1 Corintodeniza 5

₁Titiqueriqqui naniuarricca madirra orraria uananeheza madirraricca uima madirra bazima nauatoqquiri naui. Narraria arra imeni onihiraha pocca amonerre torrarraro. Nema narraro uimape uaidira tani. Deoza rrehe quena-rrararrarideniza naqui oppina tani. Naraha narraro uima tiadeniza anini. ₂Rraho, tiadenipe: —Icca madie bica tani −titiquena naraha nerrecotoui pocca uaidireheza orri tiquenerrerarraro? Narrari madirrapa tiadeniza qqueqquezima narrarauiuarrine zosse tininemanarro, onarraro. ₃Ouassire tiadeniza uarri oneraha titouideni obodi uatomezape rrizeraqquiri tiquenarraro. Pina tiadeniza omadirrarossa narraro. Nauicca madirra uimasiri tonanarrari naco onacasserarrariparra. ₄Ia Zozossede Zeso Cristo onima pocca uima ticattememananiuarrine tiqueriqquimanezape oua naqui tiadeniza ocarrimarrarossa nanitoui. Zeso Cristocca dacorehe naqui tiadeniza aninitoui. ₅Narrari maqquiderre uimasiri tonanarraripa Tocorime-Tamineza tinanemanarro. Naui poua assirepe amossi naraha niza ia Zozossede Zeso ccanipomaza poua corimena tossiuauauitoui.

₆Nazama narraro uima tiadeniza anizape tetizemaneza: —Icca madie bica tani −tiquenani bica terrerani. Arra pao ssarra tauiuarrine cacarrimacca uima nauatoqquiri tiquenani. Tirico bono riua naui imeza cacarrima bazira taha carrimazapa ssarrarra taui. Narrarossa narraro madirra orrariacca uimaraha bazimaza ssarra tariza tani. ₇Nazama pocca uimasiri ssarra tariza-rreraniuarrine tinebomanarro, pina zodeodenicca errete Pascoa anizape pao ssarra tauiuarrinecca cacarrima inebomanarrarissa tinanemanarro. Pina pao zati cacarrima rrirahaccassa tiquenarri. Cristopa itoui zoqquerrari. Pina icca eueue bedi Pascoaza zoqquerrarissa narrari. ₈Nema nezape pina Pascoacca erreteza etizerrarossa inana. Icca madie zatiza imadizape cacarrima rradaui rriraha imadi-zanapona. Narraro uimape uaidirehe, uimasiri nemanehe ineborizezape parrissehema, maizerehema Cristoza etizezanaporraroparri.

₉Nazama arri occa uima teppe tiadeniza dozo onaporrarope arrima onarraro: Nauicca madirra uananeheza dameraqquiri narraridenizape ticarrimemana terrerarri, onarrarode. ₁₀Naraha ouattipe: Rrehe quena-rrararrarideniza ticarrimemana terrerarri, onerrerani. Arrirraro zamaza madimanarraridenipa uananehe carrimanarrari. Madirra ouaha zepetarri acconi uadiqquiri narrari. Tozepetarritoui, zinirotoui maizaqquiri narrari. Madirra ouahadenipa botirridede rarrari. Siba nauatoniza naco uauatizemana narrari. Arrirraro zamacca madirrapa nama quenaraha pouadeniza icarrimanarraro. Arrirraro zama inebozana pouadeniza icarrima-rreraniuarrineraha narrarope ssamo tani. ₁₁Naraha ouattipe arrima narraro: Madirra: —Iape timecotedeni iquerrenani −quenaraha uimasiriza dameraqquiri nazapa narraridenizape ticarrimemana terrerarri, onarraro. Pina arra uananehe carrimanarrarideni, zinirotoui mamaizemana narrarideni, siba nauatoniza uauatizemana narrarideni. Pouadeni tesseza uima ponimacca uatirridede rarrarideni, noccodeni rranoqquiri nauiuarrine zerridede rarrarideni, bobotidedeni naco. Nama quenarraridenizape poccadeni ozauarri bacco tizimemana terrerarri. Pouadeniza naqui tirripemana terrerarri, onarraro. _12-13Ouape Deoza toquerrena-rrararraridenicca uima cattemade orrarrerani. Deona poccadeni uima icattemanitoui. Arri tiadeni Deoza tiquerrenarrarope ticcadeni uima tiadenina cacattema titicana narri. Nazama nauicca uimasiri tonanarraripa tiadeniza carrimarrarauiuarrine tinebomanarro, onarraro.