Markus 9

₁Un Yeesus macht xlus, am saan:

— Ich fersichere aych tas tas woer is: hier sin phaar layt woo net xtërwe tuun eep se te Hërkots Raych siin aan khome mit macht.

₂Seks taache tëm noo, is Yeesus uf en hooche përich kang, un hot ploos Pheeter, Tiaako un Yohan mit kenom. Too, hon se kesiin sayn erxaynung sich ferënere. ₃Sayn tsaych is kans ways un klënsich kep, fiil wayser wii es khënt kewex kewe. ₄Un ti tray tisiple hon Eliias un Mooses kesiin mit Yeesus am fertseele. ₅Tan saat Pheeter fer Yeesus:

— Mayster, wii kuut tas meyer too sin! Meyer xtele tray hite uf: een fer aych, aner fer Mooses un noch een fer Eliias.

₆Pheeter wust net was eyer saan solt, wayl eyer un ti anere tswaay tisiple waare ferxrok. ₇Klaych tëm noo, hot en wolek se tsuu ketekt, un fon tëm is en xtim khom, woo saat:

— Tas is mayne liipe Soon. Heyert was tee saat!

₈Too hon ti tisiple um sich rom kekukt un hon ploos mee Yeesus pay tëne kesiin.

₉Wii se te përich runer am keen waare, hot Yeesus kexikt tas se fer nimant fertseele solte was se kesiin hate, pis te Soon fom Man wiiter peleepe teet. ₁₀Ti hon ti ortnung aan keheyert, awer hon unich sich tiskutiert iwer was ti peleepung petayte teet. ₁₁Tan hon se Yeesus kefroot:

— Warom saan ti Kesets mayster tas Eliias te eyerxt khome mus?

₁₂Eyer hot keantwort:

— Is woer tas Eliias te eyerxt khome tuut fer ales prepareere. Awer, warom fersichere ti Hayliche Xrifte tas te Soon fom Man fiil layte mit mache tuut un kept ap kextoost? ₁₃Ich fersichere aych tas Eliias xon khom is, un hon em xlecht pehantelt wii se wolte, tëm noo wii ti Xrifte es saan iwer iim.

₁₄Wii tii ticht pay ti tisiple khom sin, hon se en kroos folek neewe rom kesiin un tas se mit Kesets mayster am tisputeere waare. ₁₅Wii tas folek Yeesus, hon se sich al ferwunert un sin tëm in keeche kexprung fer em se pekriise. ₁₆Yeesus hot fer ti tisiple kefroot:

— Was tuut teyer mit tëne tisputeere?

₁₇En man woo unich em folek waar, hot keantwort:

— Mayster, ich hon tich mayne soon keprung, woo fon en xlechte kayst pesetst is un khan net xpreche. ₁₈Imer wen te xlechte kayst mayn soon pesetst, xmayst er em uf te potem, un tee fangt aan se xaume, tuut sich ti tseen kwiitxe mache; un te wërt yeetes mool xwëcher. Hon fer tayn tisiple ferlangt ti solte em fort yaae, hon es awer net kemach kriit.

₁₉Tan saat Yeesus tëne:

— Oh! Mënxe oone klaawe! Pis wan playwe ich noch pay aych? Pis wan tuun ich aych aus hale? Pringt en meyer!

₂₀Un hon em te puup keprung: wii tee Yeesus kesiin hot, hot te kayst em pletslich mit kewalt kexitelt, un uf te potem am fale, hot eyer sich ferwënselt, am xaume.

₂₁Yeesus froot fer em puup sayne fater:

— Wii lang is tas am paseere?

Te fater hot keantwort:

— Tsayt khint uf! ₂₂Oft mool hot eyer en ins fayer un ins waser keworef, fer em um se pringe. Awer, wën teyer khënt, tan helef uns. Petauer uns!

₂₃Yeesus hot keantwort:

— Wën ich khan? Ales is meechlich fer tee woo klaawe hot.

₂₄Tan hot te fater kexraayt:

— Ich hon klaawe! Helef mich noch mee klaawe hon!

₂₅Wii Yeesus kesiin hot tas fiil layt sich um iim rom am samle waare, hot eyer tii ortnung kep fer te xlechte kayst:

— Taupe un xtume kayst, kee aus tëm puupche un kee nii mee rin!

