Zouao 19

₁Nazapa tamine Pirato isso teppeppe icazossebaqquiza Zeso cossi iquenade. ₂Isso teppeppedeni Zeso taticca cotiui atinema icouemanaha rricazapa tatiza ettarimanade. Nazapa etero macconi motaranicca pina tamineccassa narraroza Zeso ineuezemanade. ₃Nazapa Zesoza rraui torressiza pouaza maizemanarrari: —Zodeodenicca taminepa bica taui, bica taui! −quenade. Nazapa pano idanimanade.

₄Nazapa Pirato qquenapomaza zodeodeniza uati tade: —Rrari, ouattiza Zeso eqquenemana-pomauiuarrine. Poua qqui tiquenazapa nauatoqquiri tiquenaniuarrine: Ouape narrari maqquiderrecca uima omittezape pocca uima uaidira tanicca nouerani −nade. ₅Nazapa Zeso tatiza cotiui atinema cauittari, taminecca etero macconi oro tozimaha eqquenemanade. Nazapa Pirato atti: —Rrari, arrarrari maqquiderre qqui tiquenarro! −nade. ₆Naraha dada toqquimade taminedeni, Deoza dada toqquima oza cacauadedeni tezerre Zeso qqui toquenazapa parra rroua toquenariui nade: —Aua porimacossaniza zoqquena, zoqquena! −quenade. Naraha Piratopa: —Tiadenina tiaqquemanaza aua porimacossaniza coba tizanemanana! Ouazape pocca uima uaidira tanicca nouerani −nade. ₇Naraha zodeodenipa poccadeni uima uati toquenade: —Iape icca marinarra ecauezape Zesopa inanazoqquena, inarraro. Poua attipa: “Ouape Deo Bedi orrani” nanarra naraha narraro uima iaza bica terrerani inarraro −quenade.

₈Tamine Piratopa zodeodeni attideni: —Zesopa Deo Bedi orrani naui −quenaui mittazapa denima cappinade. ₉Nazapa Zesoza uati tauiuarrine pocca ozauarri toqquezimani-pomade. Zesoza poua attipa: —Tiape nerrecouarricca tirrani? −nade. Naraha Zesopa poua cacoma nade. ₁₀Naraha Pirato attia: —Ouazape tia tecomarraroqui? −nade. —Ouaza ssamo tinarrarorane? Ouape arrirraro zamacca daco orrirarrarope ouatti ocarrini. Tiqquenaniuarrine uati onezape tiqquenanitoui. Tizoqquena oneza naqui, tia coba izanemananitoui −nade Pirato atti. ₁₁Naraha Zesopa poua cacomerade: —Tiape ouaza deni tirra-rrereraha Deo tia cazosseza deni tirreza tetti ticarrirraro −nade. —Tirrine ouaza uaidira teraha arra oua ccaccarronadedenicca uimana denima uaidira tarraro −nade. ₁₂Nazama Pirato Zeso atti nama naui mittazapa Zeso tappa inauiuarrinecca uimatoui uati tapomaraha zodeodenipa rroua rroua quenade: —Zeso tappa tinazapa rromanodenicca tamine deni torrauicca poua tesse tirra-rrerani! Madirra attipa: “Ouana tamine orrani” nazapa rromanodenicca tamine deni torrauicca uadie torrarrari −quenarrari Piratoza.

₁₃Tamine Pirato zodeodeni atti nama quenaui mittazapa Zeso amossiniuarri iaqquenemanapomauiuarrine uati tarraride. Nazapa Piratopa uima cacattemauarricca uiuittariza uittarirraride. Pocca uiuittaripe pocca uauari deni torra nauiuarri uittarirraride. Nanizape siba ppa narizani, sseque tarraro. Zodeodeni atti ebereozape: Cabata, quequenanarrari. ₁₄Narraro uadazapa rrassinarracca uadatoui narroremanaporraride. Narraro rrassinarracca uada sabadope errete Pascoacca rrassinarra torraniuarrine. Nazapa marri orrari uariri naza Pirato zodeodeniza uati tade: —Arra parraua ticcadeni tamine! −nade. ₁₅Naraha zodeodenipa rrouaua rrouaua canazapa: —Zoqquena, zoqquena! Aua porimacossaniza coba tizanarro! −quenade. Naraha Pirato attipa: —Oua ticcadeni tamine coba ozanauiuarrineco? −nade. Naraha dada toqquimade taminedeni pouadeni cacomeremanade: —Narraripa icca tamine torrana inerrerani! Rromanodenicca tamine deni torrauiccara orrarina inarraro! −quenade. ₁₆Nazapa Pirato pouadeniza Zeso da inade. Aua porimacossaniza coba izanemanauiuarrine isso teppeppedeni iaqquemanade.

