Roca 5

₁Zesopa Carireauarri Deo Atti maride ccarizazapa Carireacca coriza onini onihi Zenezare inidiuarri toqquezipparrari. Nauizapa madirra uapi taha rrauirronarrari, Deo Atti mittemanauiuarrine. Nauizana Zeso quebericossabote narrari. ₂Nazapa Zeso qqui tanerre darroni capamehe irrirani ssiquiza cacoda narraro. Darroni rrinededenipa coriza inidiza tarrapa ssauade toquerrenarrari. ₃Darroni carrariepe Simaocca. Narraroza Zeso toqquezaza rrinedeza uati tarrari: —Simao, madirra domo uaui uarrirri canaza mari ocanabaqquiuiuarrine oua zo ticanarri −narrari. Nazapa Zeso darroniza uittizazapa madirra bazima mari icanabaqquirrari.

₄Nazapa mari icanabaqquia rricazapa Simaoza uati tarrari: —Ticca darroni arricca coriza nocconi zarra taniuarri ori ticanemaneza ticcadeni tarrapa coro ticazanemanarri, aba ticarrimananiuarrine −narrari Zeso. ₅Nazapa Simao Zesoza uati tarrari: —Ia Maride, iape zome inassiuarreraha aba icarri nerrerani −narrari. —Neraha ia ticazossebaqquizape icca tarrapa coro icazippana −narrari Simao.

₆Nazapa coriza nocconiuarri ori toquenaza tarrapa coro icazanemanarraro. Rroca icanimoremanezape aba carrirraro. Ccanarra tarrarirrine tarrapape catarrorirraro. ₇Nazapa pouadeni tesse darroni onihiccatoui zepedeni uaza uaza quenarrari, —Ibirri acco tocanabaqquina −quenaza. Bacco quenaza rroca icazemanezape aba uemarra narrari. Darroni capameraha carrirraro. Narrari aba qquenerrepa rre tocanemanabote narrari.

₈Nazapa Simao-Pedoro narrari aba uemaui qqui tazapa uarro narrari. Nazapa Simao Zeso baccouarri poua pitoza uitti naza uati tarrari: —Ia Zozossede, arri ouazape uarri tinarri! Ouape uimasiri sse onani −narrari. ₉Arra aba uemaui qqui toquenaza Simaopa cappinarrari, poua tessedeni naco cappinemanarrari. ₁₀Arra Simao poua tesse Zebedeo bedideni Tiaco, Zouao quenarrarideni naco: —A nerrecotoui aba uemarrari? −quenarrari. Bazima cappinemanaraha Zesopa Simaoza uati tarrari: —Ticappina terrerarri. Rridapanape madirra maride tirrana. Taidepe aba tiaza torrauiuarrine tizepe ihirri naccaderra neraha rridapanape madirra Deoza toquerrenauiuarrine tizepe irrizanaponitoui −narrari Zeso Simaoza.

₁₁Nazapa ori nanimanarrari. Coriza inidi bacco nanimanaza darronipe ssoqueque icazanemanarraro. Nazapa Zesoza rraui torrauiuarrinepa poccadeni darroni, poccadeni tarrapa, poccadeni aba, poccadeni madierrine bazima naqui inebomaneza Zesozana rraui torrarrari.

₁₂Zesopa zama arobeni Carirea oza panani onihiza onihiza mari mari narizazapa madirra zamacoma onini leprarrine uapi rrazimaroui pouaza bacco narronarrari. Zeso qqui tazapa poua bodia: —Zesona deni torraui, ouape arrimani orrani −naza Zeso baccouarri poua pitoza uitta naza panope namizana bacco tarraro. Nazapa Zesoza uati tarrari: —Oua Zozossede, ouape bica onerreraraha tia touini tezape oua tinanabicaniuarrine nauato tinani −narrari.

₁₃Nazapa Zeso poua zepeza bara inazapa: —Rrehe, touini onani. Tibicarri −narrari. Nanarra amazati poua uapicca amossissi nezapa tobicarrari. ₁₄Nazapa Zeso pouaza uati tarrari: —Arri tibicanicca uima madirradeniza uati tariza terrerana. Neraha Deoza dada toqquimauarrina ticcarri, onarraro. Naniza tiqquezimazape dada toqquimade orrariazara tepi tobicani tia noue tinarri. Nezape Deoza ticca uima bica terreranicca toppinerezape ticca danirri Deoza torraniuarrine ouaha ouaha naha pina eueue, ppiriri, oqui narrari da da tizimana. Pina Moizecca marinarraza iboraqquiri inarrarossa tinanarri, onarraro. Nezape bazimaza ticca uima toppinerani auato tezape: “Parrissa tibicarraro” quenauiuarrine −narrari Zeso pouarrine uapi tobicarrariza.

