Passo uinoriniza coma tarrari Zesorrine tonomirrari
1Zodeodenicca errete bacco tapomezape Zeso Zerozareuarri toccanipomarraride. 2Nani Zerozareuarripe eueue ihieqquezimemana nauicca totoqquezima uarrira taniza siba ppanauarranini passo zarra tarraro. Narraro passo onini zodeodeni atti ebreozape: Besata, quequenanarrari. Nani passo uinorinizape madirra comaqquiri narraridenicca oza 5 canehe cacauitteri narrarode. 3Narraro ozazapa madirra comaqquiri narrarideni domo pozariza, noccodeni siri domo pozariza, issodeni siri domo pozariza, idedeni tone biqueraza issodeni siri toquerrenarrarideni domo pozariza narraride. Pouadenipa: —Passo ccomororo caneza opozippeza onominiuarrine −quequenanarrari. 4[Arri passo ccomororo cacana narrarope Deocca zozosse memeuarriccarrine uarrirri taza ccomororo cacana narraro, quequenanarrari. Passo ccomororo caneza madirra taide toqquezippapoza pozipparrarina totonomimana narrari, quequenanarrari nade.] 5Naraha nauicca comaqquiri narrarideni orrariapa uarrano 38 naha coma tarrari. 6Narrarina ponaui Zeso qqui inaza nauiza coma taha maitta madiraui uima mittazapa pouaza uati tarraride: —Tinominiuarrine touini taqui−nade. 7Naraha poua cacomerade: —Rrehe, touini oneraha passo ccomororo caneza oua napozippade ocappireza arriza onominiuarrine ssamo tani −nade. —Passouarri ccobo ozipperaha mirrira onezape madirra ouahadenina taide bacco bacco totozippemanapo narrari −nade. 8Nazapa Zeso arra coma tarrariza uati tade: —Titemarri! Titaboro tidiza ticcanirri −nade.
9Nanarra amazati tonomizapa totema, poua taboro idi toccani-ni naraha narraro uadape sabado torrarrarorrine poua taboro zorrode oppina tani, quequenanarrari. 10Nazapa zodeodenipa pouaza: —A, rridapanape icca rrassinarracca uada sabadoraha titaboro zorro tarizani. Narraro uimape bica terrerani −quenade. 11Naraha tonomirraripa poua cacomerade: —Oua tonanomide attipa: “Titaboro tidiza ticcanirri” nazapa −nade. 12Naraha: —Nerrecorrarina tiaza: “Titaboro tidiza ticcanirri” narrarinarra? −quenade.
13Naraha tonomirraripa poua tonanomide oni ssamo tarrari: —Nerrecorrarinarra? −nade. Arra Zeso madirra inanomiuizapa madirra uapi tarra narrari. Naui pouadeniza carrimazapa amossi narrari. 14Zotodena Zeso poua inanomirraripa Deoza dada toqquimauarri bacco inarrari. Nauizana pouaza uati tarraride: —Rridapanape tinomizama uimasiri tinanapoma-rrerana. Uimasiri tinanapomezape denima ocasserehe tiaza ssonarinitoui −narraride Zeso poua inanomirrariza.
15Nazapa tonomirrari zodeodeniza uatide toccarrari: —Zesona oua tonanomirrari −naui nade. 16Naraha poua atti nama nazapa zodeodeni Zeso rrara iquenarrari, inanazoqque-manauiuarrine. Sabado uarrirriraza madirra ihinanomibaqqui nazapa pouaza boquemanarraride. 17Naraha niza zotodena Zesopa pouadeniza uati tade: —Occa Abipa zepe irriuiparra nazapa oua naqui nema onarraro −nade.
18Zeso atti nama naui mittemanazapa zodeodeni parra icauadimanariui nade. Attidenipa: —Sabadope oppina tani inarraroza ibora tarrarazapa madirra inanomiui −quenarrari. Zeso poua atti onihi naqui: —Deopa occa Abi −naui mittemanazapa pouadeniza pina Deossa naui quenaza Zeso zoqqueuiuarrine toui inacomemanarrari.
