Roca 22

₁Zodeodenicca errete imeni touarrirarronarraro, oninipe Pao ssarra tarrarauicca. Narraro errete onini onihipe Pascoa. (Ettizape: Deo tossoniqquimarrari, inarraro.) Narraro errete torra-rreraqquezape arrirraro uima torrarraro. ₂Dada toqquimade taminedeni, zodeodenicca marinarra maridedeni quenarraridenipa Zesoza nacasseraqquiri naza attidenia: —Zeso nerrecoma inanaza zoqqueuiuarrine? −quenarrari. Naraha pocca madirra noppine cappinemanarrari. —Zeso dama inaui qqui toquenazapa moua moua quenarana −quenarrari.

₃Nazapa Zoda. Pouapa Zesocca zozosse tabaqqui 12 quenarrari orraria. Poua oni ouahapa Iscariote. Poua bodiza uimasiri mamaride Tocorime-Tamine toqquezimazapa pouana Zeso eccorauiuarrine bodi narrorarrari. ₄Nazapa dada toqquimade taminedeni, nauicca oza cacauadedeni quenarrarideniza Zoda uatide toccarrari. —Zeso tizepedeniza onanauiuarrine, onarraro −naza pouadeni tezerre Zeso dama iquenauiuarrine uimahaha canarrari. ₅Nazapa uatizemanaza: —Rrehe, nema tezape tiaza ziniro da inanitoui −quenarrari. ₆Nazapa Zoda rrehe naza bodi narrorarrari. Toccanizapa Zeso pouadeniza eccorauiuarrine inoccozarizarrari. Poua bodipa: —Madirra noue queraza Zeso dama tiquenarro, onaniuarrine −narrari.

₇Pao ssarra tarrarauicca errete bacco taporrarope uada 7 nehe rricaniuarrine. Narraro erretecca uada taideccaza zodeodeni pouadeni motta eueue bedi Deoza dada ihiquenanarrari. Eueue bedi inanazoqque-manaza ibanemanazapa rripemanarrari. Narraro errete oninipe Pascoa quenarrari. ₈Naza Zesopa Pedoro Zouao tezerre zosse inabaqquirrari: —Rridapana Pascoacca rripaqquie tinarroremanaporri, zome irripaqquiniuarrine −narrari. ₉Naraha pouadeni attipa: —Nerrecouarri inarroraniuarrine? −quenarrari.

_10-11Naraha Zeso pouadeniza uati tarrari: —Zerozareuarri ticadaporri. Nauiza madirra coripe passo zorro taniui qqui tiquenazapa narrari natti ticadamisseza pocca oza bacco tiquenana. Nezape nauicca oza rrinedeza uati tiquenana: “Ia Maride attipa: ‘Couarricca coba canauarraniniza Pascoacca rripaqquieza orripaniuarrine occa zozosse tabaqqui tezerre?’ naparra” tiquenana. ₁₂Nazapa pocca oza tetepicca coba canauarranini imeni tiadeniza noue inanitoui. Nanizape uauanari, uiuittari narroraponi. Nanizana rrirripa tinarroremanaponiuarrine −narrari Zeso. ₁₃Nazapa touedazapa pina Zeso poua uati tarrarissa narraro oza narrorani qqui toquenarrari. Naniza Pascoacca rripaqquie zome rripaqquimanauiuarrine narroremanarrari.

₁₄Rripemanauiuarrinecca marri bacco tazapa Zeso pocca zozosse tabaqqui tezerre rripemanauiuarrine zamatapa uauanariza rrassi nauarranirrari. ₁₅Nazapa Zeso pouadeniza uati tarrari: —Obodipe: Ocasserani oua-rreraqquezama occa zozosse tabaqqui tezerre Pascoacca rripaqquieza irripaqqui naccaraho, ohozanapo narraro. ₁₆Nazama arrirraro erretecca rripaqquiepe orripapomaniuarrine uarri taccani. Niza Deocca cacauehe torrezana nanizana irripaqquipomanitoui −narrari Zeso.