₁₅Naraha Zeso poua tauimaripe ssarra tarizarraro. Narrarorrine madirra bazima Zeso poua atti mittade rrauirronana canarrari, madirra tocanomireuiuarrine naco rrauirronana canarrari. ₁₆Naraha Zesopa poua motta madirra nouerauiuarri totocca narrari, Deoza uati uati tauiuarrine.

₁₇Zotodepa Zeso madirra maride torrazapa zodeodeni mota marinarra parizeoza rrehe quenarrarideni, zodeodenicca marinarra maridedeni naco mittade rrassi taririzarrari. Narraridenipa zama arobeni Carireauarricca oza uapimacca rrauirronarizarrari, zama arobeni Zodeauarricca oza bazimacca naco rrauirronarizarrari, oza panani Zerozarecca naco rrauirronarizarrari. Nazama Zeso maride torraza, madirra inanomibaqquiuiuarrine naqui Deocca dacorehepe Zesorrine auato tarraro. ₁₈Nazapa madirra ide tone bicarraraza isso siri torrauipa poua taboroza poriza poua tessedeni zorro icanarronemanarrari. —Zeso baccouarri poriuiuarrine oza bodiuarri zorro icazimana −quenarrari. ₁₉Naraha madirra siba tazapa zorro icazimemanauiuarrine torrera tezape oza tetepiuarrina zorro icanamaromanarrari. Oza tetepini arobeniuarri icataborrizemanezape madirra isso siri torraui poua taboroza poriza tappa icanaronemanarrari. Madirra domo uauarraniui nocconiza da icanaronemanazapa Zeso poua baccouarri bacco tocanaronarrari. ₂₀Zeso pouatoui damamera taui qqui tazapa poua bodiza nauato tarrari: —Parrissa, Zesopa madirra inanomiuiuarrine nauato taui −quenaui Zeso pouaza auato tezape coma tarrariza uati tarrari: —Otesse, arri uimasiri tinanarraro bazimape onanamossini. Rridapana ticca uima Deoza tobicani –narrari Zeso.

₂₁Zeso atti nama nazapa zodeodenicca marinarra maridedeni, parizeodeni tezerre bodideni uatome-manazapa: —Paparra, Zesopa “Uimasiri onanamossina” naua. Poua attipa: “Ouape pina Deo orrani” nanarra narrarissa naua. Zesocca uimape bica terrerani pina Deo tamassorrarissa naui! Naraha Deo Pouana orrarirrari uimasiri inanamossiniuarrine −quenarrari. ₂₂Naraha Zesopa pouadeni bodicca uima nauato tazapa pouadeniza uati tarrari: —Nerrecotoui tibodideniza nema tiquenarraro? −narrari. ₂₃—Rrari, tibodideni uatome-manarri nerrecoma narraro uimana tiadeniza denima narrora tani? Arra madirra coma tarraricca uimasiri onanamossini narrora taqui? Coma tarrari onanabicauina denima narrora tarrarorane? ₂₄Naraha arri oua Madirra Bedi orrarrarope madirracca uimasiri onanamossiniuarrine Deocca dacorehe ocarrini nauatoqquiri tiquenaniuarrinepe, arri namiza naqui ouatti ocarrini nauatoqquiri tiquenaniuarrine coma tarrariza uati onana –narrari Zeso. Nazapa madirra isso siri torrauiza uati tarrari: —Tiaza uati oneza: Titemarri! Titaboro tidiza ticca ozauarri ticcanirri! −narrari.

₂₅Nazapa amazati totemaza bazima cattomama canaraha poua taboro idi naza pocca ozauarri toccanirrari. Nazapa Deoza touatizeniza rriri rriri tanirrari: —Deopa bica taui, bica taui! −tanirrari. ₂₆Nazapa madirra bazima cappinemanaraha uatizemanazapa: —A, Deorrine bica tani! −quenarrari. —Arri rridapana qqui inarrarope bica tani −quenarrari.

₂₇Naui zotodepa Zeso rraui toccaza rromanodenicca taminecca zossenirri ziniro nanaccade qqui tarrari. Poua onipa Rebi. (Poua oni ouahapa Mateo.) Naui rromanodeniza ziniro da taniuarrine ihinaqquemana naniuarricca oza bedeni bodiza uittizazapa Zeso pouaza uati tarrari: —Rrina, ouaza ticcarri −narrari. ₂₈Nazapa Rebi pocca tarabaia inebo, Zesozana toccarrari.

₂₉Zotodepa Rebi Zesoza uatizezapa: —Irripaqquina −narrari. Nazapa pocca ozauarri poua tessedeni Zeso tezerre rripaqquimanauiuarrine zamatapa uemaui narrorarrari. Queriqquimanaza poua tesse rromanodenicca taminecca zossenirri ziniro nanaccadedeni, poua tessedeni tezerre rripaqquimanarrari. Nauiza madirra ouahadeni naco Zeso pocca mamari tabaqquima rripemanarrari. ₃₀Naraha nauiza naco zodeodenicca marinarra parizeoza rrehe quenarrarideni, zodeodenicca marinarra maridedeni tezerrepa madirra uimasiri carrimanarrarideni tezerre Zesodeni rripemanaui qqui toquenarrari. Narraro uimaza nacasseraqquiri nazapa Zesocca mamari tabaqquiza atti atti quenarrari: —A nerrecotoui tiadenipe rromanodenicca taminecca zossenirri ziniro nanaccadedeni tezerre, uimasiri carrimanarrarideni tezerre tirripemanarraro? −quenarrari. (Arra madirra nama narrarideni tezerrepa rripade oppina tani quequenanarrari.)

