Betaniaza Zeso amori marrorroza Maria sso icanarirraro
1Zodeodenicca errete onini Pascoa touarrirarroneza uada 6 nehe tossiuauezape Zeso ineza oza capamema narraro onini Betaniaza bacco inanipomade. Nauizapa Razaro madirrari. Pouapa zoqqueraha Zeso poua inauatonirraride. 2Naui Betaniazana Zeso rripauiuarrine narroremanarrari. Razaro caripene Martape zamatapa ppede torrarraro. Razaropa rrirripa uauanariuarri rrassi tarirraridenizama Zeso tezerre rripemanarraride. 3Naraha Razaro caripene onihi Mariape marrorro marroni bica tarraroza Zeso amori ssohoho icanarirraro. Narraro marrorro oninipe nardo. Narraro marrorrope passoza carrimerani, uatini ccara tani. Nezape poni tatini conaniza amori sse ippirraride. Oza bodiza marrorro marroni toccabaqquide.
4Naraha Zeso uatimade orraria Zoda Iscariote Zeso ccaccorade torrauiuarrine poua attia: 5—Nerrecotoui narraro marrorrope manaconitouira da icana-rrerarraro? Narraro marrorro manaconiza da icanezape ziniro ccarara 300 denario iaza da ineza madirra cappiremanarrarideniza da iqquimanitouiraha –nade Zoda.
6Zoda atti nama nazapa pina cappiremanarrarideniza uati uana tarrarissa naraha pouapa zinirotouira bodi uatorrari. Pouana botirride rarrari. Pouadeni bazimacca ziniro pouana ecaueraha motape pouaza ihinana narraro. 7Naraha Zeso attipa: —Peperriua, poni sso icanarirraro bica tani. Narrarope pina ozoqqueza oua nema inanemaneza oua ppa izemananiuarrinessa narraro narroraporraro −nade. (Zodeodenipa poccadeni madirra zoqquezapa nama quequenanarrari.) 8Nazapa Zeso denima uati tarrari: —Madirra cappiremanarraridenina tinorideniza madimana-zanapouitoui. Naraha ouape tiadeniza omadizanapo-rreranitoui −nade Zeso.
—Razaro naco zoqquena −quenarrari
9Zeso Betaniaza bacco nanipomaui zodeodeni mittemanazapa mota uapi taha Zeso qquide rrauirronarrari nade. Zeso qquidea orrari-rraraui. Razaro qquide naco rrauirronarrari. Razaropa Zeso poua inauatonirra narrari. 10-11Razarocca uimarrine zodeodeni motapa Zesozana parrissa quenarrari nade. Nama quenazapa Deoza dada toqquimauarricca taminecca uimaza paparra quenarrari. Nazapa dada toqquimade taminedeni attipa: —Razaro naco zoqquena −quenaui nade.
Zeso Zerozareza bacco tozimazapa bazima pouaza uatizemanarrari
12Nezape errete onini Pascoatoui madirra zama onihi onihicca naco Zerozareuarri rrauirronana canarrari. Uada ssiuarrape uima mittemanarrari: —Zeso arra Zerozareza bacco nabote naui −quenaza uatizemanarrari. 13Nazapa poccadeni uatizehe bica taniuarrine birirrari eppe ti quenaza —Zeso bacco irrizana −quenaza rrauirronarrari. Madirra motapa birirrari eppeza rraui bina inarronemanarraro, —Rraui bica taniuarrine –quenaza. Madirra motapa birirrari eppe zorrorro zorrorro canarronaza uaua narronemanarrari: —Deopa deni torraui, deni torraui! Ia Zozossede onima ccarronarrariza biquehera torrana, torrana! −narronemanarrari. —Pouapa ia Izarraeo potemauideni icca tamine! Pouaza biquehera torrana, torrana! −narronemanarraride.
14Zesopa rrauiza borro qqui tazapa narrariza touittari-zanaporraride. Narrarope pina Deo Atti cacomerabote Zacaria dozo inaporrarossa narrarode:
15—Oza panani Siaouarri timadimanarrarope ticappinemana terrerarri.
Arrana ticcadeni taminepa borro napizatiza bacco narronauitoui
−naporraro Deo Atti dozo naniza.
