Roca 14

₁Rrassinarracca uadaza Zesopa parizeodeni taminecca ozauarri rripade toccarrari. Nauizapa parizeo ouahadeni naco rripemanarrari. Pouadenipa Zeso inoccozemanarrari: —Niza pocca uima zori tezape pouaza uima inassonariniuarrine −quenarrari. ₂Naui Zeso tezerremapa madirra izone ssarra taui coma tarrari qquezimarrari. ₃Nazapa Zeso narrari qqui tazapa parizeodeniza, zodeodenicca marinarra maridedeniza naco uati tarrari: —Rrari, Moizecca marinarraza, icca madirracca marinarraza naqui rrassinarracca uadaza madirra coma tarrari inanomiuipa “Oppinera tani” tiquenaqui? “Oppina tani” tiquenarrarorane? −narrari Zeso.

₄Naraha pouadenipa zamarrama quenarrari. Nazapa Zeso madirra coma tarrari bara inaza tonomirrari. Nazapa: —Ticcanirri −narrari pouaza. ₅Nazapa Zeso parizeodeniza uati tapomarrari: —Rrari, tiadenipe rrassinarracca uadaza izepe irriniuarrine “oppina tani” tiqueneraha pina ticcadeni erredeni uitide, ticcadeni boui uitide passouarrine ui tozaniza ssonippazapa rroca timoranimana-rraraco? Naraha coma tarrari onanomirraripa pina narraro uimassa narraroa −narrari Zeso.

₆Naraha parizeodeni, zodeodenicca marinarra maridedeni Zesoza uima inassonarimananiuarrine touini quenazapa pouadeni cacomemanarrari.

₇Nazapa naui parizeodenicca taminecca ozaza rripaqquimanauiuarrinepa deni toquerrenarraridenicca uiuittari bica tanicca toui icatterrizarize-manarraro. Pouadeni bodipa: —Rrehe, ouana bica onani −quenauicca uima auato taniuarrine deni toquerrenarraridenicca uiuittariza rrassi tarirrari. Nama narizemanaui Zeso qqui tazapa pouadeni mari icanabaqquirrari, arrirraro namiza imadinicca uimaza.

₈—Rrari, tiadeniza uati onana, timittemananiuarrine −narrari. —Madirrapa pina cacarrireuiuarrinecca rripaqquie torrabote nazapa tiadeniza uaua naza rraui tirra tani. Naraha naniuarri rraui tirrezimeza rrassi tinariniuarrine uiuittari deni toquerrenarraridenicca uiuittariza tittarimana terrerarri. Deni toquerrenarraridenicca uiuittariza tittarimanezape niza zotode madirra tiadeniza deni torrarrari bacco nauitide. ₉Nazapa oza rrinede tiaza uati tauitoui: “Ticca uiuittarizapa arrarrarina uittarina” nauitiderra. Naza tibodi cappinezape arramani toquerrenarraridenicca uiuittariza tittarirana, onarraro. ₁₀Naraha ticca uima bica taniuarrinepe madirra pouaza tirripaniuarrine titoui uaua naza arra arramani toquerrenarrarideniuarri tittarinina bica tani. Nazapa oza rrinede tia qqui taza: “A, otesse, denima bica taniuarri tittarirri” nauitoui. Nazama arra bazima rrassi nauarranirrarideni qqui toquenazapa oza rrinede denima bica taniuarri tia zosse tauitoui. Nazapa: “Rrehe, pouapa denima bica tarrari” quenauitoui tiaza. ₁₁Narraro uimazana Deocca cacauehecca madie ticauatteraniuarrine. Madirrapa: “Ouape deni orrani” naza narrari arramani inanauitoui. Naraha madirrapa: “Peperriua, arrimani orrani naqui bica tani” nazapa narrarina Deo deni inanauitoui −narrari Zeso.

₁₂Zesopa marinarra onini parizeoza rrehe quenarraridenicca tamine Zeso pouaza rripauiuarrine uaua narrariza uati tarrari: —Rrehe, madirra tiaza rripaqquimanauiuarrine nacassa tinezape titessedenitoui, timecotedenitoui, ticca madirratoui uaua terrerana. Tinocco rrizera tarraridenitoui, ziniro sseqquiri narraridenitoui, narraridenitouipe uaua terrerana. Manaco pouadenipa tirripaniuarrine tiaza uaua quenauitoui. Nezape pouadeniza uima bicani tinanarraro manaconi ticarrini. ₁₃Naraha madirra tiaza rripaqquimanauiuarrine nacassa tinezape arra madirra cappirarrarideni, madirra siri toquerrenarrarideni, arra madirra isso sirideni, madirra nocco sirideni, nama narraridenitouira uaua tana. ₁₄Nema tezape tibodi tetizenitoui. Pouadenipa manaco tiaza rripaqquie inauatomananiuarrine parriremana-rraraui, ssamoqquiri narrari. Naraha niza Deopa pocca madirra inauatonibaqquizana manaco Pouana tiaza uima bicani inananitoui −narrari Zeso.