₁₇Nazapa Zeso iaqquemanazapa poua coba zanauiuarrine aua porimacossani zorro inade. Ssono Totati Tonanissa nani quequenanauiuarri rraui torremorarrari. Narraro ssono onini zodeodeni atti ebereozape: —Cocota −quequenanarraride. ₁₈Nauizana Zeso aua porimacossaniza coba izanemanarraride. Zesopa naui madirra cobaba zanaui nocconiza torrarraride. Poua uinoriza arrauarri arrauarri quenade. ₁₉Nezape uima dozo nani tamine Pirato zosse inarroneza Zeso tetepiuarri coba izanemanarrarode. Narraro dozo nanipe: —Zesopa Nazaretiuarricca, Zodeodenicca Tamine −narrarode. ₂₀Narraro dozo nanipe zodeodeni bazima ua iquenade. Arra Zeso coba zanauiuarripe oza panani uarrira tade. Narraro uima dozo nanipe zodeodeni pouadeni atti ebereoza, zama Cresiacca madirra attideniza, rromanodeni attideniza narrarode. ₂₁Naraha dada toqquimade taminedeni qqui toquenazapa tamine Piratouarri rraui torraniza uati toquenade. Pouadeni attipa: —Arri tirrine dozo nani “Zodeodenicca Taminepe” dozo terrerarri. “Arrarrari maqquiderre attipa: ‘Ouape zodeodenicca tamine orrani’ nanarra nade” narrarora dozo tarri −quenade. ₂₂Naraha Piratopa: —Orrine dozo narrarope, peperri −nade. ₂₃Nazapa isso teppeppedeni Zeso coba izanemanaha rricazapa eteroripe isso teppeppe 4 quenarrarideni inaqquemaneza pouadeniza pouadeniza narizade. Pocca etero arabo tanicca naqui idimanade. Naraha narrarope ssequirani nemanehe pama cossani. ₂₄Nazapa isso teppeppedeni pouadenira uimahaha canazapa: —Rrehe, ssorra inari-rrerana. Itesse orrariaza torraniuarrine siba bedeniza coro coro ineza qqui inana. Nerrecorrarizana torraniuarrine? −quenade. Narraro uimape Deo Atti dozo naporrarossa inanemanarrarode. Uimape arrima narraro: —Occa eterope icarraribaqqui-mananitoui −naponi nade Deo Atti dozo naniza. —Occa etero arabo tanicca naqui nerrecorrariza torraniuarrine? quenaza siba bedeniza coro coro quenauitoui −naponi nade Deo Atti dozo naniza. Isso teppeppedenipa pina narrarossa inanemanarrarode.

₂₅Nazama naui Zeso coba zanauizapa Zeso pocca ami, poni imanicotani poni tassani Cleopacca amonerre Maria, Maria Madarenauarricca queneza domoni uarrarode. ₂₆Naniza Zeso pocca ami uani qqui tarraride. Ouape Zeso uatimade. Ouazana Zeso uati cauanari canarraride. Ouape Zesocca ami uinoriniza ouani Zeso oua qqui tazapa imeniza uati tarraride: —Ami, arra tinoricca uarraripa ticca erredeni torrana −nade Zeso. ₂₇Poua uatimade ouaza naco uati tarraride: —Arri occa amipe ticca ami torrana −nade. Nama nazapa poua uatimade ouape Zesocca amipe occa ozauarrina onamadirrarode.

