1 Corintodeniza 9

₁Tetideni uatome-manarri. Ouape madirracca zozosse orrarrerani. Ouape Zeso Cristocca zozossena orrarraro. Ia Zozossede Zeso naco qqui onade. Narrari pouana oua cazosseza tiadeni mari ocanabaqquizape pouaza tiquerrenarrarode. ₂Imecote ouahadeni mota attidenipa: —Paoropa Zesocca zozosse rraraui −quequenanaraha tiadenipe ouaza: —Paoropa Zesocca zozosse −titiquena naniuarrine bica tani. Deocca tiquerrenarrarorrinea Zeso oua cazosserraricca uima auato tarraroparri.

₃Madirra ouaza atti atti quenarraridenizape ouatti arrima narraro: ₄Oua Zeso Cristocca zozosse orrarraro orripaniuarrinepe ouimecotedeni ouaza zamatapa, zeze naha da iquenaui bica taqui? Rrehe, bica tani. ₅Nazama amonerre Deoza parrissa narraro ocarriza naqui poni tazarrani Deo Atti maride icadarizani bica taqui? Bica tani. Pina imecotedeni ouaha Zeso Cristocca zozosse tabaqquissa, ia Zozossedecca imecote Pedorossa onani naqui bica teraha. ₆Arra pouadeni naco poccadeni mamari tabaqquicca danirriza madimanaraha oua Banabe tezerrepe narraro danirriza imadi-rrerani. Naraha narraroza imadiniuarrine bica terreraqui? Bica teraha. ₇Arra isso teppeppedenipa taminecca ziniroza zama ecauemana-rreraqui? Narraroza zama ecauemanarraro. Uizarracca ppa taui uva cacauadepa uva bono rrirripa narraraco? Rrirripa naui. Eueue cacauade naco eueue zorrorini ze ze narraraco? Ze ze naui. ₈Naraha arri uati uati onarrarocca uimaza: —Arrirraro zamacca marinarra −titiquena nanitide. Naraha arrirraro zamacca uimaha orrari-rrerani. Deocca zossenirri Moize dozo inaporraro naqui narraro uimassa narraro carrirraro. ₉Arri Moizerrine Deo Atti dozo naniza arrima narraro: —Arroi rrizaza tirico nocco catorrauiuarrine boui ttai ttai nazapa boui bono ssoque tacossemana tarrararro. Poua naco pocca ttainarraza rripauiuarrine −napoui nade Deo. Naraha Deopa bouizara bodi uatorrarico? Bouiza rraraui. ₁₀Narraro uimape itoui bodi uatoza uati uati tarrari. Narraro uimassa narrarope madirra uizarraza zamatapa nocco dappo inazapa, madirra ouaha bono bite inazapa mota pouadeniza torrauiuarrine zepedeni ihirrimana narrari. ₁₁Irrine Zeso Cristo tauimari tibodideniza torrarrarope pina zamatapa nocco dappo inarrarissa narraro. Nazapa dappo inazapa bono naco bite inaui bica taui. Narrarossa narraroa tizepedenitarri ticarrimananicca mota iaza da tiquenani bica tani. ₁₂Arra Deo Atti mamaride ouahadenipa poccadeni madierrine ticcadeni da naqquinarraza cacarrimana narrari. Naraha iana taide tiadeni mari icanabaqquiporrarode. Nema nezape ticcadeni da naqquinarra iaza da tiquenauiuarrine bica taraha iape icca madierrine tiadeniza uati uati inerrerani. Tiadeniza imadizape icappiraniccatoui tarabaia inarrarorrine ocasserani eraha nema nehe inauanade. Zeso Cristo tauimari icassiuaueraniuarrinecca tiadeni mari icanabaqquirraro torrizani noppineni nema inarrarode.

₁₃Tiadenipe nauatoqquiri tiquenani: Zerozareza zodeodenicca danirri Deoza dada toqquimauarri zepedeni irrimanarraridenipa narraro danirriza mamadimana narrari. Narraria arra Deoza da tauiuarrinecca uauanariuarri zepedeni irrimanazapa arra Deoza da iquenarraricca zamatapa mota, bani motapa pouadeni naco rrirripemana narrari. ₁₄Narraro uimassa narraro ia Zozossede Deo pocca zossenirri. Pocca zozosse tabaqqui poua tauimari icassiuaueraniuarrinecca maride zepedeni irrimanazapa poccadeni mamari tabaqquicca da naqquinarraza madimanauiuarrine uati tarrari. ₁₅Naraha oua Deo Atti maride orrarrarope manaconitoui onariza-rrerade. Narraroa rridapana naqui ticcadeni da naqquinarratoui dozo onerrerani. Arri manaconi rrirehe Deo Atti maride orrarrarope occa uatizehe. Narraro madirrarrine tossamo-rreraniuarrinepe taide pemi ouatianina bica tani, onarraro.