₂₆Te kayst hot kexraayt, hot tas puupche kexitelt un is aus em kang, wii toot laye kelos. Al hon kesaat eyer weyer kextorep. ₂₇Awer, Yeesus hot tas puupche an te hant kehool un hot em keholef sich uf xtele.

₂₈Wii Yeesus tehëm rin kang is, hon tëm sayn tisiple in priwaat kefroot:

— Warom khonte meyer tee kayst net fort yaae?

₂₉Yeesus hot keantwort:

— Tee sort kayst khan ploos aus kextoost kewe mit kepeet.

₃₀Yeesus un ti tisiple sin fon tëm plats fort kang, torich Kalilëya. Yeesus wolt hon tas nimant wise solt woo eyer weyer ₃₁wayl eyer waar ti tisiple am unterichte. Eyer saat tëne:

— Te Soon fom Man sol ap kep wëre in te mënxe sayn hënt, un tuun em umpringe; awer, tray taache noo sayne toot, wërt Eyer witer peleepe.

₃₂Ti tisiple, awer, hon tas net ferxtan, un hate khee koraaj tëm etwas se frooe.

₃₃Yeesus un ti tisiple sin aan khom in te xtat Kafarnaum. Wii se xon tehëm waare, hot Yeesus fer ti tswelef tisiple kefroot:

— Was waart teyer am tiskuteere iwer weech?

₃₄Awer, tii sin ruich keplip, wayl iwer weech hate se unich sich tiskuteyert weyer fon tëne te importanteste weyer.

₃₅Yeesus hot sich kesetst, hot ti tswelef keruuf un saat tëne:

— Wën yemant te eyerxte sin wil, sol uf em letste plats playwe un ti anere al petiine.

₃₆Too hot eyer en khint fest kehal un hot tas tswixich tëne hiin ketuun. Too, hot Eyer es um keaaremt un saat fer sayn tisiple:

₃₇— Tee woo, wayl eyer mayne aanhënger is, en khint wii tas uf nëmt is mich am uf nëme. Un weyer mich uf nëme tuut, nëmt net ploos mich uf, awer aach Tee woo mich kexikt hot.

₃₈Yohan saat tëm:

— Mayster, meyer hon en man kesiin woo, in tayne naame, temoone aus kextoost hot, un tee is net en tisipel wii meyer; awer meyer hon em ferpot, wayl tee net fon unser krupe is.

₃₉Yeesus hot keantwort:

— Ferpiit em net, wayl es kept nimant woo wunere macht in mayne naame un klaych tëm noo fon mich xlecht xpreche teet. ₄₀Wayl, weyer net keeche uns is, is mit uns. ₄₁Ich fersichere aych tas tas woer is: tee woo aych en klaas waser fer se trinke kewe tuut, in mayne naame, wayl teyer fon Kristus sayt, kriit kans sicher sayne loon.

₄₂Yeesus saat wayter:

— Un weyer ëne fon tëne macht tas ti kleene klaawer mich in xtich lose, peser weyer es wën mer en kroose miil xteen an te hals hënge teet un ins meer kexmis keept. ₄₃Un, wën een fon tayn hënt tich in sinte fale macht, xnayt se ap, wayl is peser mit een hant ins eewiche leewe khome als tswaay hënt hon un in ti hel khome, ins eewiche fayer. ₄₄[Too tuun ti wërem woo uf frese net kaput keen, un tas fayer nii aus keet.] ₄₅Wën tayne fuus tich in sinte fale macht, xnayt em ap! Is peser kriplich ins eewiche leewe khome als wëns tuu tswaay fiis host un in ti hel kexmis kepst. ₄₆[Too tuun ti wërem woo uf frese net kaput keen, un tas fayer nii aus keet.] ₄₇Wën eens fon tayn aue tich in sinte fale macht, rop es raus! Wayl is peser in te Hërkots Raych khome mit ploos een au als ti tswaay hon un in ti hel kexmis kewe. ₄₈Too tuun ti wërem woo uf frese nii kaput keen, un tas fayer keet nii aus.

₄₉— Aler layt kewe sauwer kemach torich em fayer, soo wii ti opfere sauwer kemach kewe torich em sals. ₅₀Te sals is etwas nutsliches; awer, wën tee te kexmak ferleyert, wii khënt teyer tëm noch mool kexmak kewe? Teyer mist sals in aych selepst hon un leept in friite ëne mit em anere.