₁₇Nazapa Zeso zeze equidi naza Deoza uati tarrari: —Rrehe Abi Deo, ticca danirri iaza bica taui −narrari. Nazapa pouadeniza uati tarrari: —Arra, tiadeni bazima ze tiquenarro. ₁₈Arrirrarope tiadeniza uati onarraro: Deocca cacauehe torraniuarrinecca uada bacco terreraqquezape uva pperrene ze onapoma-rraraccauitoui −narrari Zeso.

₁₉Naui zotodepa pao poua zepeza idi naza Deoza uati tapomarrari: —Rrehe Abi Deo, ticca danirri iaza bica taui –narrari. Nazapa icanarobeza dize rrai da, dize rrai da inarizarrari. Nazapa Zeso uati tarrari: —Arrirrarope ouimecca uima. Ticassiuaueraniuarrinepe ouana oua ouaccoraniuarrine. Niza oua noue orrireza naqui ouaza tetideni rrimemana nerreraniuarrine arrima titinanemana nana, onarraro. Arra pao ocanabobirizaza tiadeniza da onarizaza tirripemanarrarope titiqueriqquimana neza nema titizanapomana naniuarrine, onarraro −narrari.

₂₀Rripaqquimanaui natti naco zeze equidi naza uati tapomarrari: —Arrarrari zezecca uimape Deo madirra tezerre rrehe canireuiuarrinecca uima zati torraniuarrine. Niza oua ozoqqueza ouemene toqquezape narraro rrehe canirenirri zati parrissa torranitoui. Arri ouemene toccarrarope tiadeniza uima bicani torraniuarrine. Narrarope ticcadeni uimasiri manaconi ouaza torrezape ticassiuaueraniuarrine −narrari Zeso.

₂₁—Naza arri irripaqquiniza oua ccaccorade naco arrirraro uauanariza ouazama rripade uittariui. ₂₂Naraha ouape Madirra Bedi orrarraroa niza ozoqquenitoui. Pina Deorrine maittaccazama otezerremacca uima narroraporrarossa onanitoui. Naraha oua ccaccoradeza oppina tehe torranitoui −narrari Zeso.

₂₃Nazapa pouadenira uati tocanirere canaza: —Nerrecorrarina Zeso zoqqueuiuarrine madirra zepedeniza inanauiuarrine? –narizemanarrari Zeso uatimadedeni.

₂₄Zesocca zozosse tabaqqui pouadenira arrauarri uati arrauarri uati quenazapa: —Nerrecorrarina iaza deni torrarrari? −quenarrari. ₂₅Naraha Zeso pouadeniza uati tarrari: —Madirra ouaha zodeo querrena-rrararraridenicca tamine bazimapa zossede dacoraqquiri naza poccadeni madirra zosse zosse quequenanarrari. Zozossede ouahadeni naco deni toquerrenazapa attideni dacoraza poccadeni madirra zosse zosse nanarizemana narrari. Pouadeniza poccadeni madirra attidenipa: “Ia acco canade tiquerrenani. Iaza bica taniccara tinanemanarraro” quenaraha maiza maiza quenarrari. ₂₆Naraha arri ouaza tiquerrenarrarope pina narrari taminedenissa tiquenerrerarri. Arri tiadeni deni tirrerre canimarrarope pina zabisso zosseheza ibora tarrarissa tiquenezana bica tani. Madirra zossede tirreza naqui: “Ouana deni orrani” terrerarri. Ticca madirra birrideni acco ticanabaqquirizauina bica tarraro. ₂₇Arrirraro namicca madirrapa “Orripana” nazapa pocca uiuittariza uittariza pocca zozossena rrirripa zorro zorro narrari, poua zozossedecca zamatapa uauanariza ua inariuiuarrine. Naraha tiadeniza uati onarraro: Nerrecorrarina deni torrarrari? Madirra uiuittariza uittarirraripa deni torrarrarico? Pocca zozossena deni torrarrarirana? Arra uittarirrarina deni torrarrari. Pocca zozossepa arramani torrarrari. Naraha ouape tiadeni Zozossede orreraha pina ticcadeni zozosse orrarrarossa narraro, tibirrideni acco ocanabaqquirraro. Tiadeni naqui nema tiquenana, onarraro −narrari Zeso.

