Zouao 2

₁Uada 3 bacco tezape Canauarri uenauenacca errete torrarraro. Canape zama arobeni onini Carireacca oza panani. Zesocca ami naqui nani errete qquide toccarraro. ₂Zeso poua uatimadedeni ia naqui naniza rrauirrezimade. Carricarricca errete rrinede iaza rrina naza rrauirrezimarrarode. ₃Naraha uva pperrene rricaza Zesocca amipe: —Uva pperrene rricaua −nade Zesoza. ₄Nazapa Zeso atti: —Ami nerrecotoui ouaza uati tinarraro? Occa uima auato onananiuarrine bacco terreraccani −nade Zeso. ₅Naraha imenipe rrirripa zozorrodedeniza uati tade: —Zeso tiadeniza uati tazapa poua attissa tinanemanarri −nade.

₆Naraha nanizape siba imeni passouarrine ccoue tozarizani 6 nehe carrimanarraride. Narrarozapa zodeodeni —Icca uima bica taniuarrine −quenaza pouadeni zepetarri ettippemana, idimoremana nanarra narrari. Narraro siba imeni ccoue tozani orrariezape passo 80 litro irrirraro nitide. ₇Nazapa Zeso rrirripa zozorrodedeniza uati tade: —Siba ccoue tozarizaniza passo tinarririzemanarri −nade. Nezape narraroza passo inarririzemanezape iponiuarri bacco bacco teri nade. Nazapa Zeso canauatori canarrarirrine passoraha uva pperrene inanarrari. ₈Nazapa Zeso: —Rrari, rridapanapa biqui taha uana tizanemanaza uenauenacca errete cacauadeza zorro ticanemanarro, icatamauiuarrine −nade. Nazapa uva pperrene uana icazanemanaza zorro icanemanade, pina Zeso attissa inanemanarraro. ₉Nazapa errete cacauadeza da icanemanazapa arra passoraha uva pperrene torrarrari biqui taha icatama nade. Naraha errete cacauadepa ssamo taza poua bodi: —Nerrecouarricca uva pperrene? −narrari. Naraha uva pperrene zozorrode pouadenina passo ponira zorro zorro inanimanarrarorrine nauatoqquiri naui. Nazapa errete cacauade arra cacarrirebote narrariza uati tade: ₁₀—Madirra bazimapa errete inauatomanezape taide uva pperrene bica tauiccara da da ihicanariza-baqquimana nanarra narrari. Madirra accaremanazana arramani marridera tauicca da da ihicanariza-baqquimana narrari −nade. —Naraha tiape uva pperrene denima bica tauiccapa teccoccobaqqui, zotodena da ticanabaqquirrarirana −nade errete cacauade atti.

₁₁Arrirraro uimape Carireauarricca oza panani Canaza Zeso taidecca canauatori canaporrari. Narrarope Zeso pocca deni torrehe auato inanaporraro. Nezape poua uatimadedeni iape Zesoza parrissa inarrarode.

₁₂Nezape coriza inidicca oza panani Capenaouarri rrauirrezippade. Zeso poua, pocca ami, poua imecotedeni, poua uatimadedeni ia bazima rrauirrezippade. Nanizape uada pamehe imadide.

₁₃Zodeodenicca errete imeni onini Pascoa touarrirezape Zesopa Zerozareuarri toccade. ₁₄Naraha nani Zerozareuarricca Deoza dada toqquimazape manaconitoui dadadedeni dade toquerrenaui Zeso qqui inabaqquirrari. Boui, eueue, ococo da da ihiquena narrari. Ziniro cacarriqquimere-manauiuarrine naco dade uiuittariri narizarrari. ₁₅Nama quenaui Zeso qqui tazapa cocossi amazati inauatorrarode. Irrinedeni poponeri narrari inaccarizaza inauapicossa, ppiro-ro naza itacossirizarraride. Nazapa Deoza dada toqquimauarricca dadadedenipa amossiniuarri moua ininebaqquide. Poccadeni eueuema, poccadeni bouima domo toqquenarraride. Ziniro cacarriqquimera-manauiuarrine ziniro naqui maca maca imeri narizade. Uauanari naqui cco cco icanacosseri narizade. ₁₆Ococo dadadedeni naco zosse ininebaqquide: —Arricca uapiuarrina ticcadeni ococo zorro zorro tininemanarri! Arri occa Abi tazarizape dada tinanemana terrerarri! −nade Zeso. ₁₇Nezape poua uatimadedeni iape eti uatomarrarode: —Deo Atti dozo naporrarope: “Ticca oza acconipe ouana ocasserani ouanitoui” nanarra napode −inade. ₁₈Naraha zotodepa zodeodeni Zeso uati icanemanade: —Nerrecorrari tia cazosseza nema nema tarraro? Rrari, ticanauatori canarri! Qqui inezana parrissa inaniuarrine −quenade.

₁₉Naraha pouadeniza Zeso uati tade: —Rrari, arrirraro Deocca oza ticanarrizomanehe carricanerre uada 3ʼpe ocanauatomanie carricanitoui −nade. ₂₀Naraha zodeodeni Zesoza uati toquenapomade: —A, paparra! Arrirraro oza Deoza dada toqquimape uarrano 46 naha zepedeni irrimanade. Naraha tettipe: “Arrirraro oza uada 3ʼpe ocanauatomanie carricanitoui” taua. Nema ticanana-rrerani! −quenade.

₂₁Narraro ozacca uima uati tarraripa poua assire tauimarini uati tarraride. ₂₂Iape poua uatimadedeni Zeso zoqqueza nauatonizana eti uatomarraroparride. Narrarope poua uati taza imittaporrarode. Nezape Deo Atti dozo naporraroccaza denima rrehe parrissa izanaporrarode. Zeso uati uati tarrari imittaporraroza naqui rrehe parrissa inarrarode.

₂₃Zesopa errete Pascoatoui Zerozareza madiccazapa canauatoriri canarizarraride. Pocca nauatoue qqui toquenazapa madirra mota pouaza parrissa quenade. _24-25Naraha Zesopa poua bodiza nauato tarrari: —Ouaza parrissa quenauissa taui −narrararrari. Pouapa madirra bodicca uima mittauiuarrine pouadeniza: —Nerrecoma nani tibodidenicca uima? −narrararrari. Madirra pouadeni bodicca uima pouaza uatide noueraraha pouapa nauato tarrari.