1 Corintodeniza 1

₁Ouimecotedeni, ouape Paoro tiadeniza dozo onarraro. Deo nacassa taza Zeso Cristocca zozosse orraniuarrine ouaza uaua narraride. Ouimecote Sostene tezerre tiadeniza nirra inarraro. ₂Oza panani Corintouarricca Deoza tiquerrenarraro titiqueriqqui naniuarri tiadeniza arrirraro uima zosse inarraro. Bazima Zeso Cristoza parrissa tiquenezape pouarrine tibodideni touissorizarraro. Narrarorrine Deocca tiquerrenarraroparri. Deo tiadeniza uaua narraripa: —Ouazara tibodideni uatoni orrari narri −narrari. Zama bazimaza madirizemanarrari Zeso Cristoza parrissa quenarrarideniza naco: —Ouazara tibodideni uatoni orrari narri −nanarra narrari. Zeso Cristopa pouadeni Zozossede. Narrari orrariui ia Zozossede. ₃Abi Deo, Poua Bedi ia Zozossede Zeso Cristo tezerre tiadeniza uima bicani inanemanana. Poccadeni rronehe naqui tiadeniza torrana, inarraro.

₄Ouimecotedeni, titouideni Deoza uati uati onezape: —Rrehe Abi Deo, peperri. Tirrine bica tani −ohonanarraro. Zeso Cristocca tiquerrenezape Deo tiadeniza touati canauari canani. Narrarorrine Deoza ouatizerraro. ₅Zeso Cristocca tiquerrenezape Deo pocca biquehe bazima tiadeniza inanarraroa Pouarrine pocca uima cacomerade nauatoqquiri tiquenarraro. Pouarrine naqui Poua Atti nauatoqquiri tiquenarraroparri. ₆Arri tiadeniza Zeso Cristocca uima ouacomeraporrarope rridapana ticcadeni madieza auato tarraroparri. ₇Narraroa ia Zozossede Zeso Cristo ccanipomauitoui timadimanaqquezape Deocca danirri zori tiquenerre canima-rreranitoui. ₈Ticcadeni rrehenirri daco torani zanaponiuarrine Deo tiadeni touacauabaqqui-zanapozapa arricca zama rricanicca uada bacco tiquenaniuarrine. Nani ia Zozossede Zeso Cristo ccanipomazapa uima ticappiremananiuarrine. ₉Deopa pocca uatinarra inaparrirenissa zanaporraro. Poua Bedi ia Zozossede Zeso Cristoza tiquerrenaniuarrine titouideni uaua narrari.

₁₀Ouimecotedeni, ia Zozossede Zeso Cristo onima tiadeniza uati onana: Timecotedeni tezerre rrehe ticanirere canarri. Tiadenira tiadenira tarizemana-rrerarri, onarraro. Ticcadeni uima bica taniuarrinepe pina ticarronerara caneza Zeso Cristozara tibodideni orrariqquimananissa teza timadimanarri. ₁₁Ouimecotedeni, ticcadeni uima Croecca madirra ouaza uati toquenaui omittarrarope: —Ticcadeni uima bica terrerani. Rrehe ticanirenissa terrerani −quenaui omitteza tiadeniza uati onarraro. ₁₂Titessedeni mota attidenipa: —Iape Paorocca iquerrenani −quenaraha motapa: —Iape Aporocca −quenarrari. Ouahadenipa: —Iape Pedorocca −quenaraha ouahadeni naco: —Iape Cristocca −quenaui omittarraro. ₁₃Nema tiquenezape pina Cristo ticanarobe-manarrarissa tinanemanarrari. Oua Paorona ticcadeni uimasiri manaconi oua aua porimacossaniza coba izanemanarraro tterane? Passo dopaniza niquinarra naqui oua oni Paoroza tiadeni niqui tozanabaqqui-manarrari ttarana? _14-15Ouape tiadeni passo dopaniza niqui ozanabaqqui-rrerarrarorrine Deoza: —Rrehe, tirrine bica tani −onarraro. Rridacca tiadeni passo dopaniza niqui ozanabaqquizape arra madirrapa: —Paoro poua onima ia passo dopaniza niqui tozanabaqquirraride −quenauitouiraha nouerani. Naraha ticcadeni madirra pamaha Crispo, Caio narraridenina passo dopaniza niqui ozanabaqquirraride. ₁₆Estepana naco pocca madirrama passo dopaniza niqui ozanabaqquirraride. Madirra ouahadenipa nouerauitide, ouati rrimani. ₁₇Cristopa madirra passo dopaniza niquide oua cazosse-rrararrari. Madirra tocassiuauerauiuarrinecca uima bicani ouacomera-rizaniuarrinena oua cazosserraride. Naraha narraro uima ouacomera-rizezape arrirraro namicca madirracca nauatoueza uati uati onerrerade. Rridacca ouattina deni torrezape Zeso aua porimacossaniza zoqquerraricca uimape arrimani torranitouiraha.

