. ₃₈Arra rridapana madimanarrarideni Deo Atti inebomaneza uimasiri ihinanemana narraro. Narrarideni noppine madirra cappinemanazapa: “Zesocca madirra orrarrerani” quena taui. Occa marinarraza naco: “Omittana onerrerani” quena taui. Nama quenazapa manaco ouatti pouadeniza: “Occa madirra tiquerrena-rrerani” onanitoui. Ouape Madirra Bedi orrarraroa nizaranibote arrirraro namiza occaronapomezape occa Abi Deo ssiuerrenema, pocca zozosse tabaqqui memeuarricca tezerre occaronapomanitoui. Nazana: “Onocco rriza tani pouadeniza” onanitoui −naui nade Zeso.