Deocca zossenirri zati icassiuaueraniuarrinecca eti rrima-rrerana
1Rrehe, Deo Bedipa Imehicca zozosse tabaqquideniza deni torrarrari. Nema nezape marinarra parrissehecca imittaporraro eti rrima-rrerana, onarraro. Narraro eti rrimezape pina Deocca rraui bicani ineboza parrimaraniuarri uere inarrarossa inarana. Parri! Nema inerrerana. 2Maittaccazama Deo pocca zozosse tabaqqui memeuarricca inauattabaqquizana Moizeza uati toqquimemanarrari. Narraro Deocca zossenirri parrisseheccape dacorehe carrini. Madirra narraroza iboqquiri naza uaidirehe inanemanezape Deo inarrizo-baqquirrari. 3Rridapanape Deocca zossenirri zati icassiuaueraniuarrinecca iaza anini. Narrarope denima bica tarraro. Naraha narraro ettarrozape Deocca narrizoue zori inapazerre? Zori inerreranitoui! Ia Zozossede Zeso pouana taide narraro zossenirri bicani madirra mari mari ihicanabaqqui narrari. Zotodepa narraro zossenirri mittemanarrarideni ia mari tocanabaqqui-manaza parrissa torrani iaza auato inanemanarrarode. 4Deo naco pocca zossenirri zati parrissa torrani iaza auato inanarrarode. Arri qqui inapo-rrerarraro auato inanarrarope uapi tade. Arra comaqquiri narrarideni ihinanomibaqqui narrari, canauatoriri canarizarrari, poua touini narrariza naco Poua Corime ihinanariza narraride.
Zesopa pina iassa naza imecote torrarrari, ia tonassiuauabaqquiuiuarrine
5Nizaranibote Deo zama zati inanezape narraroza imadinitoui. Naraha Deopa pocca zozosse tabaqqui memeuarriccaza: —Narraro zama zaticca tamine tiquerrenarri −narrararrari. 6Poua Bedina narraro zama zaticca tamine torrauitoui. Narraro uimape Deo Atti dozo naporraroza anirraro:
—Abi Deo, Tiana deni tirrani. Ia madirrape arrimani iquerrenani.
Naraha itoui teti uatomarraroqui? Nerrecotoui iaza bica tinarraro?
7Tirrinepa ticca zozosse tabaqqui memeuarricca deni toquerrenaccaui. Ia madirrape ia arrimani tinanabaqquiccarraro.
Naraha zotodepe ia deni tinanabaqquinitoui. Ticca deni torrehe, ticca biquehe iaza tinanarizanitoui.
8Nema tinanazape tirrine memeuarricca, namiuarricca bazima naco iaza arramani toquerrenauitoui. Iana poccadeni tamine iquerrenanitoui −nani Deo Atti dozo naniza.
Rrehe, madirra orrariapa bazimaza deni torrazapa uapima poua attiza iboraqquiri nauitoui. Poua attiza ibo tauiuarrine nouerauitoui. Rridapanape narraro deni torrehe pouaza torra-rreraccani. Bazimapa poua attiza iboraqquiri narraraccaui. 9Narrari madirra orraria deni torrarraripa Zeso. Pouana deni torraporaha Deorrine arramani torraccarrari. Pouapa Deo Bediraha pina madirrassa naha torrazapa Deo pocca zozosse tabaqqui memeuarriccana deni toquerrenaccarrari. Nazama Deo iaza uati cauanari canaza Poua Bedi Zeso zoqqueuiuarrine eccorarrari, bazima pouaza rrehe inarraro ia tonassiuauabaqquiuiuarrine. Zesopa zoqquehe inauaneza rridapanapa Deorrine deni torrarrari. Bazima pouaza iboraqquiri inaniuarrine Deo pocca deni torrehe, pocca biquehe pouaza inanarraro. Rrehe, narrari Zeso poua tauimari rridapana iaza auato tani, onarraro. 10Memecca namicca bazimapa Deo pocca. Pouarrine nauatorizaporrari, Pouarrine anizanaporrari. Poua Bediza rrehe quenarrarideni pocca deni torreheza toquerrenauiuarrine touini narrari. Narrarorrine Zeso ocasserani inauaneza zoqqueuiuarrine Imehi Deo ecossa-rrerarraro. Nama nazapa Deo Poua Bedi Zeso Cristo madirra Tonassiuauade torrauiuarrine inaparrireuissa tarrari.
11Zeso pouarrine uimarideni touissorraridenipa Abi Deo orrariaza: —Abi −quenarrari. Zeso naco Deo Bedi torrarrari. Nama nazapa Zeso iaza: —Ouimecotedeni −nauiuarrine cappina-rrararrari. 12Narraro uimape Deo Atti dozo naporraroza anirraro, pina Zeso Imehiza uati uati tarrarissa narraro:
—Abi Deo, ticca uima ouimecotedeniza uati uati onanitoui.
Tetti rrirririuarri iqueriqquiza pouadeni mittemanauiuarrine:
“Abi Deopa bica taui, bica taui” rriri rriri onanitoui −narrari.
13Deo Atti dozo nani onihiza naqui:
—Ouape Deozara parrissa onanissa zanaponitoui −narrari.
Deo Atti dozo nani onihiza naqui:
—Ouape arri, Deocca erredenideni ouaza inanabaqquirrari tezerre idomo uarraro −narrari.
Rrehe, narraro uima Deo Atti cacomerabote dozo inarrarope pina Zeso poua Imehi Deoza uati uati tarrarissa narraro.
14Nazama Deocca erredeni iape essire icarri, itone icarri, emene icarri narraro. Zeso naco pina madirra iassa naha tossonazapa assire carri, tone carri, emene carri narrari. Nama nazapa zoqqueuiuarrine parrirerrari. Zoqquezapa Deoza uauadideza deni torrarrari. Arra Deoza uauadide Tocorime-Taminepa taide madirra parra inarricariuiuarrine parrireraha Zesorrine pocca dacorehe tossamorraro. 15Zeso poua ccaccoraza zoqquezapa ia acco tocanabaqquirrari, parri izoqqueri-rreraniuarrine. Taidepe zoqquehe parri izoqquerinicca noppineni icappinehe imadi-zanaporaha nema izanapo-rreraniuarrine ia tappa tabaqquirrari. 16Zesopa Deocca zozosse tabaqqui memeuarricca acco canade ccarrona-rrararrari nauatoqquiri inarraro. Abarahao potemaui iquerrenarraro ia acco canadena ccarronarrari. 17Pouapa pina iassa narrarirrine ia acco canade parrireuissa tarrari. Nama nazapa poua poua ccaccoraza zoqquezapa icca danirri Deoza torrarrari. Narraria icca uimasiri manaconi torrarrari. Pouaza parrissa inezape Deopa iaza: —Peperri, tiaza ouadi-rrerani. Ticca uimasiri ouati rrimani −narrari. Narrarorrine —Zesopa icca danirri Deoza dada toqquimade deni torrauicca −inarraro. Pouapa iaza uati uana, Imehi Deoza uati uana tarrari. Maizera tarrari, Imehi Deoza damera tarrari. 18Pina iassa naza ocasserani auarraride. Tocorime-Taminepa uimasiriza inanauiuarrine pouaza damera taraha Zesopa dacoraza uimasiri inana-rrerarraro. Nama nazapa ia acco canade nauato tarrari. Tocorime-Taminerrine touini inanicca auatoza uimasiri inane-rreraniuarrine Zesocca acco canehe iaza parrirenissa tarraro.
