2 Corintodeniza 3

₁Etti nema inezape tiadeniza pina: —Iana bicaqquiri inarraro, deni iquerrenani −inarrarossa narraroqui? Tiadeniza icca uima nema nanitide. Naraha iape nema inerrerani. Deo Atti maride ouahadenipa tiadeni mari tocanabaqqui-manauiuarrine touini quenazapa pouadeni tauimari uima teppeza dozo nani noue noue quequenanaporraro, —Rrehe poccadeni marinarra imittana −tiquenaniuarrine. Naraha iape nema inerrerani. Etti naqui tiadeniza: —Iaza uima teppe dozo tiquenarri, oza panani onihiuarri madimanarrarideniza nohue inaniuarrine −inerrerani. Uima teppe rrirehe maride rrauirrarizarraro. ₂Arri tiadenina icca uima teppessa tiquenarraro. Ticcadeni uimape ibodiza pina dozo narrarossa narraro. Arra oza panani onihiuarri madimanarraridenipa ticcadeni uima nemanehe nauatoqquiri narrari. Ticcadeni madie bica tani qqui toquenazapa pouadeniza auato tarraro: tiadeni mari icanabaqquiniuarrine Deo ia tocazossebaqquirrari. ₃Zeso Cristorrine ticcadeni madie bica tarraro bazima qqui toquenarrari. Narraro ticcadeni uimape pina Cristorrine dozo nani noue inarizarrarossa narraro. Naraha narraro dozo nanipe dodozo pparraniccaza rrerani. Pina sibaza dozo narrarossa nerrerani. Deo camitta tarrari Corimerrine tibodideniza dozo inarrarossa narraro.

₄Rrehe narraro uimape parrissa nauatoto inarraro. Zeso Cristocca iquerrenarrarorrine Deoza parrissa inaniuarrine iparrirerraro. ₅Naraha Deoza izepe irriniuarrine ia motta iparrireni inerrerani. Deona izepe irriniuarrine iaza inanarraro. ₆Pouarrine inarroranissa tezape pocca rrehe canirenirri zatiza izepe irrirraro. Narrarope pina Deo pocca zossenirri taidecca Moizeza da inarrarossa nerrerani. Narraro zossenirri taideccazara madirra madimanazapa zoqquehe rriquerreraniccaza toquerrenarrari. Naraha Deocca rrehe canirenirri zatiza madimanarraridenipa zoqquehe rriquerreraniccaza toquerrena-rrararrari. Camittehe rriquerreranicca, madie zati naqui Deo Corime pouadeniza da inarizarraro.

₇Deocca zossenirri taideccape Pouarrine bica taporraro. Ssono tetepiuarri pocca deni torrehe, Poua zibehine auato inanaza pocca zossenirri sibaza dozo ineza Moizeza da inarraro. Narraro ssonoza Deo zibehine dacorezape Moize panoza torrarraro. Naraha Moize pano zibehi taha qquezippanizapa Izarraeo potemauideni cappinemanarrari. Pouauarri qqui narra canima-rrararrari. Poua pano zibehine bica taraha touatora-ra amossi narraro. Rrehe Deocca zossenirri taideccape bica tarraro. Dacorehema ccarroneraha madirrapa narrarozara madimanazapa zoqquehe rriquerreraniuarri toquerrenarrari. ₈Arri Deocca zossenirri zati Poua Corimecca dacorehema ccarronarrarona denima bica tarraro. ₉Narraro uimape parrissa: Deocca zossenirri taidecca madirraza zoqquehe inanarrarope bica taraha pocca zossenirri zati madirraza camittehe inanarrarona denima bica tarraro. Pocca zossenirri zatiza iquerrenezape Deo icca uima Pouaza inaparrirenissa tarraro. ₁₀Nazama Deocca zossenirri taideccape biquehe carriporaha pocca marinarra zaticca biquehena denima bica tarraro. ₁₁Deocca zossenirri taidecca bica teraha pina Moize pano zibehine rricarrarossa narraro. Naraha pocca zossenirri zaticca biquehe deni torrarrarona nema zanaponitoui.

₁₂Deocca zossenirri zatipe bica tehe nema zanaponitoui nauatoto ineza narraro zossenirri ecomerarizaniuarrine icappine-rrerarraro. ₁₃Narraro zossenirri zatipe inarrima-rrerani. Arra Moizepa poua pano zibehine touatorani Izarraeo potemauideni qqui toquena-rrarauiuarrine poua pano oza narrari quenaui nade. Naraha iape pina Moizessa inerrerani. Deocca zossenirri zati ecomeranipe auato tarraro. ₁₄Naraha Izarraeo potemauideni mittemanauiuarrine uaribodeni didiqquiri narrari. Pouadenipa Deocca rrehe canirenirricca zossenirri taidecca ua ua quenaporaha uaribodeni didiqquiri narronemanarraria arra rridapana naco mittemana-rrararrariparra. Cristona orrarirrari uaribodeni inassiuarrabaqquiza mittemanauiuarrine. ₁₅Rrehe rridapana naco Moizerrine dozo nanicca ua iquenezape mittemanauiuarrine bodideni parriremana-rrararrari. ₁₆Naraha madirra bodi cacarriqquimeraza ia Zozossede Zeso Cristoza parrissa nazana mittauissa tauitoui. Pina poua pano ohoza idirrarossa nazapa qqui tauissa tauitoui. ₁₇Ia Zozossede Deo Poua Corime naco pouassa caniqquimerarrari. Poua Corime iaza madizapa uimasiriza imadiporrarope rricani. ₁₈Narrarorrinea iape pina Moize poua pano oza narrarissa inerrerarraro. Ia bazimape pina pipirissa ineza. Deocca biquehe, pocca deni torrehe auato inanarizarraroparri. Ia Zozossede Deorrine icca madie tobicazanaporraro, pina pouassa inaniuarrine. Deo Corime iaza madizapa ia acco tocanabaqqui-zanaporrari.