Mateo 7

₁—Nazama tiadeniza ouattipe: Madirra ticatterrizemana tarrararro. Pina madirra ouahacca uima tiadeniza bica terrerezape: “A, namarride raui, pocca uima bica terrerani” tiquenerrerarri, onarraro. Madirradeniza tettideni nema tiquenerrerezape manaco Deopa tiadeniza: “Ticcadeni uima naqui bica terrerani” narrarauitoui. ₂Madirra ouahacca uima tibodideniza uatome-manarrarope pina pocca uima nattome tiquenarrarossa narraro. Naraha madirra ouahacca uima nattome tiquenezape manaco ticcadeni uima naqui nattome iquenanitoui. Madirra ouahaza tinanemanarrarocca uimape manaco tiadeniza narrarossa inanemananitoui, onarraro. ₃Neraha tiadenipe timecotecca madie pina Deocca zossenirrissa nerrerani qqui tiquenaza tettidenipe: “A, tirrine bica terrerani” titiquena neraha tiadeni naqui uimasiri ticarrimanani. Nazama narraro ticcadeni uimape pina timecote noccoza aua marriconi uezani qqui tinarrarocca uimassa narraro. Timecoteza: “A, tinoccoza aua marriconi uezaua tire oninena” teraha tinoccoza naqui aua marriconi imeni uezani. Qqui tinanissa terrerani, tinocco auatora tani. ₄Nazama tiadenipe uimasiri ticarrimanezape nerrecotoui timecotezara: “A, tirrine bica terrerani. Tia acco ocanana, ticca uima tobicaniuarrine” titiquena neraha tiadenipe taide ticcadeni uimaha tirrinedeni tobicapo-rrerarraro? ₅Rraho, nema tiquenezape pina mamaizadedenissa tiquenarraro! Ticcadeni uima bica terrerezape taide ticcadeni uimaha tinabiquemanaporri. Nazana timecote acco ticanemanauiuarrine tiparriremananitoui, onarraro −naui nade Zeso.

₆—Tiadeniza ouatti onihi naqui: Madirra Deo Atti mittade nacasseraqquiri narraridenipa pina ettessa, pina porocossa quenarrari. Etteza bica tanicca da tiquenaraha tiadeni ccanauitoui. Poroco naco pouaza perola bica tanicca da tiqueneraha ssamo taza ttai ttai inananitoui −naui nade Zeso.

₇—Rrehe, Abi Deoza uati uati titiquena narri, onarraro. Deo Pouaza uati tiquenezape tiadeniza ticcadeni uatinarrassa nehe da inanitoui. Pina touini tanicca qquide damera tinezape bacco tinanitoui. Narrarossa narraroa Deoza uatide damera tinezape Pouapa ticca uatinarra tiaza inaparrirenissa tanitoui. Pina madirracca ozaza tiqquezimaniuarrine touini tezape oza rrinedeza uaua teza tiaza totoqquezima icataborrizanitoui. Narrarossa narraroa Deoza uati uati tiquenezape ticcadeni uatinarra mittaui. ₈Parrissa! Madirra Deoza uati tazapa Deopa pouaza pocca uatinarra da inanitoui. Madirra naco Deoza uatide damera tazapa Deo Pouarrine pocca uatinarra inaparrirenissa tanitoui. Madirrapa pina Deocca totoqquezima uaua narrarissa naza Deopa pouaza totoqquezima icataborrizanitoui, onarraro.

₉—Arrana, madirrapa pocca erredeni pao toui uati tazapa poua bediza siba da ina taqui? Nouerani. Tiadenizapa madirra nama narrari noueraui. ₁₀Madirra ouaha naco pocca erredeni aba toui uati tazapa poua bediza macca da ina taco? Noueraui. ₁₁Tiadenipe uaidirehe ticarrimaneraha ticcadeni erredeniza bica tauicca dade nauatoqquiri tiquenani. Nazapa ticcadeni Abi Deo memeuarri madirrari Pouaza uati tiquenezape tiadeniza bica tauicca dade denima nacassa taui, onarraro −naui nade Zeso.

₁₂—Rrehe, nazama tiadeniza madirra bazima uima bicanira inanemananiuarrine touini tiquenezape madirra bazimaza naqui uima bicanira titinanemana narri, onarraro. Nema tiquenezana Deo Atti tecauemananissa tarraro. Arri Moizecca marinarrassa tinanemanarraro, Deo Atti cacomeraqquiri narraridenicca dozonirri naqui narrarossa tinanemanarraro, onarraro −naui nade Zeso.