Deo Bedipa Imehi tezerre canauatoqquimerarrari
19Naraha Zesopa zodeodeniza poua tauimari ecomerade: —Parrissehera tiadeniza uati onarraro: Deo Bedipa poua touini nauicca nauatora taui. Naraha pocca Abicca nauatoue qqui tazana poua naco nema inanarraro. Pina Imehicca nauatouessa narraro ihinauato narraro Bedi naco −nade. 20—Imehi poua Bediza uati uana tazapa pouaza pocca nauatoue noue inarraro. Narraro nauatoue Abirrinepe denima denima zanaponitoui. Narraro qqui tiquenezape uarro ticanirenitoui −nade. 21—Abi inauatonibaqquirraripa camittehe pouadeniza da da ihinariza narraro. Narrarossa narraro pocca Erredeni naco poua nacassa tarrariza pocca camittehe da da ihinariza narraro. 22Abipa Poua Bediza dacorehe da inezape Poua Bedi icazosserrari: “Tiana madirra poccadeni uimasiri manaconi pouadeniza tinassonarirri” narrari. Nazapa Abi Deopa madirra poccadeni uimasiri manaconi pouadeniza inassonari-rreranitoui. Poua Bedina pouadeniza inassonarinitoui. 23Nazana zama bazimacca madirrapa Deo Bediza: “A, nauato taui” quenauiuarrine. Pina Imehiza: “A, nauato taui” quenarrarissa quenauiuarrine. Naraha Poua Bediza: “Nauato taui” quena-rrarazapa pocca Abi poua Cazossedeza naco: “Nauato taui” quena-rrararrarissa narrari −nade Zeso.
24—Parrissehera tiadeniza uati onana: Ouatti mittemanarraridenipa arra oua Cazossede Abi Deoza parrissa quenaza naco camittehe rriquerreranicca carrimana-zanapouitoui. Poccadeni uimasiri manaconipe pouadeniza ssonari-rreranitoui. Taide Deoza ssamoqquiri nazapa pina zoqquemanarrarissa quenaraha narraro inebomaneza camittehe rriquerreraniccaza toquerrenarrari −nade. 25—Parrissehera tiadeniza uati onana: Rridapanape uima bacco nabote nani: Deoza ssamoqquiri narrarideni naco Deo Bedi ouatti mittemanauitoui. Ouattiza iboraqquiri nazapa camittehe rriquerreranicca carrimanauitoui −nade. 26—Abi Deopa camittehe rrinede. Ouape Poua Bedi ouaza naqui camittehe da inarraro. 27Occa Abirrine ouatti ocarrirrarope niza zama rriqueza madirradenicca uimasiri manaconi pouadeniza onassonarinitoui. Ouape Madirra Bedi orrarrarode. 28Arrirraro uima timittemanezape uarro ticanire-rrerarri. Niza arra rricaporrarideni ouatti mittemanazapa nauatonimanauitoui. 29Nazapa bicani inanemanehe rricarrarideni nauatonimanazapa camittehe rriquerreraniccaza toquerrenauitoui. Naraha uimasiri inanemanehe rricarrarideni nauatonimanazapa poccadeni uimasiri manaconi izaua-baqquizapa narrizoue rriquerreraniccaza madimana-zanapouitoui −nade Zeso.
Abi naco Poua Bedi tauimari ecomerarraro
30Zesopa zodeodeniza uati uati zanaporraride: —Nazama oua mottape madirra poccadeni uimasiri manaconipe pouadeniza onassonari-rrerarraro. Abi Deo Poua Atti omittezana uimarideni ohocattema narraro. Ouape oua motta oua touini onanicca onane-rrerarraro. Naraha arra oua Cazossede Poua Attissa onanezana uimarideni ocattemeza onaparrirenissa tarraroparri. 31“Ouape Deo Bedi orrani” onarraro oua motta uati uati onezape tiadenipe ouaza: “Poua motta poua atti iaza ehecomera narraro parrissa rrerani” titiquena narraro −nade Zeso. 32—Naraha otauimari cacomeradepa ouaha madiui. Narraripa Zouao Batista. Pouapa otauimari parrissehera uati uati tarrari nauato onarraro −nade Zeso. 33—Nazama Zouao Batistacca uimatoui zosse tinabaqquimanapoza naco otauimari ecomerarraro. Pouapa parrissehecca uimara uati uati tarrari −nade pouadeniza.