₂₈—Arri ouape ocasserani oueza, madirra ouaza uima oppina tanicca inanemaneza naqui tiadenipe ouaza parri timadimanarini zanaporraro. Ouatimade dameraqquiri tiquenarraro. ₂₉Nema narraroa arri oua tiadeniza onananiuarrinepe pina arri occa Abi ouaza inanarrarossa narraro. Ouazama tiadeni naqui madirra zossede tiquerrenanitoui, onarraroparri. Pina occa Abi ouaza uati taporrarissa narraro, oua cazosserrarissa narraro: “Niza madirra zama uapimacca zossede tirranitoui” napode. ₃₀Niza occa cacauehe bacco teza bazimacca tamine orreza naqui tiadenipe occa zamatapa uauanari arri oua orripaniuarri ouazama tirripemana-zanaponitoui. Ticcadeni cacauehe icca madirra zodeodeni arra icca idi Izarraeo poua bedi 12 quenarrarideni potemaui tecauabaqqui-manarizazapa poccadeni tamine tiquerrenanitoui. Nazama tiadenipe pouadeni zossedecca uiuittari 12 quenarraroza uima cattemade rrassi tinaririzanitoui −narrari Zeso.

₃₁Zesopa Simao-Pedoroza uati tarrari: —Simao, tibodi uatorri. Tocorime-Taminepa titouideni tonacomabaqquiui. Pouapa titouideni Deoza uati uati tarrari, tiadeni nattome tabaqquiuiuarrine. Pina arroi rrizaza tirico etero toccauiuarrine qquero uira, qquero uira quenarrarissa narrari oua tinebomananiuarrine tiadeniza ocasserehe inananitoui. ₃₂Naraha Simao, titoui Deoza uati uati onarraro, oua tinebo-rreraniuarrine. Ouaza peperri tanitouiraha, otouira tapomezape timecotedeni arra ouaza rrehe quenarraridenicca rrehenirri todacoraniuarrine pouadeni acco ticanabaqquirro, onarraro −narrari Zeso.

₃₃Naraha Simao attia: —Oua Zozossede, ouape nema onerreranitoui. Toponi cocoroza tia coro izimemaneza naqui oua naqui onarrorani, tiazama ouezaniuarrine. Tiazama ozoqqueniuarrine naqui onarrorani −narrari.

₃₄Naraha manaco Zeso attia: —Pedoro, tiaza uati onana: Niza arrirraro zome ssiuarraricossaniuarri tacara uaua narraraccaza tetti tinamaizanitoui. Ouaza: “Onocco rriza tani” tanitoui. Zotode naqui: “Onocco rriza tani” tapomanitoui. Zotode naqui nema tapomanitoui −narrari Zeso.

₃₅Nazapa Zeso pocca zozosse tabaqquiza uati tarrari: —Madirra maride tiquerrenarizaniuarrine tiadeni zosse onabaqquipoza rraui tirrarizade. Ticcadeni saco, ticcadeni ziniro, ticcadeni sadaria narraro rrirehe rraui tirrarizarri onezape nerrecora ticappiremanatte? −narrari Zeso. Naraha pouadeni cacomeremanarrari: —Nouerade. Icappira nehe rrauirrariza-rrerade −quenarrari.

₃₆Nazapa Zeso pouadeniza uati tapomarrari: —Naraha rridapanape occa zossenirri taideccassa nerrerani. Rridapanape saco, ziniro ticarrimanezape tiaqquemanarri. Nazama rrazirecca massito cauidireqquima nani ticappiremaneza naqui ticcadeni ssirinicca etero (eueue conecca) rridi tiqueneza mitta tiquenarri. ₃₇Nezape otezerremacca uima tiadeniza uati onana: Deo Atti dozo naponiccape parrissa ouaza torranitoui. Poua Atti cacomerabote Izaia dozo inaponipe arrima narraro: “Niza madirra attidenipa: ‘Arrarraripa uaidiraqquiri narraridenizama carrimarrari’ quenauitoui” napoui nade Izaia. Narrarossa narrarope ouaza madirra attideni nama quenauitoui −narrari Zeso.

₃₈Naraha pouadeni attipa: —Ia Maride, arrizape rrazirecca massito caudireqquima nani pamehe icarrini −quenanarra Zesopa: —Rrehe, narrarozape tiparriremanani −narrari.