₁₅Nazapa nauiza rripade rrassi tarirrarideni orraria Zesocca marinarra mittazapa Zesoza uati tarrari: —Niza Deocca cacaueheza madirra toquerrenaza Deocca rripaqquinarra imeniza rripemanazapa Deo pouadeniza uima bicani inananitoui −narrari.

₁₆Naraha Zesopa pocca marinarra arrirraro namiza imadinicca uima tazarrani pouaza uati tarrari: —Rrehe, madirra zepe sse tarraria: “Rripaqquie imeni onauatona” nazapa madirra uapi taha ua inabaqquirrari. ₁₇Rrirripa narrorazapa rripaqquie rrinede poua tessedenitoui pocca zozosse zosse inarrari, poua tessedeniza: “Oua zozossede atti: ‘Rrirripa narroraui, rraui tirrarronarri’ naparra” nauiuarrine.

₁₈—Nazapa poua tessedeniza uatide ccarizaraha “Izepe irrini” narizemanarrari. Pouama uati toquenarrari. Taidecca attipa: “Ouape uizarra torraniuarrine zama mitta onarraro, narraro qquide occabote nani. Tia zozossedecca rripaqquieza occaniuarrine oparrire-rrerani. Peperriua, otoui timadi terrerarri” narrari. ₁₉Nazapa rripaqquie rrinedecca zozosse madirra ouahaza naco uati taraha narrari naco: “Ozepe irrini. Occa boui mitta ozati 10 quenarrari orrine papamacosseri naza occa uizarracca nami boto naniuarrine nattome onabaqquiccana, onarraro. Tia zozossedecca rripaqquietoui occanitouiraha ozepe irrini” narrari. ₂₀Naza ua inaporrari ouahaza naco uati taraha narrari naco: “Ouape oqquerrerani. Tia zozossedeza uati tinana: Arri ouape amonerre ocarrizatirre narraro. Peperri, ticca rripaqquieza oqquezima-rrerani” narrari.

₂₁—Nazapa rripaqquie rrinedecca zozosse toccanirrari, poccadeni uima bazima uati tanirrari. Rripaqquie rrinedepa narraro uima mittaza boquerrari. Pocca zozosseza uati tarrari: “Nema nehe uassinarra oza pananiuarri ticcarri. Naniuarricca rraui onihi onihicca madirratoui qqui tarizarri. Arra ziniro cappiremanarrarideni, madirra siri toquerrenarrarideni, pina isso siri torrarrari, nocco siri torrarrari narrarideni arrauarri teccanibaqquirro” narrari. ₂₂Nazapa zotode pocca zozosse madirra bazima eccanibaqquirrari. Rripaqquie rrinedeza uati tarrari: “Rrehe oua zozossede, tettissa onanaraha ticca ozape carrinissa terreraccani” narrari. ₂₃Nazapa rripaqquie rrinede uati tapomarrari: “Rrari, rraui onihi oza panani inidiuarricca rraui ticcarizarri. Madirra ouahadeni teccanibaqquirro, rrauizimauiuarrine. Occa oza carriniuarrine, onarraro” narrari. ₂₄“Arra madirra ua onabaqquiporraridenipa occa rripaqquieza rraui torrezima-rrarauitoui. Occa rrirripa catamemana-rrarauitoui” narrari rripaqquie rrinede −narrari Zeso, Deocca cacauehecca uima mari icanabaqquiza.