₃₁Nazapa Zeso pouadeniza uati tarrari: —Ponima pouadeniza orripa-rrerarraro. Pouama otoui uaua quena-rraraui. Nomiqquiri narraridenipa toponi totonanomide touini quena-rrararaha comaqquiri narraridenina toponi totonanomide touini quequenanarrari −narrari. —Ouape pina toponi totonanomidessa onarraro. Madirradenicca uima Deoza tobicaniuarrine pouadeni accode occarronarrarode. ₃₂Naraha madirrapa: “Iape bicaqquiri inani” quequenanarraridenicca uima onanabicaniuarrine occarrona-rrerarraro. Uimasiri carrimanarraridenicca uima onanabicaniuarrinena occarronarraro. Pouadeni bodideni acco ocanabaqquiza: “Uimasiri inebona” quenauiuarrine, onarraro. Pouadeni bodi cacarriqquimerazapa Deocca uima zatiza toquerrenauiuarrine, onarraro −narrari Zeso.

₃₃Naraha nauicca madirrapa Zesoza uati toquenarrari: —Zouaocca mamari tabaqquipa rripehe nebocossemanazapa Deozara uati uati zazanapomana narrari. Zodeodenicca marinarra parizeoza rrehe quenarraridenicca mamari tabaqqui naco arra Zouaocca mamari tabaqquissa quequenanarrari. Naraha nerrecotoui ticca mamari tabaqquia rrirripaqquimana narrari? −quenarrari Zesoza.

_34-35Naraha manaco Zeso poua cacomerarrari: —Arra zabisso amonerre carribote narrari pocca errete narroraza poua tessedenitoui uaua nazapa bazima pouaza queriqquizapa narrarideniza: “Rripehepe tinebocossemanaccarri” tiquenapazerre? Nema tiquenerreranitoui. Poua tessedenipa pouaza uatizemanaza rripaqquimanauitoui. Naraha uada onihiccaza zabisso uenabote narrari iaqquemanazapa poua tessedeni rripehe nebocossemanauitoui −narrari Zeso. (Nazama narraro uimape Zeso arra namiuarri madizapa poua tessedeni pouaza uatizemanaza poua tezerre rrirripaqquimana narrariparra. Naraha zotode poua inanazoqque-manazapa poua tessedenipa rripehe nebocosse-manaccauitoui, narrariparra.)

₃₆Nazapa arrirraro namiza imadinicca uima onihi Zeso pouadeniza uati tarrari: —Icca etero zatipe etero rradaniza uanacossaniuarrinepe ccado ccado inerrerarraro. Icca etero nema inanezape icca etero zati inauaidirarraro. Narraro etero zati bobini ccado torrizani mota naqui etero rradaniza uanacossezape narrarossa nerrerarraro. Rriza tani. Etero rradanipe tobiquemaninira tani −narrari Zeso. (Nazama arri Zesocca marinarrape pina zodeodenicca marinarrassa nerrerani. Zeso pocca marinarrape zati.)

₃₇—Uima onihi naqui arrima narraro: Uva pperrene nauatozatipa bani etero ssequi naui rradauiza sso sso ihizemana narrararrari. Uva pperrene nauatozatipa bani etero rradauiza sso tozaza ssicatazapa rrocaquera tarrarirrine sseo taui carri taui. Sseo tazapa uva pperrene sso taha rrica taui, zamine naco touaidirazapa coro iquena taui. ₃₈Nazama uva pperrene zatipa bani etero ssequi naui zatizara sso sso totoza narrari −narrari Zeso. (Arra poua atti nama narraripa madirra bodi zati torrazana Zesocca marinarra zati ecauaniuarrine parrireui, narrari.)

₃₉—Uima onihi naqui tiadeniza uati onana: Madirra uva pperrene rradaui ze ze quequenanazapa pouadenipa uva pperrene nauatozati toui quequenana-rrararrariparra. “Uva pperrene rradauipa iaza bica tarrari, rrizera taui” quequenanarrari −narrari Zeso. (Nazama narraro uimape madirra poccadeni uima rradani naqui narrarossa narraro. Poccadeni uima rradaniza uatideni uanaqquiri nazapa Zesocca uima zatiza: —Narrarona denima iaza bica tani −quena-rrararrariparra. Poccadeni uima rradani nebomanauiuarrinepa nacasseraqquiri narrariparra.)