34—Naraha madirra otauimari cacomerade noueraza naqui peperri. Ouape Deo Bedi orrani otauimari uima onihiza naqui auato tarraro. Arri otauimari Zouao ecomeraporrarocca tiadeniza uati uati onarrarope tossiuauehe ticarrimananiuarrine. Zouao Batistacca uatinarraza parrissa tiquenapozape ouaza naqui parrissa tiquenaniuarrineraha. 35Zouao Batistapa pina rrorrororo toqueuessiza rrororo canaporrarissa narrari. Poua rrororonepa arra pocca uatinarra tiadeniza bica tade. Pouaza tetetizemana neraha amossi nazapa peperri tiquenade. 36Nazama Zouao Batistacca uatinarrape arrimani. Occa nauatouena deni torrarraro. Occa nauatouepe occa Abicca zossenirri. Narraro nauatouerrinena uima auato tarraro: Parrissa occa Abi oua cazosserrari.
37—Nazama Abi oua cazosserrarirrinena occa uima auato tani qqui tiquenarraroparri. Naraha Poua Atti mouini timittemane-rrerani. Poua assire naco qqui tiquena-rraraui. 38Poua Atti naqui tibodideniza madiza-rrerani, Abi Deo icazosserrariza parrissa tiquenerrerarrarorrine. 39Nazama tiadenipe Deo Atti dozo nani timittemananissa taniuarrine ua ua titiquena nani. Tettidenipe: “Deo Atti dozo naniza camittehe rriquerreranicca bacco inaniuarrine” titiquena narrarope nani Deo Atti dozo naniza otauimari anini. 40Naraha tiadenipe ouaza parrissa tiquenerrerarraro. Ouaza parrissa tiquenezape camittehe rriquerreranicca ticarrimana-zanaponitouiraha −nade.
41—Madirra attidenipa: “Tiape deni tirrani. Bica tinani” quenauiuarrine occarrona-rrerarraro. 42Ouape tibodideni nauato onani: Deocca touati uanehepe tiadeniza nouerani. 43Ouape occa Abi onima pocca zossenirri occarronarrarode. Naraha tiadenipe ouaza: “Iaza tirrarri” tiquenerrerani. Naraha madirra ouaha poua pocca uimaza ccarronarrarizapa: “Iaza tirrarri” tiquenanitoui. 44Naraha nerrecoma tiqueneza ouaza parrissa tiquenaniuarrine? Tiadenipe arra titessedeni tiadeniza: “Tirrine uima bica tani” quenauitouina tiquenarraro. Naraha Deona orrariui. Poua Attipa tiadeniza: “Tirrine uima bica tani” nauiuarrine touinipe tibodideni uatoma-rrerani. 45Tibodidenipe arrima narraro: “Zama rriqueza Cristo-Mesia iaza uima inassonariniuarrine Abi Deoza uati tauitoui” tiqueneraha, arra tiadeniza uima inassonariniuarrinepe Moizena parra. Tibodidenipe: “Moizecca marinarra ecauanissa tezape icassiuaueranitoui” tiqueneraha tecauemananiuarrinepe tiparriremane-rrerani. 46Nazama Moizepa otauimari dozo inaporraro. Moizeza rrehe tiquenezape ouaza naqui rrehe tiquenaniuarrineraha. 47Naraha Moizecca dozonirriza parrissa tiquenerrerezape nerrecoma naza ouattiza parrissa tiquenaniuarrine? −nade Zeso.