16Narraro uimape Deo Atti dozo naporraroza auato taporaha taide ia poua uatimadepe ibodiza uima auato terreraccade. Zotodena Zeso aua porimacossaniza zoqqueza nauatoniui nattinina Deo Atti dozo naporrarocca uima ibodiza auatomarrarode. Nazana ettipe: —Rrehe, nema narrarope Zeso pouazana torrani qqui inapode −inarrarode.
17Madirrapa Razaro ppa tozaraha Zeso uaua naza nauatonirrari qqui toquenarraridenipa poua tauimari uati nimanimana-pomarraride. 18Nazapa madirra bazimapa: —Zeso rrauiza bacco irrizana −quenaza Zesotoui rrauirronarrari. Pouadenipa —Zeso canauatori canaui −quenaui uima mittemanaporra narrari. 19Naraha zodeodeni mota marinarra parizeoza rrehe quenarraridenipa pouadenira uimahaha canarrari nade: —Arrina, iape irronerizani tarri. Pouaha deni torraui. Madirra bazima pouaza toquerrenaui −quenaui nade.
Zama Cresiauarricca madirrapa: —Zeso qqui inana −quenarrari
20Zama Cresiacca madirra sibera taha naco Zerozareza bacco narronemanade. Narrarideni naco Pascoacca erreteza Deoza uatizemanauiuarrine rrauirronarraride. 21Zeso uatimade Piripi bacco iquenazapa pouaza uati toquenarrari. Piripipa zama arobeni Carireacca madirra. Oza Besaidaza madirrari. Nazapa pouaza uati toquenarrari: —Zeso qqui inana −quenaui nade. 22Nazapa Piripi poua tesse Aderetoui toccarrari, Cresiadenicca uima uati tauiuarrine. Nazapa Zeso madiuiuarri uima uatide touedarrari.
23Nazapa Zeso pouadeniza uati tarrari: —Arri ouape Madirra Bedi orrarraroa occa deni torrehe auato taniuarrinepe touarrirani −nade. 24—Rrehe, parrissehera tiadeniza uati onarraro: Arroi rrizaza tirico nocco namiza dappo tiquenazapa imepa bote taui. Nocco namiza torraza moro tauiuarrine accora tazapa poua ime boteraha bodicca moro tarrarina nocco touapi taui. Naraha nocco poua ime acco tazapa bodicca moronine-rrararrari −nade. 25—Madirra naco pocca madie arrirraro namiccaza uati uanera taza ouaza eccorezape Deouarri camittehe rriquerreranicca carrizanapouitoui. Naraha madirra pocca madieza uati uana taza ouaza acco tazapa camittehe rriquerreranicca carri-rrarauitoui. 26Madirra occa zossenirriza iboraqquiri nazapa oua nebomana-rrarauiuarrine. Ouaza rrauiriza-zanapouiuarrine. Oua omadinizana pouadeni naco madimanauiuarrine. Madirra occa zossenirriza iboraqquiri narraridenipa Abi Deo Pouana pouadeniza: “Bicaqquiri tiquenani” nauitoui −nade Zeso.
Zesopa: —Ozoqquezana uima bicani torrarizanitoui −narrari
27Amazati Zesoza ocasserehe ssonariza poua attipa: —Rraho, orraborreriri canani! Nerrecoma onaniuarrine? “Abi, arrirraro uima bacco tabote nani oua tinassiuauarri” onaniuarrinequi? Naraha ouape arrirraro uimatoui occarronarrarode. 28Abi, ticca deni torrehera auato tana! −nade. Nanerre memeuarri atti mittaronade: —Ouape occa deni torrehe auato onanapode. Rridapana naqui occa deni torrehe auato onanapomaniuarrine −nade atti memeuarri. 29Nazapa nauiza madirra domo uarrari bazima mouini mittemanazapa: —Ttottorode −quenaraha motapa: —Deo Atti ccaccaronade pouaza uati uati tarrari −quenade.
30Naraha Zesopa: —Narraro mouinipe oua omittaniuarrine rrerani. Tiadeni timittemananiuarrine mouini mittaronarraro. 31Arrirraro zamacca uima uaidira tezape Deo izaua-baqquiuitoui. Narrizoue naqui narroranitoui. Arrirraro zamacca uaidirehe zozossede Tocorime-Taminepa uauattarro torrauitoui. 32Naraha niza madirrarrine que onezana madirra bazimapa ouazana toquerrenauitoui −nade Zeso. 33Narraro uima Zeso uati tazana auatomarrarode, poua aua porimacossaniza zoqqueuicca uima.