₁₈Narrizoueza toquerrenauiuarrinecca madirrapa aua porimacossaniza Cristo zoqquerrari tauimari mittemanaraha: —Ponimaua −quequenanarrari. Naraha ia Deocca tossiuaueheza iquerrenarrarope narraro uimaza: —Deocca dacoreheua −inarraro. ₁₉Deo Atti dozo naporrarope arrima narraro:

₂₀Nauatoqquiri narrarideni, mamaridedeni, madirra ouahadeni arrirraro zamacca uima uatide nauatoqquiri narrarideni carri taraha poccadeni nauatouepe deni torraniccaqui? Nouerani. Arrirraro zamacca nauatouepe Deorrine ponima torrarraro. ₂₁Deo Poua bodi nauato tazapa atti arrama narrari: —“Iape iara nauatoue icarrini” quequenanarraridenipa Ouaza bacco toquena-rrarauitoui −narrari. Pouapa pocca uima bicani mari mari inarraroza rrehe quenarraridenina inassiuauabaqquiuiuarrine nacassa tarrari. Narraro uima madirra motadenizape pina ponimassa narraro.

₂₂Arra zodeodenipa canauatori canehe auato tani qqui toquenauiuarrine touini quenarrari. Zama Cresiacca madirradenipa touattehe uapi tani tocauatterauiuarrine touini quenarrari. ₂₃Naraha iape aua porimacossaniza Cristo zoqquerrari tauimarira mari mari ihinariza narraro. Zodeodenipa narraro uima mittemanauiuarrine rriperaqquiri narrari. Zodeo querrena-rrararrarideni naco narraro uima pouadeniza pina ponimassa narraro. ₂₄Naraha Deo ia uaua tabaqquirraripa arri zodeo iquerrenarraro, zodeo querrena-rrararrari, ia bazimaza pocca uima auato tarraro. Cristopa Deocca dacorehe carri, pocca nauatoue carri narrari. ₂₅Deocca nauatouepe pouadeniza pina ponimassa naraha Deocca nauatouena deni torrarraro. Madirracca nauatouepe arrimani. Deo pocca dacorehe naqui pouadeniza pina rrapari tarrarossa naraha pocca dacorehena denima dacorarraro. Madirracca dacorehepe arrimani torrani.

₂₆Ouimecotedeni, tibodideni uatome-manarri. Arra titiqueriqquimana naniza arrirraro zamacca madirra nauatoqquiri narraridenipa uapi tarraraui. Tiadeniza naco arrirraro zamacca deni toquerrenarrarideni uapi tarraraui, taminedeni naco uapi tarraraui. Naraha Deopa nama naha pocca madirra tiquerrenaniuarrine tiadeni uaua tabaqquirrari. ₂₇Arrirraro zamacca madirrapa madirra ouahadeniza: —Ssamoqquiri naui −quequenanaraha Deopa ssamoqquiri narraridenina icatterrizabaqquirrari. Deo nama narraripa madirra: —Iape iara nauatoqquiri inani −quequenanarrarideni arramani toquerrenauiuarrine. Arrirraro zamacca madirrapa madirra ouahadeniza: —Rrapariqquiri naui −quequenanaraha Deopa rrapariqquiri narraridenina icatterrizabaqquirrari. Deo nama narraripa madirra: —Iape dacoco irrirani −quequenanarrarideni arramani toquerrenauiuarrine. ₂₈Deopa arrirraro zamacca madirra nenebo toquerrenarrarideni icatterrizabaqquiui, uauattarro toquerrenarrarideni icatterrizabaqqui, arramani toquerrenarrarideni icatterrizabaqqui narrari. Deo nama narraripa arrirraro zamacca uimaza madirra deni toquerrenarrarideni pouama inanabaqquiuiuarrine. ₂₉Nema nezape madirrapa Deoza: —Ouana bica onarraro. Oua motta nauato onani −quenauiuarrine ssamo tani. ₃₀Taidepe arri Deo Pouarrine Zeso Cristoza irrariqquirraroparri. Pouarrine naqui Cristoza icauatterara canarraroparri. Cristorrine icca uima Deoza parrirenissa tarraro. Ibodi tonauissorrari. Uimasiriza imadizanapo-rreraniuarrine ia todinibaqquirrari. ₃₁Nezape pina Deo Atti dozo naporraroccassa inanana. Narrarope arrima narraro: —Tetizemanezape: “Orrine bica tani, deni orrani” titiquena nerrerana. “Ia Zozossede Pouarrinena bica tani, pouana deni torrarrari” titiquena nanina bica tani −naui nade Deo Atti.