₃₉Nazapa Zeso uati taha rricazapa ozaza toqquenaza ssono (onini) Rritona quenaui uarri toqquemorarrari. Arra poua uarrirriraza totocca nauiuarri toccarrari. Pocca zozosse tabaqqui naco pouaza rraui torremorarrari. ₄₀Arra pouadeni quequeriqquimana nauiuarricca aua rritona ppa taui dopeuarri bacco toquenazapa pouadeniza uati tarrari: —Rrari, Deoza uati uati tiquenarri, arri ticappinemaneza uima tinanemana-rreraniuarrine −narrari Zeso.

₄₁Zesopa pocca zozosse tabaqqui rrassi tauiza toqqueqquimarrari, cauarriqquima naza poua pitoza uittaza Deoza uati uati tarrari. ₄₂Arrama narrari: —Abi, nacassa tinezape otezerremacca uima oppina tanicca ouaza torra-rrerana, oneraha. Madirra bazimacca uima manaconi narrizoue ouaza torrezape ocasserani ouanitoui Pina zeze bidabote ze onaniuarrinessa narraro. Narraro onauananiuarrine nacassera oneraha oua nacassa onanicca toui onerrerarraro. Tia nacassa tinaniccana parri. Narrarozana ibora onarraro −narrari Zeso.

₄₃Nanarra naui Zeso poua Deoza uati uati tauiuarri Deocca zozosse memeuarricca auatorrari. Narraripa Zeso acco icanaza inadacorarrari. ₄₄Naraha Zeso poua bodi ocassera-ra canarrari. Deoza uatide todacoraui nazapa taniccorrari. Poua taniccone namiza toqquezape pina ama motarehe ssaboro ssaboro narrarossa narraro.

₄₅Deoza uati taha rricazapa pocca zozosse tabaqquiuarri ccanirrari. Bacco nanizapa cauadirrauira qqui tarrari. Bodideni orri quenarrarirrine tocamirrirerazapa cauadirrarrari. ₄₆Naraha pouadeniza uati tarrari: —Nerrecotoui ticauadirrarraro? Nocco tiquerreneza Deoza uati uati tiquenarri. Uima oppina tehe torrezape tirraparimaneza uima tinanemana-rreraniuarrine, onapa −narrari Zeso.

₄₇Zesopa uati uati naccaraha madirra uapi taha bacco narronemanarrari. Zodana taiderronarrari. Pouapa Zeso pocca zozosse tabaqqui 12 quenarrari orrariaraha pouana Zesouarri touarriressi, pano mose inarrari. ₄₈Naraha Zeso attipa: —Zoda, ouape Madirra Bedi orrarraroa opano mose tarrarope arra ouaza uadiqquiri narrarideniza oua teccorarraroqui? −narrari.

₄₉Naraha arra Zeso uatimadedeni attidenia: —Ia Zozossede massito cauidireqquima naniza itacarizaco? −quenarrari. ₅₀Nazapa Zesocca madirra orrariana dada toqquimadedenicca tamine deni torrarraricca zozosse uaribo nauatoniuarricca ca tanerre tarro canarraro. ₅₁Naraha Zeso attia: —Peperriua, denima ca terrerarri! −narrari. Nazapa taminecca zozosse uaribo bara icanazapa uaribo tocabiquemanirrari.

₅₂Zesotoui rrauirronarraridenipa arra dada toqquimade taminedeni, Deoza dada toqquimauarricca cacauadedeni, ime rrocouideni quenarrari. Narrarideniza Zeso uati tarrari: —Nerrecotoui tiadenipe rrazirecca massito cauidireqquima nanima, uauaccama rraui tirrarronarraro? Nema tiquenezape pina bobotidetoui rraui tirrarronarrarossa narraro. ₅₃Neza tiadenizama uarrirriraza Deoza dada toqquimauarri ohocarrima neraha oua dama tiquenehe nerrerade. Neraha ouaza uima tinanemananiuarrinepe zizinizara rraui tirrarronarraro. Rridapanape tirrinedeni zizini rrinede deni torrarrari −narrari Zeso. Nazapa Zeso dama iquenarrari.