₁₆Ouape Zeso Cristo tauimari icassiuaueraniuarrinecca ouacomera-rizarrarope ouatizeza: —Ouana bica onarraro –onerrerarraro. Zeso oua cazosseza pouaza ozepe irrirraro. Pocca zossenirriza ibo onezape oppinehe ouaza ssonarirana, onarraro. ₁₇Nazama oua touini oneza Zeso Cristo tauimari maride orrezape: —Ozepe irrirraro manaconi −onanitouiraha. Deo Pouana oua tocatterrizaza oua cazosserraride. Nazama pocca zossenirri ouaza bica terre, bica terrererre naraha oneboniuarrine ssamo tani. ₁₈Nema onezape nerrecora manaconi ocarriniuarrine? Arri Zeso Cristo tauimari icassiuaueraniuarrinecca ouacomera-rizezape manaconi rrirehe mari ocanabaqquirrarizana ouatizerraro. Narraro uatizehepe pina occa marinarra manaconissa narraro. Ozepe irrirraro manaconi ouaza da iquenaniuarrine bica teraha narraro touini onerrerani.

₁₉Ouape madirracca zozosse orrarrerani. Poccadeni zossenirriza naqui ozepe irrirrerani. Naraha madirra denima Zeso Cristoza toquerrenauiuarrine ozepe irrizape oua orrine pina poccadeni zozossessa onarraro. ₂₀Occa madirra zodeodeni Zeso Cristoza toquerrenauiuarrine pouadeniza occarizezape pina pouadenirrinessa onanarrarode. Pouadenipa Moizecca marinarraza toquerrenaha madimanarrari. Naraha ouape Zeso Cristorrine Moizecca marinarraza omadi-rrereraha pouadeni maride omadizape Moizecca marinarrassa onaneza pouadeni acco ocanabaqquirrari, Zeso Cristoza toquerrenauiuarrine. ₂₁Nazama madirra ouaha Moizecca marinarra ssamoqquiri narrarideni mari ocanabaqquizapa pina pouadenirrinessa onanarrarode. Moizecca marinarra rrirehe omadirizarraro, Zeso Cristoza toquerrenauiuarrine oneza. Naraha ouape Deocca zossenirri onebo-rrerarraroa arri Zeso Cristocca marinarra ouacauarraroparri. ₂₂Nazama arra imecotedeni Zeso Cristoza rrehe quenaraha poccadeni rrehenirri rrapari tarrarodeniza occarizeza naqui pina pouadenirrinessa onanarrarode, Zeso Cristoza toquerrenauissa tauiuarrine oneza. Arri occa uima pina pouadenirrinessa onanani onarrarope arra madirra bazima bodideni acco ocanariza-baqquiuiuarrine. Madirra mota tocassiuauerarra quenauiuarrine touini oneza. ₂₃Nazama arri occa madie nema onarizarrarope Zeso Cristo tauimari icassiuaueraniuarrinecca madirra bazimaza torrarizaniuarrine, pocca uima bicani ouaza naqui torraniuarrine touini onarraro.

₂₄Nazama tiadenipe nauatoqquiri tiquenani: Madirra ittomeza domo toccazapa orraria taide baccotaporrarina deni torrarrari. Narrarina ittome cacauadecca danirri carrirrari. Nezape tiadeni naqui danirri bicani ticarrimananiuarrine rroppa tiquenarri, onarraro. ₂₅Arra madirra ittometoui taide narroremanapozapa pouadeni nattome quenaporrari. Pouadeni assire dacoraqquiri nauiuarrine uaidira tanicca inebomaneza pouadeni cacauemanauissa tarrari. Nama quenarraripa ittomeza deni toquerrenauiuarrine touini quenarrari. Naraha deni torrarrariza totaticca bebe appani couanira da iquenarraro. Narrarope rricaca taniccaraha iape Deocca danirri rricaquera tanicca icarriniuarrine dameraqquiri inarraro. ₂₆Nazama ouape parrimaraniuarrira rroppa onerrerani. Deocca danirri ocarriniuarrine parri rroppa onarini zanaporraro. Pina madirra ittome onihiza poua tesse tezerre do canireza pouama do, zori, do, zori narrarissa onerrerarraro. Ouape Deo Atti madirraza onaparrirenissa tarraro. ₂₇Ouime ouaza ibora taniuarrine pina oua odaqquinirrarossa narraro. Deocca danirri bicani carrimanauiuarrine madirra mari ocanabaqquirizaraha oua ouacauanissa terrerezape Deocca danirri bicani zori onerana.