₂₅Nazapa Zeso pocca bobodeza toccazapa madirra uapi taha pouaza rraui torramissarrari. Nazapa Zeso cattauarraniui naza pouadeniza uati tarrari: ₂₆—Madirrapa ouaza torrauiuarrine touini naraha pouapa pocca madirrazana denima uati uana taza, ouazapa arramani uati uana tazapa narraripa occa torrauiuarrine parrire-rraraui. Madirrapa pocca abi, pocca ami, pocca amonerre, pocca erredenideni naco, pocca ato naco, pocca asi naqui, poua imecotedeni naco, orrari uitide, uapi tauitide, uima onihi pina ouattissa nerreranicca pouaza uati toquenaza pouadeni attizana ibora tazapa occa madirra torrauiuarrine parrire-rraraui. Occa madirrapa ouattizana iboraqquiri narrari. Madirra naco poua pocca madieza denima uati uana tazapa ouaza arramani uati uana tarrari. Pina ouattissa inane-rrerezape occa madirra torrauiuarrine parrire-rraraui. ₂₇Madirra ouaza damera tarrarazapa occa madirra torrauiuarrine parrire-rraraui. Occa madirra torrauiuarrinepa otauimarirrine ocasserani inauaneraha nema nehe otauimarizara damera tarrari. Pouaza: “Aua porimacossaniza tia inanazoqquena” quenaza naco poua attipa: “Peperriua ozoqquena. Zeso onebo-rraraui” nazapa narrarina occa madirra torrarrari −narrari Zeso.

₂₈Zeso denima uati uati tarrari: —Rrehe, occa zozosse tabaqqui tiquerrenaniuarrinepe ponima “Zesocca orrana” tiquenerrerana. Taidepe tibodideni uato-mananissa taporri. Pina arrirraro uimassa narraro: Tettidenipe: “Oza imeni nami macconi botta taniza ocanauatona” tiquenezape nerrecoma titiquenapo narraro? Rrehe, taidepe: “Oza manaconipe arrima nanitide” titiquenapo narraro. Nezape: “Occa oza carricanissa taniuarrine occa ziniro parrirepazerre?” titiquenapo narraro. ₂₉Naraha taidepe ticca oza canauatoniuarrine manaconi nattome tapo-rrerezape dopaniuarricca ppatocanariniuarrine nami macconi botta tani ua inaririzemanarrarozara ticca ziniro rricaqquinitiderra. Narraroza ziniro rriquezape ticca oza carrica-rreranitoui. Nezape madirra bazima tia rrarra icanaqquimananitoui. ₃₀Attidenipa: “Arrarrari madirrapa oza icanauatoraha carricanissa taniuarrine ssamo tarrari” quenauitoui −narrari Zeso.

₃₁—Nazama uima onihipe arrima narraro: Tamine pamaha zama onihicca zama onihicca tezerre cauadireuiuarrine poccadeni isso teppeppe tezerre narrorarizemanarrari. Tamine orrariapa pocca isso teppeppe 10 mil naha carrirrari, naraha tamine ouahaccapa denima uapi tarrari, 20 mil naha carrirrari. Nazapa arra isso teppeppe 10 mil naha carrirraripa arra tamine isso teppeppe 20 mil naha carrirrari tezerre bacco tocanire-rrarazama poua bodipa nerrecoma napopazarra? Rrehe, poua bodi uatopouitoui: “Ouape arra tamine isso teppeppe 20 mil naha carrirrari tezerre icauadirezape deni orrapazerre? deni orrarrerapazerre?” nauitoui narrari tamine. ₃₂Nazama: “Occa isso teppeppe 10 mil nazapa deni orrarreranitoui” nazapa arra tamine isso teppeppe 20 mil carrirrari rrauirronaui uarri taccazama pouaza uima zosse inarraro: “Icauadire-rrerana. Irriquerana. Nerrecora tiadeniza da inaza icarroneraniuarrine?” nauitoui −narrari Zeso.

₃₃—Rrehe, uima narrarossa narraroa tiadeni naqui occa madirra tiquerrenaniuarrine taide tibodideni uato-mananissa taporri, onarraro. “Zesocca orrezape bazima oneborizaniuarrine oparrirepazerre?” tiquenarri. Arri ticarrimanarrarocca bazima tinebomananiuarrine iboqquiri tiquenezape occa madirra tiquerrenaniuarrine tiparriremane-rreranitoui −narrari Zeso.

₃₄—Nazama sahope bica tani. Baniza coro izippezape arribo tarraro. Aba rrazi-rrarauiuarrine naco sahoza uira inarrari. Naraha saho arriboni rriquezape tomarridera tani, icca bani naco touaidira taui. Arribo tapomaniuarrine ssamo tani. Saho arriboni rriquezape ponima torrarraro. ₃₅Namiza uira inezape sahorrine icca ppa taui moro tarraraui. Aua uassa tarrariza carrimaza naqui sahorrinepe ppa taui moro tarraraui. Nazama saho ponima torrezape neborraro. Narraro uimape pina tiadeni naqui arrirraro zamacca madirraza uima bicani tinanemanarizarraro. Nema tizanapomanana. Nema tinanemana-rrerazape ticcadeni rrehenirri ponima torrerana. Nazama teribodeni ticarrimanezape ouatti timittemananissa tarri −narrari Zeso.