₅₄Nazapa Zeso dama iquenaza dada toqquimadedenicca tamine deni torrarraricca ozauarri iaqquemanarrari. Naraha Pedoropa Zeso iaqquemanaui nattideni uarrima touanamissarrari. ₅₅Ozaza bacco toquenazapa boroniza zippo inazemaneza rriuade rrassi nauarranirrari. Pedoro naco pouadenizama uitta bacossarrari. ₅₆Naraha narraro ozacca zozosse zouato Pedoro zippoza uittaui qqui teza icattoma naza arra rrassi nauarranirrarideniza uati tarraro: —Arrarraripa Zesoza ccaccariza nade −narraro. ₅₇Naraha Pedoropa poua namaizarrari: —Zouato, ouape pouaza onocco rriza tani −narrari.

₅₈Naui zotode madirra ouaha naco Pedoro qqui tazapa: —Tia naqui Zesocca madirra tirrani −narrari. Naraha Pedoropa poua namaizapomarrari: —Ouape narraricca madirra orrarrerani −narrari.

₅₉Naui zotode marri orraria tossoniqquimaza madirra ouaha attipa: —Parrissade! Arrarraripa Zeso uatimadederra. Pouapa zama arobeni Carireauarricca madirra rrizera taui −narrari. ₆₀Naraha manaco Pedoro pouadeniza uati tarrari: —Nerrecoma narraro uimara uati uati tiquenarraro? Ouape narraro uima ssamo onani −narrari. Pedoropa narraro uima uati uati nanarra tacara uaua narrari.

₆₁Nanarra Zesopa cattauarraniui naza Pedoro icattoma narrari. Nazapa Pedoro pouaza Zeso uati taporraricca uima bodi uatomanirrari: —Niza arrirraro zome ssiuarraricossaniuarri tacara uaua narraraccaza tetti tinamaizani 3 nanitoui −napoui nade. ₆₂Narraro uima Pedoro bodi uatomanizapa toqquenarrari. Poua motta orri orri narrari.

₆₃Zeso cacauadedenipa boqueheza rriza rriza quenarrari. Zeso uaccade rro nariui narrari. ₆₄Nocco ssoque iquenaza naco pouaza uati toquenarrari: —Rrari nerrecorrari tia idarrari? Tecomerarro! −quenarrari. ₆₅Attideni uaidira tarraroza itamassoqquimanarrari.

₆₆Ssiuarrezape zodeodeni ime rrocouideni, dada toqquimade taminedeni, zodeodenicca marinarra maridedeni quenaza queriqquimanarrari. Nazapa zodeodenicca uima cacattemadedeni deni toquerrenarrarideni quequeriqquimana nauiuarri Zeso iaqquemanarrari. Nauiuarri bazima rraui torrezimaza pouaza uati toquenarrari: ₆₇—Cristo-Mesia tirrezape iaza tia tecomerarri: “Ouape Cristo-Mesia orrani” tarri −quenarrari.

Naraha Zesopa: —Tiadeniza: “Ouape Cristo-Mesia orrani” onezape ouaza parrissa tiquenapazerre? Parrissa tiquenerrerani nauato onaponi. ₆₈Manaco tecomeremananiuarrine tiadeniza uati onezape tecomeremanapazerre? Tecomeremana-rreranitoui −narrari. ₆₉—Ouape Madirra Bedi orrarraroa niza zotode Deo Dacorabote oua deni tonanazapa Poua uinori nauatoniuarri ouittarinitoui. Naniuarri ouittarizape Abi Poua tezerre zosse zosse onanitoui −narrari Zeso.

₇₀Naraha pouadeni attia: —Nema tezape tiape Deo Bedi tirraqui? −quenarrari Zesoza. Naraha Zeso poua cacomerarrari: —Rrehe, tiadeni ouaza nema tiquenarraroparri −narrari. ₇₁Nazapa pouadeni attia: —Rridapanape pocca uima uati toquenauiuarrine madirra ouahatoui uaua inerrerana. Peperri! Poua, poua cacomeraza poua atti oppina tanicca imittanissa tani −quenarrari. Nazapa narraro uimaza zoqqueuiuarrine narroremanarrari.