₁₃—Deocca cacaueheza tiquerrenaniuarrinepe ouaza rrehe tiquenanissa tarri. Pina totoqquezima torrera taniuarri rraui tirrezimarrarossa tiquenarri. Madirrapa ouaza rrehe quena-rrararraridenipa pina totoqquezima torra taniuarri rraui torrezimarrarissa quenarrari. Pina rraui imeni toccade narrora taniuarri rraui torrarrarissa quenarrari. Neraha narraro rrauipe narrizoue rriquerreraniuarri toccarraro. Nauiuarrina madirra sibema toquerrenarrari. ₁₄Naraha madirra ouaza rrehe quenauissa tarraridenipa totoqquezima torrera taniuarri rraui torrezimarrari. Pina rraui bedeniuarri rraui torrarrarissa quenarrari. Narraro rrauiuarri rraui torraza Deocca cacaueheza bacco toquenazapa camittehe rriquerreranicca carrimanauitoui. Nauiuarripa madirra sibera zanapomanauitoui−naui nade Zeso.

₁₅—Rrehe, tiadeniza ouattipe: Parri, madirra mamaizadedeni tiadeni tocamaizabaqquiuiuarrine bacco toquenauitoui. “Deo tauimari ecomerarizarraro” quenaraha maizemanarrari. Pouadenipa pina eueue rroneqquiri narrarissa quenaraha bodidenipa pina zomarri oppinabotessa quenarrari. ₁₆Poccadeni madie tinoccodeniza qqui tiqueneza uima bicani inanemana-rrerezape nauatoqquiri tiquenaniuarrine: mamaizadedeni querrenarrari. Arrana cotiuiza uva bono bite bite quenaco? Noueraui. Rressi inineza naco piquera bono bite bite quenaco? Noueraui. ₁₇Aua ede bica tazapa bono naco bica taha caua taui. Naraha aua ede bica tarrarazapa bono naco uaidira taha caua taui. ₁₈Aua ede bicauizapa bono uaidira taha caua-rrararrari. Aua ede uaidira tazapa bono bica taha caua-rrararrari. ₁₉Aua bazimapa bono bicaui cappirarize-manazapa ca ippirizemanaza botta iquenarrari. ₂₀Arri madirracca uima naqui pina aua bonocca uimassa narraro. Madirrapa: “Deo tauimari ecomerarizarraro” quenaraha uima bicani inanemana-rrerezape mamaizadedeni querrenarrari nauatoqquiri tiquenani −naui nade Zeso.

₂₁—Madirrapa ouaza attideni: “Oua Zozossede” quequenanaui uapi taraha motapa Deocca cacaueheuarri rraui torrezima-rrarauitoui. Occa Abi Deo memeuarri madirrari Poua touini nauiccara inanemanarrarodenina Deocca cacaueheuarri rraui torrezimauitoui, onarraro. ₂₂Nazapa niza madirra bazimacca uima Deo icattemaniuarrinecca uada bacco tezape ouattiza iboqquiri narrarideni ouaza arrama quenauitoui: “Oua Zozossede, ticca uima bazimape ohouacomerariza naderra. Tia oni ua oneza naqui madirra bodidenicca tocorimedeni zosse zosse ohoninebaqqui naderra. Tia oni ua oneza naqui qqui toquenapo-rrararraricca ocanauatori canani uapi taderra” quenauitoui. Naraha narraridenipa Deocca cacaueheuarri rraui torrezima-rrarauitoui, onarraro. ₂₃Rrehe, niza zotode narrarideni motaza ouattipe: Tiadeniza onocco rriza tani. Occa madirra tiquerrena-rrerani. Deo Attiza iboqquiri tiquenezape Poua touini nauicca tinanemana-rrerarraro. Arri ouazape uarrirri tinarri! onanitoui −naui nade Zeso.

₂₄—Madirra ouatti mittemanaza ouattissa inanemanarrarope pina arra madirra pocca oza nauatode nauato tarrarissa quenarrari. Madirrapa pocca oza icanauatozape nami ccara taniuarri bacco tazana ueuema ppa izarraro. Nezape oza daco carrirarraro. ₂₅Nezape passo cca, ueni cappanima, passo toqquemorra, rrorrode rrazirema rro rro nezape ozaza ssonari ssonari neraha tocauedima-rrerarraro. Oza tocauedima-rrerarrarope ueuema nami ccara taniuarri bacco terre narraro. ₂₆Naraha madirra ouatti mittemanaraha ouattissa inanemana-rrerarrarope pina arra madirra pocca oza nauatode ssamo tarrarissa quenarrari. Narrari madirrapa pocca oza icanauatozape nami ccara taniuarri bacco terrerezape ueuema nami daco nanizara ppa izarraro. ₂₇Nezape passo cca, ueni cappanima, passo toqquemorra, rrorrode rrazirema rro rro nanerre nezape oza toqueuedimarraro. Oza toqueuedimazape catirorirrarossa narraro −naui nade Zeso.

₂₈Nazama Zeso iaza uati uati taha rricazapa nauiza madirra bazima tauaribobo canarrari bodidenipa: —A, pocca marinarra bica taua −quenade. ₂₉Zeso pocca marinarra mari icanabaqquizapa pouana nauatorride rarrari, atti carri tarraria. Arra zodeodenicca marinarra maridedeni attissa narrararrari.