Mateus 6

₁— Kept acht fer net ayre relijioose flichte in puplikum iipe fer kesiin kewe fon te anere. Wen teyer soo hantelt, wërt teyer khee loon kriin fom Fater, woo im himel is.

₂— Wëns tuu etwas kepst fer yemant woo prauch, tuu net wayter fertseele was tuu kemach host, wii ti xaynhayliche mache in te sinakooke un uf te xtroose. Tii mache tas fer keloopt kewe fon te anere. Ich fersichere aych tas tas woer is: tii hon xon sayne loon kriit. ₃Awer tuu, wëns tuu yemant helfe tuust, mach tas soo tas net mool tayne tichste froynt se wise kriit was tuu kemach host. ₄Tas sol in kehëmnis playwe; un tayne Fater, woo siit was tuu in kehëmnis machst, kept tich te loon.

₅— Wën teyer peete tuut, sayt net wii ti xaynhayliche. Tii tuun kërn peete im xteen in te sinakooke un uf te eke fon te xtroose fer kesiin kewe fon te anere. Ich fersichere aych tas tas woer is: tii hon xon sayne loon kriit. ₆Awer tuu, wëns tuu peete tuust, kee in tayn tsimer, mach ti tier tsuu un peet fer tayne Fater, woo net kesiin kewe khan. Un tayne Fater, woo siit was tuu in kehëmnis machst, kept tich tayne loon.

₇— In ayre kepeete, tuun net noch mool saan was teyer xon kesaat het, wii ti pakaane tas mache. Ti tënke tas Hërkot tëne heere tuut wayl se lange kepeete mache. ₈Sayt net wii tii, wayl, eep teyer ferlange tuut, wees ayre Fater xon was teyer praycht. ₉Also, peet soo:

₁₄— Wayl, wën teyer ti layt woo aych pelayticht hon fertsayert, tan tuut te Fater woo im himel is aych aach fertsaye. ₁₅Awer, wën teyer ti layt net fertsaye tuut, tuut ayre Fater aych aach net fertsaye.

₁₆— Wën teyer faste tuut, macht khee traurich kesicht wii ti xaynhayliche es mache, wayl tii mache tas fer yeete eene se wise kriin tas tii am faste sin. Ich fersichere aych tas tas woer is: tii hon xon sayne loon kriit. ₁₇Awer tuu, wëns tuu faste tuust, wex tayn kesicht un khëm ti hoer ₁₈tas ti anere net se wise kriin tas tuu am faste pist. Un ploos tayne Fater, woo net kesiin kewe khan, kriit se wise tas tuu am faste pist. Un tayne Fater, woo siit was tuu machst in kehëmnis, kept tich tayne loon.

₁₉— Samelt khee raychtum hier uf te eyert, woo ti fixelcher un te rost tas ferfrese, un woo ti xpitspuuwe in preche un xteele. ₂₀Keeche teel, samelt raychtum im himel, woo ti fixelcher un te rost tas net ferfrese khëne, un ti xpitspuuwe net in preche khëne un net xteele khëne. ₂₁Wayl, woo ayer raychtum is, too is ayer hërts.

₂₂— Ti aue sin wii en licht fer te klhërwer: wën ayre aue kuut sin, kept te kanse khërwer fol licht. ₂₃Awer, wën ayre aue xlecht sin, kept ayre khërwer fol tunkelheet. Soo, wën tas licht woo in tich is sich in tunkelheet transformeyert, wii xlim is tii tunkelheet!

₂₄— En sklaawe khan net tswaay hëre tiine in te selwich tsayt, wayl eyer tuut ëne ap xtoose un te anere liiwer hon; ore wërt leaal sin fer ëne un te anere net kërn hon. Teyer khënt net Hërkot tiine un aach tas kelt tiine.

₂₅— Tesweche saan ich aych: khimert aych net mit tëm ese un mit tëm ketrënk woo teyer praycht fer se leewe un net mool mit em tsaych woo teyer praycht fer sich se klayte. Meecht tas leewe iwerhaupt net mee weyert hon wii tas ese? Un meecht te khërwer net mee weyert hon wii tas tsaych? ₂₆Kukt mool ti feel woo am himel fliye: tii seye net, ërnte net, un tuun khee ese wech in te xop. Awer, ayre Fater, woo im himel is, kept tëne se ese. Meecht teyer net fiil mee weyert hon wii ti feelcher? ₂₇Un khee ëne fon aych khan sayn leewe lënger mache, wën ach sich noch soo fiil khimere tuut temit.

₂₈— Un warom khimert teyer aych mit tsaych? Kukt mool wii ti pluume wakse uf em khamp: ti xafe net, un mache khee tsaych fer sich selwer. ₂₉Awer, ich fersichere aych tas net mool Salomon, woo soo raych waar, hot soo xeen tsaych aan ketsoo kehat wii tii pluume. ₃₀Is Hërkot woo tas kraas uf em khamp klayte tuut, woo hayt pliye tuut un moye ferxwine tuut, im oofe ferprënt. Tan, is es sicher tas tee aych aach klayte tuut, woo soo en kleene klaawe het! ₃₁Also, kept net soo pekhimert, am frooe: “Woo tuun meyer ese samer kriin?” ore “Woo tuun meyer ketrënk samer kriin?” ore “Woo tuun meyer tsaych samer kiin?” ₃₂Wayl ti pakaane sin imer tas tings am suuche. Ayre Fater, woo im himel is, wees tas teyer tas ales praycht. ₃₃Soo, tuut uf es eyerxte plats in ayer leewe te Hërkots Raych un tas was Hërkot wil, un eyer kept aych tas tings ales. ₃₄Tesweche, khimert aych net mit em neekste taach, wayl te neekste taach pringt sayn aychne pekhimrunge. Fer yeete taach sin kenuuch sayn aychne xwiirichkheete.