34Naraha madirra ouaha attidenia: —Icca Deo Attiza ua inezape “Mesiapa madi-zanapouitoui” nanipe imittade. Naraha tiape: “Madirra Bedi acca icanamacosse-manazapa que tauitoui” taterre naua. Nazapa nerrecoma narrarina Madirra Bedi? −quenade.
35-36Naraha Zeso attia: —Ouape ssiuarrani orrani. Ossiuerrene tiadeniza auato taccani. Naraha tiadeniza biqui tehe omadiccani. Tiadeniza omadiqquezama ouaza rrehe tiquenarri, ouaza tiquerrenaniuarrine. Narraro uimape ssiuarra taqquezama rraui tirrarizarri. Nani zizinirrine uarro ticanire-rreraniuarrine. Arra madirra ziziniza ccarizazapa poua rrauine ssamo taui −nade.
Narraro uima Zeso uati uati taha rricazapa parramarauiuarri toccarrari, madirra poua qqui toquena-rrarauiuarrine.
Zodeodeni motapa Zesoza parrissa quena-rrararrari
37Zodeodenipa pouadeni noccoza Zeso canauato-uarrapoui canarizaui qqui toquenaraha pouaza parrissa quena-rrarade. 38Nama quenarraripa pina Deo Atti cacomerabote Izaia dozo inaporrarossa inanemanarraro. Izaia attipa:
—A, ia Zozossede, icca uimaza parrissa narra canima-rraraui. Nerrecorraridenizana Deocca dacorehe auato tapazerre? −napoui nade.
39Rrehe, zodeodenipa Zeso canauato-uarrapoui canaui qqui toquenaraha parrissa quenauiuarrine bodideni ssamoqquiri nade. Izaiapa poccadeni uima onihi naqui dozo inaporraro:
40—Deopa noccodeni ecossabaqquirrari, qqui toquena-rrarauiuarrine.
Deopa bodideni inassamobaqquirrari, touattemana-rrarauiuarrine.
Deo Attipa: “Bodideni cacarriqquimerazapa onabicabaqquiuitouiraha bodideni cacarriqquimere-manaha narraraui”
−napoui nade Izaia dozo inaporraro.
41Izaiapa Zesocca deni torrehe qqui tapozapa tauimari dozo inaporraroparri.
42Naraha zodeodenicca taminedeni motapa Zesoza parrissa quenaraha marinarra parizeoza rrehe quenarrarideni noppine pouadeni cacomemanarrari, —Icca Deo Atti mamariuarri ia touattarrobaqqui-manarana −quenaza. 43Pouadeni bodipa: —Madirra iaza uatizemanana −quenarrari. Deo pouadeniza uatizeuiuarrine touini quena-rrararrari.
Zeso attiza iboqquiri narraridenipa narrizoueza toquerrenauitoui
44Nazapa Zeso rrazirema uati uati tade: —Ouaza parrissa narraripa ouazaha parrissa naui orrari-rraraui. Occa Abi oua zosse naronarrariza naco parrissa narrari. 45Madirra oua qqui tarraripa oua Zosse naronade naco qqui taui. 46Ouape ssiuarrani rrinede orrani arri namiuarri occaronarraro, ouaza parrissa quenarraridenipa ziziniza madimana-rrarauiuarrine. 47Naraha madirra ouatti mittemanaraha pina ouatti mittemanarraraui narrarideni naco ozauabaqqui-rraraui. Ouape madirra zauade occarona-rrerade. Madirra tocassiuauerauiuarrinera occaronarrarode. 48Madirrapa ouaza uattarroqquiri narrari. Ouatti mittemanaraha iboqquiri nazapa zama rriqueza Abi Deo uimasiri manaconi uatide torrazapa pouadeniza arrama nauitoui: “Tiadenipe occa erredeni atti mittade nacasseraqquiri tiquenezape narrizoue rriquerreraniccaza tiquerrenanitoui” nauitoui. 49Neraha ouape oua mottacca uima uati uati ohona nerrerani. Abi oua Cazossedena: “Arrima narraro uima mari ticanabaqquina” naza uati uati onarraroparri. 50Naraha ouape nauato onerre narraro. Abi pocca zossenirripe camittehe rriquerreranicca. Arri uati uati onarrarope Abi oua cazosserraricca −nade Zeso.
