Zerozarecca naco Pedoro tauimari mittemanarrari
1Nazama zama arobeni Zodeaza madimanarrarideni arra Zesocca zozosse tabaqqui uima mittemana, Zesoza rrehe quenarrari ouahadeni naco uima mittemana narrari: —Madirra ouaha zodeo querrena-rrararaha Deo Atti mittemanazapa parrissa quenaui −quenarrari. 2Naraha Pedoropa oza panani Sezareauarri ccaniza oza panani Zerozareuarri bacco nanizapa zodeodeni Zesoza rrehe quenarrarideni mota pouaza boquemanarrari. 3Nazapa Pedoroza uati toquenarrari: —Nerrecotoui zodeo querrena-rrararaha poccadeni ozaza tiqquezimeza pouadeniza tirriparrarotte? Moizecca marinarraza nema inanipe oppina tani nauato tineraha −quenarrari Pedoroza.
4Naraha Pedoropa pocca uima taideccazama pouadeniza ecomerarronarraro: 5—Rrehe, ouape Zopeuarri omadiza Deoza uatide orreraha pina occa uadassa neraha Deorrine parrissa qqui onarrarode. Meme touaba neza pina etero zorroranissa nehe ssoque caniqquimehe ouaza bacco naronani qqui onarrarode. 6Narraro etero ssoque caniqquimani bodiuarri qqui onanissa tezape bani carrizamaro nade. Zamacca bani, ozacca bani, bani eppe carrimanarrarideni, bani pouadeni baccoza rrauirizarrarideni, bazima qqui onade. Zodeodeni iaza bani oppina tauiccama carrimanade. 7Nanarra memeuarri atti omittazapa: “Pedoro, titemarri! Ticca bani titauaccarro, tirripaniuarrine” nade. 8Naraha pouaza arrima onade: “Oua Zozossede, poua! Ouape bani oppina tauicca ohorripa nerrerani” onade. 9Naraha memeuarri ouaza uati tapomade: “Arrarrari banipa Deorrine toppineraui. Nezape Deorrine toppinerauiccaza: Oppina taui, terrerarri” nade ouaza. 10Nazapa uima uati nimaniui 3 nazapa etero ssoque caniqquimanipe banima memeuarri toccamacossanirrarode.
11—Nanarra oza panani Sezareacca madirra 3 quenaha otoui zosse inarronabaqquirrarideni omadinicca ozaza bacco quenarrari. 12Nazapa Deo Corime ouaza uati tade: “Ticappinarrereza pouadeniza ticcarri” nade ouaza. Nezape arra Zopeuarricca Zesoza rrehe quenarrarideni 6, oua ineza pouadeniza rrauirrade. Nezape Coneriocca ozauarri bacco ineza rrauirrezimade. 13Nazapa Conerio pocca uima iaza uati tade. Poua attipa: “Deo Atti ccaccaronade occa oza bodiuarri auatoza ueza naza ouaza arrama narrari nade: ‘Ticca madirra Zopeuarri zosse tinabaqquirro, Simao-Pedoro arrauarri ccarronauiuarrine. 14Narrari arrauarri ccarronazapa tiadeniza ticassiuaueraniuarrinecca uima uati tauiuarrine. Narraro uimaza tia, ticca ozacca madirrama ticassiuaueraniuarrine’ nade Deo Atti ccaccaronade ouaza” narrari Conerio atti. 15Nezape pouadeniza uati uati onanerre Deo Corime pouadeniza torrarizarraride. Pina iaza torrarizapouissa narraride. 16Nezape arri Zeso uati uati tarrari obodi uatomade: “Zouaopa taide tiadeni passo dopaniza niqui tozanabaqquirrari. Naraha zotodena Deo Corime tibodideniza torrarizauitoui” nade Zeso. 17Nezape ia Zozossede Zeso Cristoza rrehe inezape Deo Poua Corime iaza torrarizaporraride. Narrarossa narraro pouadeniza naco Deo Corime inanarizarrari. Nazapa madirra ouahadeni naco Deoza toquerrenazapa ouape Deoza: “Tirrine bica terrerani” onaniuarrine oparrire-rrerani, onarraro −narrari Pedoro.