₂₈Pouadeniza uati taha rricazapa Zeso pouarrine bazima inaparrirenissa tani nauato tarrari. Deo Atti dozo naporrarossa inananiuarrine naqui uati tade: —Obacco rroconi −nade. ₂₉Naraha nauiza uva pperrene ssicataui rrorroza carrimanarraride. Uva pperrene ssicatauiza uassa tarrari ezippemana, aua isopo ininiza oro iquenazapa Zeso arrariza da inamacossemanade. ₃₀Zesopa uva pperrene ssicataui rroso inaha rricazapa uati tade: —Bazima rricanissa tani −nade. Nazapa tocatteza naza uatiade.

₃₁Zeso zoqqueuicca uadape sexta-feira. Narraro uadaza zodeodenipa rrassinarracca uadatoui narroremanaporrari. Aua porimacossaniza assiredeni coba zanemanaui parra naccauiuarrine nacasseraqquiri narrari. Narraro rrassinarracca uada sabadope errete Pascoacca rrassinarra uima deni torranicca. Nazapa zodeodenipa tamine Piratoza uati toquenade: —Isso teppeppe ticazossebaqquiza coba zanemanarrarideni issodeni iaquiderriza-rizemanana. Cacotazapa assiredeni naco dicca iquenarizana −quenade. Pirato rrehe nazapa isso teppeppe icazossebaqquirrari. ₃₂Nazapa isso teppeppe coba zanemanarrarideni issodeni iaquiderriza-rizemanauiuarrine rraui torrade. Bacco toquenazapa taide Zeso uinoricca cobaba zanarrari issodeni iaquiderriza-rizemanapode. ₃₃Naraha Zeso uatiaui qqui toquenazapa poua isso iaquiderrize-manarrarade.

₃₄Zesopa uatiaraha nama naha ppari uauarrinaza isso teppeppe zo tanarra, pora, emene tocca passo tocca nade.

₃₅Arrirraro tiadeniza uati onarrarope oua onoccoza qqui onarraro. Tiadeniza parrissehera uati onarraro Zesoza rrehe tiquenaniuarrine. Ouape nauato onarraro ouattipe parrissa. ₃₆Zeso tone iderrizemana-rrararraricca uimape Deo Atti dozo naporrarocca uimaza parrirenissa tani. Nani Deo Atti dozo naporrarope: —Tone orraria rrai inanemana-rrarauitoui −naponi nade Deo Atti dozo naniza. ₃₇Deo Atti dozo naporraro onihi naqui: —Errinemanaui naco cattomama canauitoui −naponi nade Deo Atti dozo naniza, inade.

₃₈Zeso errinemanaui nattipa Zoze oza Arimateauarricca madirrapa Zeso assire ppa izauiuarrine tamine Piratoza uati tarraride. Pouapa Zesoccaraha zodeodeni noppine poua cacomaza madirrari. Nazapa Pirato rrehe naza Zoze tocanarroraniza Zeso assire dicca inazapa zorro inade. ₃₉Nicodemo naco nauiza bacco nade. Narraripa taide zomeraha Zesoza qquide toccaza pouaza uati uati tarraride. Narrarina marrorro 30 quilo eccarronarrarode. Narraro marrorrope aua amani tada tani onini mirra, aua onihi marriconi onini aloe carrimarraro. Marroni bica tarraro. ₄₀Zozepa Nicodemo tezerre Zeso assire etero zorrorani onini linhoza rrore inaqquimanade, aua marriconi marroni bica tarraro icanarrimemaneza. Zodeodenipa poccadeni madirra zoqquezapa poccadeni ppanirripe nama nama quequenanarraride. ₄₁Nazama naui Zeso coba zanaui uarrira tanizape ppa taui carri tarraride. Nanizape tonoccobiri zati sibaza ui tozimani anirrarode. Narrarozapa madirra zoqqueui poza-rraraccaui. ₄₂Zodeodenicca rrassinarracca uada bacco tabote narrarorrine narraro tonoccobiri uarrira taniccaza Zeso assire ibezemanarraride.