18Nezape narraro uima Zodeacca madirra arra zodeodeni Zesoza rrehe quenarrarideni mota mittemanazapa poccadeni boquehe nebomanarrari. Nazapa Deoza uatizemanarrari: —Rrehe, zodeo querrena-rrararaha Deopa pouadeniza naco uati uana tarrari. Deorrine bodideni cacarriqquimeraza Zesoza parrissa quenazapa camittehe rriquerreranicca carririzemanaui. Deopa bica taui! Deopa deni torraui! −quenarrari.
Zeso Cristo poua tauimari Atioquiaza bacco tarraro
19Nazama Estevao zoqqueui nattipa Zesoza rrehe quenarrarideni mota nanarrizo toquerrenaza arrauarri domo tocca, arrauarri domo tocca narizarraria arra zama Penisiauarri bacco, zama Sipreuarri bacco, oza panani Atioquiauarri bacco toquenarrariparra. Nauiza bacco tarizemanazapa Zeso Cristo tauimari icassiuaueraniuarrinecca uima nauiuarricca zodeodenira mari icanabaqquimanarrari. 20Naraha Zesoza rrehe quenarrarideni domo toccarrari motapa oza panani Atioquiauarri rraui torrazapa zodeo querrena-rrararrarideni naco Zeso tauimari icassiuaueraniuarrinecca mari icanabaqquimanarrari. Mamaridedenipa zama Sipreuarricca madirra pama, oza panani Sirenecca madirra pama quenarrari. 21Nazapa ia Zozossede Deocca dacorehe pouadeniza torrezape mari quenauissa tarrari. Nazapa Atioquiacca madirra arra zodeo querrena-rrararrari bazima bodideni cacarriqquimera-rizazapa ia Zozossede Zesoza parrissa quenarrari.
22Nazama oza panani Zerozarecca Zesoza rrehe quenarrarideni uima mittemanazapa Banabe Atioquiauarri zosse iquenarrari, qqui inabaqquiuiuarrine. 23Nazapa Banabe Atioquiauarri bacco taza Deo pouadeniza uima bicani inanani qqui tazapa uatizerrari. Nazapa pouadeniza uati tarrari: —Deoza parrissa tizanapomanana. Tibodideni dacoreza ia Zozossedeza dameraqquiri tiquenarri −narrari. 24Banabepa bica tarrari, Deo Corimecca dacorehe carrirrari. Zesoza naco rrehe nauissa zanaporrari. Nama nazapa Atioquiacca madirra uapi taha ia Zozossede Zesoza rrehe quenarrari.
25Naui zotodepa Banabe Saorotoui oza panani Tarsouarri toccarrari. 26Pouaza bacco tazapa Atioquiauarri rrina inanirrari. Bacco nanimanazapa nauicca Zesoza rrehe quenarrarideniza uarrano orraria madimanaza madirra bazima mari icanabaqquimanarrari. Nazapa naui Atioquiazana Zesoza rrehe quenarrarideniza: Cristocca madirra, icanacanibaqqui-manaporrari.
27Nazapa narrari uarranoza Zerozarecca Deo Atti uauati toqquimadedeni Atioquiaza bacco quenarrari. 28Pouadeni naco arra madirra toqueriqquiuiza carrimemanaza orraria uima uati tauiuarrine totemarrari, poua onipa Acabo. Pouapa Deo Corimerrine bodi nauato taza uati uati tarrari: —Niza icca zama bazimaza pemi torranitoui −narrari. (Narrarope zotode Rromacca madirra oni Craodio zama bazimacca tamine madiza pemi torrarraroparride.) 29Nazapa Atioquiacca Zesoza rrehe quenarrarideni Acabo atti: —Pemi torranitoui −naui mittemanazapa: —Zodeacca Zesoza rrehe quenarrarideni acco icanabaqquina −quenarrari. Uimahaha canazapa: —Iparrirenissa tanicca da inaqquina. Pina uemani carriuipa denima da inana, bazira tehe carriuipa bazira tehe da inana −quenarrari. 30Nazapa poccadeni danirri da inaqquimanezape Banabe Saoro tezerre Zodeauarri eccanimanarraro. Bacco nanimanazapa Zerozarecca Zesoza rrehe quenarrarideni cacauadedeniza da iquenarraro.
